Марк 4 - Аллагьасул Калима

4 бетӀер Аллагьасул ПарччахӀлъиялъул мисалал Хуриб хьон хьалев чи

¹ Нахъеги ралъдал рагӀалда гӀадамазе вагӀза-насихӀат гьабизе лъугьана ГӀиса. ГӀемераб халкъ бакӀарун букӀана гьесухъе. Гьединлъидал, ралъдалъ бугеб росодеги вахун, гьенив гӀодов чӀун вукӀана гьев. ТӀолабго халкъин абуни ралъдал рагӀалда эхетун букӀана.

² ГӀемераб хабар бицана гьезие ГӀисаца, батӀи-батӀиял мисалалги рачана.

³ – ГӀенеккея: хуриб хьон хьазе вахъун вукӀанила цо чи.

⁴ Хьалаго-хьалаго цо-цо мугьал нухде рортанила, роржун рачӀун хӀанчӀаз рищанила гьел.

⁵ Цо-цо мугьал ракьул хъал гурони тӀад гьечӀеб тӀалде кколел рукӀанила. Ракь тӀеренаб букӀиндал, гьел гьенир хехго тӀирщанила ва тӀаде раккизе лъугьанила.

⁶ Амма бакъ тӀад речӀчӀарабго, речӀан анила гьел, ва гъваридго ракьулъе кьалбал риччан рукӀинчӀелъул, хеккого ракъванила.

⁷ Цогиги мугьал заз-хъарахъалда гъорлъе кканила, хӀалигъун бижараб чӀахӀицаги зазицаги гьел гъанкъун реханила, ва гьезда тӀад тӀорги бечӀанила.

⁸ Цогидал мугьал кканила лъикӀаб ракьалда тӀаде, гьездасан рижанила ва гӀун рачӀанила тӀорал: гьезул цоялда букӀанила лъеберго, цогидалда – лъабкъого ва цо-цоялда – нусгоги мугь.

⁹ Цинги ГӀисаца абуна: – ГӀундул ругезда рагӀизе биччанте гьеб!

¹⁰ Жалго хутӀидал, дов анцӀила кӀиявго чапарасги цогидал цадахъ рукӀаразги ГӀисада гьикъана, мун мисал бачун кӀалъаялъул магӀна щибилан.

¹¹ ГӀисаца абуна: – Нуж руго Аллагьасул ПарччахӀлъиялъул балъголъаби лъазе рес щварал гӀадамал, амма цогидазе кинабго мисалаздалъун бицуна, –

¹² ралагьун ругониги гьезда бихьунгутӀизе, гӀенеккун ругониги рагӀунгутӀизе, бичӀчӀунгутӀизе. Гьедин букӀинчӀебани, гьел Аллагьасде руссинаан ва гьезул мунагьалги чурилаан.

¹³ Цинги гьес абуна: – Унго бичӀчӀичӀебищ нужеда доб мисалалъул магӀна? Гьеб бичӀчӀуларел нужеда цогидал мисалал кинха ричӀчӀилел?

¹⁴ Хьон хьалев чи ккола рагӀи хьалев чи.

¹⁵ Цо-цо чиясул иш ккола нухде рортарал хьодул мугьазда релълъун. Гьесул гӀинда рагӀани Аллагьасул рагӀи, гьебсагӀатго бачӀун илбисалъ бикъун уна гьесул рекӀелъе ккун букӀараб рагӀи.

¹⁶ Гьединго цогидал гӀадамал релълъуна ракьул хъал гурони тӀад гьечӀеб тӀалде рортарал мугьаздасан бижаралда. РагӀини гьездаги рагӀула ва гьебсагӀат рохун къабулги гьабула.

¹⁷ Амма рекӀел гъварилъуда кьалбал гьечӀелъул, гьеб халат хутӀуларо. Къабул гьабураб рагӀи сабаблъун хӀинкъабиги къварилъабиги тӀаде ккараб мехалъ, гьединав чияс къо хӀехьоларо.

¹⁸ Цогидал релълъуна заз-хъарахъалда гъорлъе рортарал мугьаздасан бижаралда.

¹⁹ РагӀини гьездаги рагӀула, амма гьезул рекӀелъе лъугьарал гьаб дуниялалъул тӀалаб-агъазалъ ва бечелъиялдаги тӀагӀам-лазаталдаги хадур хачадиялъ гьеб рагӀи гъоркь къинабула. Гьединазул хӀалухъенги букӀунаро.

²⁰ Амма руго лъикӀаб ракьалде рортарал мугьаздасан бижаралда релълъарал гӀадамалги. РагӀиги гьезда рагӀула, къабулги гьабула. ХӀалухъенги бижула цоязе лъеберго, цогидазе лъабкъого, цо-цоязе нусго нухалъцин цӀикӀкӀараб.

Чирахъалъул хӀакъалъулъ

²¹ Цинги ГӀисаца гьезда абуна: – СахӀида гъоркь яги хьонбакӀалда гъоркь лъезейищ чирахъ бакун рокъобе жанибе босулеб? Борхатаб бакӀалда гурищ гьеб лъолеб?

²² Балъгоябщинабги тӀатунеб, бахчарабщинабги загьирлъулеб.

²³ ГӀундул ругезда рагӀизе биччанте гьеб!

²⁴ Цоги гьес абуна: – Балагьея, гӀинтӀаме гьаб дир калимаялъухъ: кинаб сахӀалъ нужеца борцаниги, гьединабго сахӀалъ борцине буго нужееги, ва нужее тӀадеги жубазе бугеб.

²⁵ Кодолъи бугесе тӀадеги кьезе буго, кодолъи гьечӀесухъа бугебги бахъизе буго.

Ракьулъе рехараб хьодул мугьалъул хӀакъалъулъ

²⁶ Цоги ГӀисаца абуна: – Аллагьасул ПарччахӀлъи релълъуна цо гьадинаб ишалда. Масала, пуланав чияс ракьулъе рехула хьодул мугь.

²⁷ Цинги къаси кьижун, къад вахъун, жиндирго яшавалда вукӀуна гьев, ва гьесда лъаларо кин гьеб мугь тӀирщулебали, тӀаде баккулебали.

²⁸ Ракьалъ жинцаго тӀалаб гьабула мугьалъул: цин гьеб тӀаде баккула, хадуб тӀор бала, тӀоралда мугь цӀубала.

²⁹ Гьале, тӀоралда мугь барщарабго, босун нилъгун вачӀуна гьев лъилъаризе, хур бакӀаризе заман щун бугелъул.

Горчицаялъул мугьалъул хӀакъалъулъ

³⁰ Цоги гьес абуна: – Сунда релълъунеб Аллагьасул ПарччахӀлъи? Яги кинаб мисал бачун гьелъул сипат цебе чӀезабилеб?

³¹ Масала, гьеб релълъуна горчицаялъул хьодул мугьалда. Гьеб буго ракьалде хьалел киналго хьоназда гьоркьоб бищунго гьитӀинаб хьодул мугь.

³² Амма гьеб мугь ракьулъе ккани, гьелдасан лъугьуна бищунго кӀудияб хъарахъ, ва гьелъул чӀахӀиял гӀаркьалабазул рагӀдукь хӀанчӀаз бусабицин гьарула.

³³ Гьедин гӀемерал мисалалги рачун, гьезда бичӀчӀуледухъ бицунаан ГӀисаца Рохалил хабар.

³⁴ Мисал гъорлъ гьечӀеб каламго букӀунароан гӀадамаздехун гьесул. Цинги жалго хутӀараб мехалъ, жиндирго муридазда бичӀчӀизабулаан гьес гьеб киналъулго магӀна.

ГӀисаца гьури къотӀизабула

³⁵ Гьебго къоялъ маркӀачӀул гӀужалъ ГӀисаца муридазда абуна ралъдал доб рахъалде рахине кколилан.

³⁶ Халкъги нахъе битӀун, ГӀисаги вачун, гьел рахана гьев тӀад вукӀараб доб росоде. Цогидал русбиги рукӀана гьезда цадахъ.

³⁷ Кутакаб гьури бахъана: речӀчӀун рачӀарал карачалабаз раса лъадал цӀолеб букӀана.

³⁸ ГӀиса гьебмехалъ, цо къаданибжоги лъун, росол нахъисеб рахъалда кьижун вукӀана. АскӀоре ун, муридаз ворчӀизавуна гьев: – Я, МугӀалим! Нилъ гъанкъизехъин рукӀиналъул ургъелгойищ дуе гьечӀеб? – абун.

³⁹ ТӀаде вахъун гьес гьорода лъазабуна, тӀокӀаб пугейилан, карачалабазеги: «РуцӀцӀун чӀа!» – ян амру гьабуна. ГьебсагӀат гьури къотӀана, тӀубанго сихӀ къотӀун дуниялги хутӀана.

⁴⁰ Цинги ГӀисаца жиндирго муридазда абуна: – КигӀан хӀинкъарал чагӀи нужго! Кибе араб нужер божи-иман?

⁴¹ Гьебмехалъни цӀакъго-цӀакъ хӀинкъана гьел, гьуриги карачалабиги жиндие мутӀигӀав гьавго кинав чийилан цоцазда абулеб букӀана гьез.