Марк 15 - Аллагьасул Калима

15 бетӀер ГӀиса Пилатида цеве чӀезавула

¹ Дуниял рогьарабго, чӀахӀиял кашишзабиги, чӀухӀби-хӀакимзабиги, диниял гӀалимзабиги ва тӀолабго тӀадегӀанаб судги данделъун хӀукму тасдикъ гьабуна ва, вухь-вухьун вачун, ГӀиса Пилатихъе кьуна.

² Пилатица ГӀисада гьикъана: – Мунищха кколев жугьутӀазул парччахӀ? ГӀисаца жаваб кьуна: – Дуца абулеб бугоха гьедин.

³ ЧӀахӀиял кашишзабаз гьениб гӀемер батӀи-батӀияб гӀайиб гӀунтӀизабуна ГӀисаде.

⁴ Пилатицайин абуни нахъеги гьикъана ГӀисада: – Дуца жавабго кьолареб кинаб? Дуде гьаз гӀунтӀизабулеб бугебщинаб гӀайиб бихьуларищ?

⁵ Гьел суалазеги ГӀисаца щибго жаваб кьечӀелъул, Пилат гӀажаиблъун-хӀикмалъун хутӀана.

ХӀукму гьабула Барабба виччазе ва ГӀиса хъанчида вазе

⁶ ГӀадат букӀана халкъалъ цӀар чӀварав цо туснахъ Пилатица байрамалъул къоялъ къватӀиве виччалеб.

⁷ Пуланаб питнаялда гӀахьаллъун чи чӀварал гӀадамазда цадахъ гьебго заманалда жанив тӀамун вукӀана Барабба абулев цо чи.

⁸ Кидаго гӀадин жидер мурад тӀубаян гьаризе рахъун ахӀи базе лъугьана гӀадамал, гъун-чӀван Пилатихъе рачӀунаго.

⁹ Пилатица гьезда абуна: – ЖугьутӀазул парччахӀ виччалищ, нужее бокьун батани?

¹⁰ (Пилатида лъалеб букӀиндалха чӀахӀиял кашишзабазул жахӀда-хӀусудалъ хӀал гьабун жиндихъе кьурав чи гьев вукӀин.)

¹¹ Амма чӀахӀиял кашишзабаз халкъ тӀамуна Барабба къватӀиве виччайилан гьаризе.

¹² Гьебмехалъ Пилатица гьезда гьикъана: – ЖугьутӀазул парччахӀилан абурав чиясе дица щиб гьабизеха нужее бокьун бугеб?

¹³ – Хъанчида вазе витӀе! – ян ахӀдана гьебмехалъ гӀадамал.

¹⁴ – Гьас гьабураб квешлъигӀаги щиб? – абун гьикъана Пилатица гьезда. Амма гӀадамал тӀадеги цӀакъ ахӀдезе лъугьана: – Хъанчида вазе витӀе! – ян.

¹⁵ Халкъ рази гьабизе бокьун, Пилатица Барабба къватӀиве виччана. ГӀиса цӀалаца вухеян ва хъанчида ваян амру гьабуна.

БагӀараб гӀабаги зазил хьухьун гьабураб тажги

¹⁶ Рималъул рагъухъабаз ГӀиса вачуна сардарасул претория абулеб кӀалгӀаялъул азбаралъуве. Рагъухъабазул тӀубараб полк бахъинабун букӀана гьенибе.

¹⁷ БецӀбагӀараб ххамил гӀаба ххола ГӀисада тӀад. Зазил хьухьун гьабураб тажги лъола гьесул ботӀрода.

¹⁸ Жидеца ГӀиса кӀодо гьавулев вугев гӀадин: – ЖугьутӀазул парччахӀ чӀахъаги! – ян ахӀдезе лъугьуна гьел.

¹⁹ Цинги гӀонсоца бетӀер бухула ГӀисал, тӀаде тударула, суждаялда чӀун, гьесие бетӀер къулулеб ххвел гьабула.

²⁰ Инжит-хӀакъир гьавун хадуб, доб багӀараб гӀабаги тӀаса бахъун, жиндирго ретӀел ретӀуна гьесда тӀад. Ва хъанчида вазе вачун уна.

ГӀиса хъанчида вала

²¹ Хуриса вуссун вачӀунев данде ккана Киренеялдаса Симон абулев цо чи – Александрилги Руфилги эмен. Гьесда баччизабуна гьез ГӀисае гьабураб хъанч.

²² Цинги ГӀиса вачана Голгота абулеб бакӀалде. Гьелъул магӀна ккола «Гвангвара гохӀ».

²³ Мехтизе гьарулеб гьекъолеб жоялъул цӀун щурун кьуна гьесухъе. Амма ГӀисаца гьеб гьекъечӀо.

²⁴ ГӀиса хъанчида вана, ва лъица щиб босилебали можоро тӀамун, ГӀисал ретӀел жидедаго гьоркьоб бикьизе лъугьана рагъухъаби.

²⁵ Радал сагӀат ичӀго тӀубан букӀана ГӀиса хъанчида вараб мехалъ.

²⁶ Гьесде гӀунтӀизабураб гӀайиб рехсараб хъвай-хъвагӀайги гьабун букӀана хъанчида, «ЖугьутӀазул парччахӀ» абун.

²⁷ КӀиго хъачагъги вукӀана гьесда цадахъ хъанчида ван: цояв кваранаб рахъалда, цояв квегӀаб рахъалда.

^28-29 Цересан унел гӀадамаз, гьев хӀакъир гьавун, абулеб букӀана бутӀрулги хьвагӀулаго: – Ле, щущазабун Мукъадасаб Рукъгун, лъабго къоялде гьеб цӀидасан балев багьадур!

³⁰ Мунго хвасар гьаве! Хъанчидаса гӀодове рещтӀа!

³¹ Гьебго къагӀидаялда гьев хӀакъир гьавун, цоцазда гаргадулел рукӀана чӀахӀиял кашишзабиги диниял гӀалимзабиги: – Цогидал хвасар гьарилилан вукӀанин, живго хвасар гьавун бажаруларев чи!

³² Исраилил умматалъул парччахӀ – МасихӀ гьев ватани, рещтӀа абе гьанже нилъеда вихьизе хъанчидаса гъоркье, гьебмехалъ божила нилъ гьесда. Гьесда цадахъ хъанчида рарал хъачагъалгицин рукӀана ГӀисаде хьанделел.

ГӀисал рухӀ босун уна

³³ Къалъул гӀужалда сверухъе тӀолабго дуниял бецӀлъана. Гьеб бецӀлъи тӀаса инчӀо сагӀат лъабго тӀубазегӀан.

³⁴ СагӀат лъабго тӀубараб мехалъ, цо гучаб гьаракьги гьабун, ГӀисаца ахӀана: – Элои, Элои! Лема шевактани! – абун. (Гьелъул магӀна букӀана: «Дир Аллагь! Дир Аллагь! Щай дуца дун рехун тарав?»)

³⁵ Гьенир рукӀарал цо-цояз, гьеб рагӀараб мехалъ, абулеб букӀана: «ГӀенекке, Иляс аварагасде ахӀи балеб буго!» – ян.

³⁶ Гьебмехалъ векерун ун гьезул цояс, цӀекӀаб чагъиралдаги ччун, чӀорто босун бачӀана, гӀорол тӀогьибги бухьун, гьесухъе бегьана. Гьев чияс абулеб букӀана: – ЧӀа, гьанже бихьилин хъанчидаса гьев вахъизе Иляс авараг вачӀунищали.

³⁷ Цоги гучаб гьаракь гьабуна ГӀисаца. Ва гьесул рухӀ босун ана.

³⁸ Мукъадасаб Рукъалъул хирияб бакӀалда бигъун букӀараб пардав тӀарадаса ахаде щвезегӀан кӀихӀи бихъун ана гьебмехалъ.

³⁹ Рагъухъабазул нусилбетӀер вукӀана ГӀисал хъанчида дандвитӀун эхетун. Гьедин ГӀисал рухӀ босараб куц бихьидал, гьес абуна: – ХӀакъикъаталдаги гьав чи Аллагьасул Вас вукӀун вуго.

⁴⁰ Гьенир нахъегӀан чӀун ралагьун руччабиги рукӀана. Гьезда гьоркьор рукӀана Магдалаялдаса Марямги, гьитӀинав Якъубил ва Юсупил эбел Марямги, Саломеяги.

⁴¹ Гьел рукӀана ГӀиса Галилеялда вугеб мехалъго гьесда хадур рачӀун, гьесие хъулухъалъе чӀарал руччаби. Гьел гурелги, гьесда цадахъ Иерусалималде рачӀарал цогидал руччабиги гӀезегӀан рукӀана гьенир.

ГӀиса хабалъ вукъула

^42-43 Гьеб букӀана рузман къо. Шаматалда цебесеб къо букӀиндал, бакъ щинкӀилалдего вачӀун тӀаде щвана тӀадегӀанаб судалда гьоркьов гӀахьаллъулев ва халкъалда жаниб жиндир къадру-къимат бугев Ариматеялдаса Юсуп абулев чи. (Аллагьасул ПарччахӀлъиялде хьул лъурав чи вукӀана гьев.) Гьев хӀинкъичӀого Пилатихъе ана ГӀисал жаназа кьеян гьаризе.

⁴⁴ ГӀиса хванилан рагӀидал, гӀажаиблъун хутӀана Пилат. Дол рагъухъабазул нусилбетӀерги ахӀун, гьесда гьикъана цевегойищ хваравилан.

⁴⁵ Гьев нусилбетӀерасдасан ГӀисал хвалил хӀакъикъат лъарабго, Пилатица изну кьуна гьесул жаназа нахъе босизе.

⁴⁶ Бичун босун бацӀцӀадаб хӀебетгун, Юсупица ГӀисал жаназа хъанчидаса бахъана ва, хӀебтил мусруги бан, гьеб букъана кьурулъ бикӀун къачӀан букӀараб нохъодул хабалъ. Нохъодул кӀалтӀе цо кӀудияб гамачӀги гиризабун тана.

⁴⁷ Магдалаялдаса Марямги Юсупил эбел Марямги рукӀана ГӀиса хабалъ лъолеб бакӀалъухъ ралагьун.