Марк 16 - Аллагьасул Калима

16 бетӀер ГӀиса хабалъ ватичӀо

¹ Шамат къо индал, Магдалаялдаса Марямицаги, Якъубил эбел Марямицаги, Саломеялъги бичун босана ГӀисал мусруялда бахине гьуинал махӀазул нах.

² Цинги анкьил тӀоцебесеб къоялъ цудунго рахъун ун, гьел ГӀисал хабаде щолеб мех букӀана гьанжего-гьанже бакъ баккулеб гӀуж.

³ Нохъодул кӀалтӀаса гамачӀ лъицадай нахъе гиризабилаян ургъел бикьулел рукӀана гьел.

⁴ Амма гамачӀ нахъе гиризабун батана. (ЦӀакъ кӀудияб гамачӀни букӀана гьеб.)

⁵ Жанире лъугьиндал, гьезда гьенив кваранаб рахъалда гӀодов чӀун ватана хъахӀаб гӀаба ретӀарав цо гӀолохъанчи. РакӀ гъанцӀун лъугьана гьел.

⁶ – ХӀикмалъуге нуж, – ан абуна гьес руччабазда. – Хъанчида ван хвезавурав Назареталдаса ГӀисайин нужеца валагьулев вугев. Гьев хваралъуса вахъана. Гьев гьанив гьечӀо. Гьале гьесул жаназа лъун букӀараб бакӀ.

⁷ Нужеца, инеги ун, гьесул муридаздаги Пётридаги абе Галилеялде ГӀиса нужедаса цеве щвезе вугилан. ГӀисаца цебеккунго лъазабун букӀараб куцалда, дова вихьилин жидеда гьев.

⁸ Кутакалда хӀинкъарал ва хӀикмалъарал гьел руччаби, сородилаго гьеб нохъодаса къватӀире кӀанцӀун, рекерун нахъе ана, гьелъул хӀакъалъулъ лъиданиги бицинеги кӀвечӀо гьезда.

Магдалаялдаса Марямида вихьула ГӀиса

⁹ Анкьил тӀоцебесеб къоялъ бакъ баккилелдего хваралъуса вахъарав ГӀиса гьебго къоялъ тӀоцеве вихьана анкьго шайтӀан гьес жиндир чорхолъа бачахъун букӀарай Магдалаялдаса Марямида.

¹⁰ Инеги ун, гьелъ ккараб иш бицана цере ГӀисада цадахъ рукӀаразда – гьесда хадуб ракӀ бухӀун гӀодилел рукӀаразда.

¹¹ Амма гьел божичӀо ГӀиса чӀаго вугин ва гьев жинда вихьанин абураб Марямил рагӀиялда.

КӀиго муридасдаги вихьула ГӀиса

¹² Гьелдаса хадуб цоги батӀияб сипаталда ГӀиса вихьана шагьаралдаса росулъе унев вукӀарав кӀиго муридасдаги.

¹³ ТӀад руссун рачӀун цогидаздаги бицана гьез жидедаги ГӀиса вихьанилан, амма цогидал муридал гьездаги божичӀо.

ГӀиса анцӀила цо чапарасдаги вихьула

¹⁴ Ахирги ГӀиса тӀаде вачӀуна анцӀила цо чапар кваналев вукӀараб бакӀалде. Гьес гьезие бадибчӀвай гьабула ракӀ согӀал чагӀи ругин нужилан ва жив чӀаголъун вихьарал гӀадамазда божичӀилан.

¹⁵ ГӀисаца гьезда абуна: – Гьаб дуниялалда киса-кирего щун, тӀолабго Аллагьас бижанщиналда лъазабе нужеца гьаб Рохалил хабар.

¹⁶ Диде иман лъурав ва лъадалъ ччун вахъун жиндир мунагьал чурарав чи хвасарлъизе вуго. Амма иман лъечӀезе тамихӀ букӀина.

¹⁷ Диде иман лъурал ратӀа гьарулел гӀаламатал гьадинал рукӀина: дир цӀаралдалъун гьезда кӀвела жундул рачахъизе ва гьезухъа бажарила батӀи-батӀиял мацӀазда кӀалъазе.

¹⁸ Борхьал кодоре рачаниги, загьру гьекъаниги, тӀириги зарал лъугьинаро гьезие; унтаразда квер хъвани, гьелги сахлъила.

ГӀиса зобалазде восун уна

¹⁹ Гьедин гьезие хабар бицун лъугӀараб мехалъ, ТӀадегӀанав ГӀиса зобалазде восун ана ва Аллагьасул кваранаб рахъалда рещтӀана.

²⁰ Муридалин абуни, гьениса рахъун ана киса-кибего Рохалил хабар лъазабизе. ТӀадегӀанасги квербакъулаан гьезие, ва гьез бицарабщинабги мугӀжизатаздалъун ритӀухълъулаан. Амин!