Марк 7 - Аллагьасул Калима

7 бетӀер Аллагьасул амруялги умумузул гӀадаталги

¹ Гьале ГӀисахъе рачӀун, гьенир данделъана фарисеялги Иерусалималдаса цо чанго динияв гӀалимчиги.

² ГӀисал цо-цо муридал «хъубал» квераз, ай квералги чуричӀого, кваналел рихьана гьезда. (

³ Фарисеялги ва цогидал киналго жугьутӀалги, умумуздасанго бачӀараб динияб гӀадат цӀунун, цин кверал чуричӀого кваназе гӀодор чӀоларо.

⁴ Базаралдаса руссараб мехалъги гьел кверал чуричӀого кваналаро. Цогиги гӀемер руго гьез цӀунарал гӀадатал. Масала, мухӀканго чурула суркӀа-щурун, парччи-гулгун, пахьул хьагал.)

⁵ Гьединлъидал фарисеязги диниял гӀалимзабазги ГӀисада гьикъула: – Умумузул динияб гӀадатги цӀуничӀого щай дур муридал чуричӀел квераз кваналел ругел?

⁶ ГӀисаца жаваб кьуна: – Нуж гӀадинал ххвелал гьаризе бокьулел чагӀазул хӀакъалъулъ цӀакъ битӀун абун бугебха Ишая аварагасул тӀехьалда: «Гьел гӀадамазул кӀалалъ Дир цӀар гӀемер рехсола, Амма ракӀални гьезул рикӀкӀад руго Дидаса.

⁷ ГӀадада ккела гьезул Дие гьабураб тӀагӀат, ГӀадамазул гӀадатал цӀунизе халкъ тӀамидал».

⁸ Аллагьасул амруги рехун тун, гӀадамазул гӀадат цӀунула нужеца.

⁹ Цоги гьес абуна: – Нужерго гӀадат цӀунизе бокьун Аллагьасул амру нахъчӀвазени махщел щун буго нужее!

¹⁰ Мусал къануналда гурищ абун бугеб: «Дурго инсулги эбелалъулги адаб-хъатир гьабе!» Хадубги: «Жиндирго инсул яги эбелалъул хӀакъалъулъ квешаб рагӀи абурав чи чӀвазе ккола».

¹¹ Амма нужеца малъулеб буго: масала, пуланав чиясул ихтияр бугила инсуда яги эбелалда абизе нужее дидасан кколеб напакъа дица Аллагьасе къурбан, ай назру гьабунилан.

¹² Гьелдалъун нужеца чӀезабулеб буго гьев чияс жиндирго инсуеги эбелалъеги кумек гьабичӀониги гӀолилан.

¹³ Гьедин нужеца умумуздасан бачӀараб гӀадаталдалъун хвезабулеб буго Аллагьасул амру. Гьелда релълъаралги гӀезегӀан жал гьарулел руго нужеца.

Инсан сунца хъублъизавулев?

¹⁴ Нахъеги халкъги аскӀобе ахӀун, ГӀисаца абуна: – Дихъ гӀенекке нуж киналго:

^15-16 къватӀиса жанибе аралъ гуро инсан хъублъизавулев, гьев хъублъизавула гьесда жаниса къватӀибе бачӀаралъ. Гьеб бичӀчӀа нужеда!

¹⁷ Гьеб халкъалда аскӀоса ун рокъоре щвараб мехалъ ГӀисада муридаз гьикъана доб кициялъул магӀна щибилан.

¹⁸ ГӀисаца гьезда абуна: – ГьедигӀанго жо бичӀчӀуларел чагӀийищха нужги? КъватӀиса жанибе аралъ инсан хъублъизавуларевлъи лъаларебищха нужеда?

¹⁹ КӀалдисан чорхолъе жанибе араб жо инсанасул рекӀелъе гуро унеб, чохьонибе уна, цинги гьенисан къватӀибеги уна. (Гьел рагӀабаздалъун ГӀисаца бичӀчӀизабуна инсанас кваналебщинаб квен бацӀцӀадаб, хӀалалаб букӀин.)

²⁰ Хадубги гьес абуна: – Амма инсан хъублъизавула гьесда жанисан бачӀун къватӀибе аралъ.

^21-22 Щаян абуни, инсанасда жанисан, гьесул рекӀелъан рачӀуна квешал къасдалги, хъахӀбалъиги, цӀогьги, чӀвай-хъвейги, зиначилъиги, хъантӀи-къарумлъиги, ццинги, хӀилла-макруги, пасалъиги, жахӀда-хӀусудги, бугьтанги, чӀухӀи-пахрулъиги, жагьиллъиги.

²³ Гьеле гьеб инсанасда жанисан къватӀибе бачӀунебщинаб квешлъиялъ хъублъизавула гьев.

Цогидаб халкъалъул гӀаданалъги ГӀисаде иман лъола

²⁴ Гьениса вахъун ГӀиса щвана Тир шагьаралъул ракьалде. Пуланав чиясул бакӀалда рещтӀарав гьесие бокьун букӀинчӀо жив вачӀун вукӀин гӀадамазда лъазе. Амма вахчун гьев хутӀичӀо.

^25-26 Цо чӀужугӀаданалда рагӀана гьев вачӀун вугилан. Гьелъул яс йикӀана жундуз ккун. (Гьей йикӀана мажусияй, Сириялъул ракьалдаса финикияй.) ГӀисахъе ячӀун, гьесул хӀатӀазда цее накабаздаги чӀун, гьелъ гьарана жиндир ясалъул чорхолъа шайтӀан бачахъейилан.

²⁷ Гьес гьелда абуна: – Цин лъимал гӀорцӀизегӀан чӀа, лъималазул кӀалдиса бахъун чед гьабзазе базе бегьуларо.

²⁸ ГӀисае жавабалъе гьелъ абуна: – Я, БетӀерчӀахъад! Гьебни битӀараб буго. Амма лъималазухъа рортарал чадил кескал столалда гъоркь регун рукӀунел рукъалъул гьабзазеги щолагури.

²⁹ Цинги ГӀисаца гьелда абуна: – Гьеб рагӀи дие рекӀее гӀуна, гьанже дурго рокъое а; дур ясалъул чорхолъа шайтӀан нахъе арабин.

³⁰ Рокъое щведал, гьелда жиндирго яс ятана, шайтӀанги чорхолъа ун, парахатго бусада егун.

ГӀисаца гӀинкъасда рагӀи рагӀизабула

³¹ Тир улкаялдаса вахъун, Сидон шагьарги къотӀун, АнцӀшагьаралъул ракьалдасан нахъеги Галилеялъул ралъдал рагӀалде щвана ГӀиса.

³² Гьесухъе вачун вачӀана хӀалица гурони кӀалъазе кӀоларев гӀинкъав чи, гьесда цо квер хъвайилан гьарун.

³³ ДовегӀанги вачун, ГӀисаца гьев чиясул гӀинзунир килщал къазаруна, ту-тузеги ту-тун гьесул мацӀалдаги хъвана килищ.

³⁴ Цинги, зобалазде бералги тӀамун, угьун хӀухьелги биччан, гьес абуна: – ЭтпатахӀ! (Гьелъул буго «Рагье!» абураб магӀна.)

³⁵ ГьебсагӀат гъов чиясул гӀундул рагьун рачӀана, ва мацӀалда букӀараб гарацӀги бичун ун, бацӀцӀадго кӀалъазе лъугьана.

³⁶ Гьелъул хӀакъалъулъ лъиданиги бицунгейилан лъазабуна ГӀисаца гьел гӀадамазда. Амма гьедин цӀикӀкӀун гьукъанагӀан, дагьабги цӀикӀкӀун тӀибитӀулеб букӀана халкъалда гьоркьоб ГӀисал хабар.

³⁷ Ва дагьабги цӀикӀкӀун гӀажаиблъун, хӀикмалъун хутӀарал гӀадамаз цоцазда абулаан: – Сунда квер баниги, кинабго лъикӀ лъугьунеб буго гьесухъа. ГӀинкъаздаги рагӀи рагӀизабулеб буго, мацӀ лъаларелги кӀалъазарулел руго.