Марк 13 - Аллагьасул Калима

13 бетӀер Дуниялалда ккезе бугелъул хӀакъалъулъ Мукъадасаб Рукъ щущазабизе буго

¹ ГӀиса Мукъадасаб Рокъоса къватӀиве лъугьиндал, гьесул цо муридас гьесда абуна: – Я МугӀалим! Гьал къадазулъ лъурал ганчӀазул чӀахӀалъи, гьаб минаялъул кӀодолъи!

² Гьесие жавабалъе ГӀисаца абуна: – Гьаб кӀудияб кӀалгӀа бихьулагури дуда? ГанчӀида лъураб цониги гамачӀ хутӀиларо гьаниб кӀалагъоркье чӀвачӀого.

Балагьал гӀемерлъизе руго

³ Мукъадасаб Рукъалда дандбитӀухъе, Зайтуналъул магӀарда гӀодов чӀун ГӀиса вугеб мехалъ, батӀаго гьесда аскӀоре рачӀун, Пётрицаги, Якъубицаги, Иоанницаги, Андрейицаги гьарана:

⁴ – Гьаб дуца абулеб бугебщинаб иш кида лъугьине бугебали ва гьеб лъугьинехъин букӀиналъе кинаб гӀаламат загьирлъизе бугебалиги бице нижеда.

⁵ Гьезие жаваб гьабун, ГӀисаца байбихьана: – Воре, цо лъицаниги къосинаризе гурин нуж!

⁶ Чанги вукӀине вугелъулха, жив дун вугилан абун вачӀунев чи. Чангиял гьез къосинаризеги руго.

⁷ Рагъал ккун ругилан ва ккезехъинги ругилан рагӀани, гьелдаса нуж хӀинкъуге. Гьеб цебеккунго лъугьине ккола, ва гьеб жеги ахирзаман гуро.

⁸ Цо халкъ цоги халкъалде, цо ханлъи цоги ханлъиялде тӀаде кӀанцӀила. БакӀ-бакӀалда ракь багъарила, ракъи баккила. Гьеб ккола лъимер гьабизе хӀара чӀваялъул гӀадинаб унтиялъул байбихьи.

⁹ Нужеца нужеего гӀамал гьабе: щаян абуни, дун сабаблъун нуж судалде ахӀила, синагогабазухъе рачун рухила, наибзабазда ва парччахӀзабазда цере чӀезарила, дир муридал ругилан нугӀлъи гьабизе.

¹⁰ Амма ахирзаман тӀаде щвелалде киналго халкъазда Рохалил хабар лъазабун букӀина.

¹¹ Судалда цере чӀезе нуж рачараб мехалъ, щибдай бицинаян цебеккунго ургъел ккоге нужеда. ГьебсагӀат нужерго рекӀелъе рещтӀараб жо абун биччай. Щайгурелъул нуж гуро гьебмехалъ кӀалъазе ругел, нужер рекӀелъе рещтӀараб Илагьияб РухӀин кӀалъазе бугеб.

¹² Вацас вац кьезе вуго чӀвазе, инсуца вас кьезе вуго. Жидерго эбел-инсуда данде рахъун, лъималаз гьелги кьезе руго чӀвазе.

¹³ Дун сабаблъун киналго гӀадамазда рихина нуж. Амма ахиралде щвезегӀан сабру гӀурав чи хвасарлъила.

¹⁴ БукӀинего бегьулареб бакӀалда чӀунтелалъул къабихӀлъи бихьила нужеда, – цӀалулесда лъалин гьелъул магӀна, – гьебмехалъ мугӀрузде лъута абе Ягьудиялда ругелал.

¹⁵ Гьеб къоялъ тӀохда вугев гъоркье рещтӀунгеян абе, къваригӀараб-тараб босизе рокъове жаниве лъугьунгеян абе.

¹⁶ Хурив вугевги жиндирго ретӀел босизе нахъвуссунгеян абе.

¹⁷ Вай, къинал руччабазе ва каранда хахулел лъимал ругел улбузе букӀинаха дол къояз кӀудияб къварилъи-гӀазаб!

¹⁸ Хасало лъутизе ккогегиян гьари-дугӀа гьабулел рукӀа нуж.

¹⁹ Щаян абуни, гьебмехалъ рещтӀине буго Аллагьас дуниял бижаралдаса гьанжелъагӀан букӀинчӀеб ва хадубккун букӀине къотӀиги гьечӀеб гӀадинаб балагь.

²⁰ Гьел къоял къокълъизаризе БетӀергьанасул къадар букӀинчӀебани, цониги рижи хвасарлъизе букӀинчӀо. Амма жинцаго тӀаса рищарал гӀадамазе гӀоло гьел къоял къокъ гьаризе хӀукму буго гьесул.

²¹ Гьебмехалъ нужеда лъицаниги абуни МасихӀ гьале гьанив вугилан, яги дова вугилан, – воре, нуж гьелда божуге.

²² Щаян абуни, гӀемер рукӀине руго гьебмехалъ гьересимасихӀалги гьересиаварагзабиги. Бажарани, хӀатта тӀаса рищарал муъминзабигицин къосинаризе бокьун, чанги гӀаламатал ва мугӀжизатал рихьизарила гьез.

²³ Воре, нуж цӀодорго чӀа; гьале дица цебеккунго лъазабун толеб буго нужеда!

ГӀадамил Лъимер кӀиабизеги вачӀине вуго

²⁴ Дол къоязда, гьеб гӀакъуба-къварилъиялдаса хадуб, бакъул нур тӀагӀун ина, ва моцӀрол канлъиги ссун ина.

²⁵ ЦӀваби зодиса гӀодоре гъенон рачӀина, ва къвакӀарал зобалги гьаргьадила.

²⁶ Ва гьебмехалда вихьила накӀкӀазда гьоркьосан бергьараб къудраталда ва кӀодолъиялда ГӀадамил Лъимер вачӀунев.

²⁷ Зоб-ракьалъул цо рагӀалдаса цоги рагӀалде щвезегӀан ункъабго рахъалдаса жинцаго тӀаса бищараб агьлу данде бакӀаризе жиндирго малаикзабиги ритӀила гьес.

Инжиралъул гъотӀол мисал

²⁸ Нужеца мисалалъе босе инжиралъул гъветӀ. Гьелъул гӀаркьалабазда гӀекӀ базе ва тӀамах бижизе байбихьараб мехалъ нужеда лъала рии тӀаде щолеб бугеблъи.

²⁹ Гьелдаго релълъун, гьал дица рицарал гӀаламатал загьирлъараб мехалъ, нужеда лъала гьеб нуцӀикӀалтӀе щун бугеблъи.

³⁰ ХӀакълъун абулеб буго дица нужеда: дуниялалда гьаб наслу букӀаго лъугьине буго гьеб кинабго.

³¹ Зобалги ракьалги тӀагӀаниги, дир рагӀаби нахъе хутӀизе руго.

³² Амма цониги инсанасда лъаларо гьеб къо, гьеб сагӀат кида тӀаде щвезе бугебали. Я зобалазул малаикзабазда лъаларо, я Васасда лъаларо, гьеб лъала цохӀо Инсуда.

«Воре, нуж рорчӀуда чӀа!»

³³ Воре, нуж рорчӀуда чӀа, кида бачӀунебали лъаларелъул гьеб заман.

³⁴ Масала, пуланав чи сапаралъ унев вугони, гьес щивасе хӀалтӀи бикьун рукъалъул иш рагьтӀателазда тӀадкъан тола ва кавудул кӀалтӀа вугев хъаравуласдаги абун тола ворчӀуда чӀайилан.

³⁵ Гьедин нужги рорчӀуда чӀа! Нужеда лъаларелъул рукъалъул бетӀергьан кида тӀадвуссун вачӀиневали: маркӀачӀумехалъищ, яги сордо бащалъараб мехалъищ, яги радакье хӀелеко бахъараб мехалъищ, яги рогьа-роцӀараб мехалъищали.

³⁶ Гурони, тохлъукье тӀаде рехун гьев вачӀараб мехалъ, кьижун ратила гьесда нуж!

³⁷ Нужеда гуребги, цогидаздаги абулеб буго дица: воре, нуж рорчӀуда чӀа!