Марк 12 - Аллагьасул Калима

12 бетӀер ЦӀолбол ах ижараялъе кьун тарасул хӀакъалъулъ

¹ Мисал бачун, гьезие гьадинаб хабар бицине байбихьана ГӀисаца: – Цо чияс, цӀолбол ахги гьабун, сверун чали къан буго, чагъир жаниб цӀцӀуйзе чаналъе гвендги бухъун буго, хъаравуласе борхатаб хъощги бан буго. Цинги ахихъабазухъе ижараялъе гьеб ахги кьун, гьев къватӀиве ун вуго.

² ЦӀибил барщараб мехалъ, гьес дол ижарачагӀазухъе цо рагьтӀател витӀун вуго жиндие кколеб бутӀа босизе.

³ Доз кквезеги ккун гьев рагьтӀател вухун вуго ва чӀового нахъе хъамун вуго.

⁴ Гьанже ахил бетӀергьанас цоги рагьтӀател витӀун вуго. Гьесулги бетӀер лъукъун буго, инжит-хӀакъир гьавун вуго.

⁵ Нахъеги витӀун вуго цоги батӀияв. Гьевги доз чӀван рехун вуго. ГӀемерал цогидалги ритӀун руго. Гьелги доз цоял рухун, цогидал чӀван руго.

⁶ Цинги гьесул хутӀун вуго гьениве витӀизе цохӀо чи – гьесие вокьулев вас. Ахирги гьев витӀун вуго ахил бетӀергьанас, жиндир васасулгӀаги хӀурмат гьабилародайилан абун.

⁷ Амма ижарачагӀаз цоцазда абун буго: «Гьале гурищ ирсилав. РачӀа гьав чӀвазе, – ирсги нилъеего хутӀила».

⁸ Кквезеги ккун, чӀвала гьез гьев, гьесул жаназаги ахикьа къватӀибе рехула.

⁹ Гьанже щиб гьабилеб дов ахил бетӀергьанас? ВачӀинеги вачӀун, чӀвала гьес гьел, ахги цогидазухъе ижараялъе кьела.

¹⁰ Унго нужеца киданиги ТӀехьалда цӀалунгойищ букӀинчӀеб гьадинаб калима: «Къадалъ лъезецин ярагьунарилан къадахъабаз нахъе рехараб гамачӀ битӀахъе цололъ лъун буго.

¹¹ Гьединаб букӀун буго БетӀергьанасул хӀукму. Нилъер берда цебе лъугьараб кӀудияб мугӀжизат буго гьеб!»

¹² Гьеб мисал жидер рахъалъ бачараб букӀин бичӀчӀана чӀахӀиял кашишзабазда. ГӀиса кквезе хӀаракат бахъулеб букӀана гьез. Амма халкъалъукьа хӀинкъун тезе ккана. Живго гьевги тун, нахъе ана гьел.

ГӀисае кьолел суалалги гьесул жавабалги Къайсарасе магъало кьеялъул хӀакъалъулъ

¹³ Цинги гьез цо-цо фарисеялги гьеродилалги ритӀула ГӀисахъе, гьесул кӀал таризабизе кӀоларищали бихьизе.

¹⁴ РачӀун гьез ГӀисада абула: – Я МугӀалим! Нижеда лъала мун ритӀухъав чи вукӀин. Лъилниги мурад цӀунун, гьесие хӀелиги дур пикруялда рекъоларо. Чи вихьун иш гьабулеб гӀамалги дур гьечӀо. Аллагьасул хӀакъаб нух буго дур малъиги. Бице нижеда: къануналда рекъон, бегьулебищ къайсарасе магъало кьезе яги бегьуларебищ? Гьа, кьелебищ гьеб нижеца яги кьеларебищ?

¹⁵ Гьезул хӀилла-рекӀкӀги бичӀчӀун, ГӀисаца абуна: – Щай нужеца дир хӀалал рихьулел? Бихье, цо динар босе гьанибе дихъе.

¹⁶ Гьез гьеб босун бачӀуна. Гьебмехалъ ГӀисаца гьикъула: – Лъил суратги хъвай-хъвагӀайги гьалда бугеб? Къайсарасул бугилан абуна гьез.

¹⁷ – Къайсарасулаб къайсарасе кье, Аллагьасулаб Аллагьасе кье, – ян абуна ГӀисаца гьезда. Гьесул жавабалъ хӀикмалъизаруна гьел.

Хварал тӀаде рахъинариялъул хӀакъалъулъ

¹⁸ Цинги ГӀисахъе рачӀана къиямасеб къоялъ хварал тӀаде рахъине рукӀиналде инкар ккун чӀарал саддукеял абулел гӀадамал. Гьез ГӀисада абуна:

¹⁹ – Я МугӀалим! Мусаца нилъее бихьизабун буго: «Цо пуланав чиясул вац хвани, гьесдасан лъимерги нахъе хутӀичӀони, гьесул вацас яче абе жиндирго хварав вацасул лъади, дов хварав вацасул наслу къинчӀого букӀине».

²⁰ Масала, анкьго вац вукӀун вуго. ЧӀужу ячун хадув, лъимерги нахъе хутӀичӀого, хун вуго кӀудияв вац.

²¹ Цинги гьей ячун йиго хадусев вацас, амма лъимер лъугьиналдего, гьевги хун вуго. Гьебго жо лъугьун буго лъабабилев вацасулги.

²² Гьедин анкьавго вацас ячун йиго гьей, ва цонигиясе лъимерги лъугьун гьечӀо. Ахиралда жийгоги хун йиго.

²³ ХӀасил, гьей анкьго росасул лъадилъун йикӀарай гӀадан къиямасеб къоялъ лъил чӀужулъун йикӀине йигей?

²⁴ Гьезие жавабалъе ГӀисаца абуна: – ТӀухьдузда бугеб лъангутӀиялъ, яги Аллагьасул къудраталда божунгутӀиялъцин гурищ нуж къосинарун ругел?

²⁵ Къиямасеб къоялъ тӀаде рахъаразда гьоркьор я лъудби, я росал рукӀине гьечӀо, зобалазда ругел малаикзабазул гӀадинаб гӀумру букӀине буго доба гьезулги.

²⁶ Хварал тӀаде рахъине рукӀиналъул хӀакъалъулъ цӀаличӀебищ нужеца Муса аварагасул хӀакъалъулъ бицараб тӀехьалда? ЦӀа рекӀун бугониги, бухӀунго лъугӀулареб хъарахъалда аскӀоб Аллагьас гьесда абурабила: «Дун вуго Ибрагьимил Аллагь, ИсхӀакъил Аллагь, Якъубил Аллагь».

²⁷ Аллагь – гьев хваразул Аллагь гуро, чӀагоязул Аллагь вуго. Кутакалда къосун руго нуж!

Бищунго аслияб амруялъул хӀакъалъулъ

²⁸ Гьезул бахӀсалъухъ гӀенеккун вукӀарав ва ГӀисаца кьураб камилаб жаваб рагӀарав цо динияв гӀалимчияс, аскӀове вачӀун, гьесда гьикъана: – Къануналда бищунго аслияб амру щиб кколеб? – абун.

²⁹ ГӀисаца гьесие жаваб кьуна: – Бищунго аслияблъун ккола гьадинаб: «ГӀенекке, Исраилил уммат! Нилъер БетӀергьан Аллагь цохӀо вугев БетӀергьан вуго!

³⁰ Дурго БетӀергьан Аллагь дуе вокьа дур тӀолабго ракӀалдалъун, дур тӀолабго рухӀалдалъун, дур тӀолабго гӀакълу-пикруялдалъун, дур тӀолабго къуват-жаналдалъун».

³¹ КӀиабилебги: «Мунго гӀадин вокьа дуе дуда аскӀов вугевги». Гьеб кӀиялдасаго тӀадегӀанаб амру гьечӀо.

³² Динияв гӀалимчияс абуна: – ЛъикӀ буго, МугӀалим! ХӀакъаб рагӀи абуна дуца, Аллагь цо вугилан ва Аллагь тун батӀияв цоги бетӀергьанги гьечӀилан.

³³ Жиндир тӀолабго ракӀалдалъун, тӀолабго гӀакълу-пикруялдалъун, тӀолабго къуват-жаналдалъун Аллагь вокьулев вугони ва жинда аскӀов вугевги вокьулев вугони, инсанасе гьеб цӀикӀкӀине буго гьесул киналго батӀи-батӀиял къурбаназдаса.

³⁴ Гьесул гӀакъилаб калам рагӀараб мехалъ, ГӀисаца гьесда абуна: – Аллагьасул ПарччахӀлъиялдаса мун рикӀкӀад гьечӀевин. Гьелдаса хадуб тӀокӀаб лъилниги бахӀарчилъи гӀечӀо ГӀисада щибниги гьикъизе.

«Давудил вас гуро МасихӀ»

³⁵ Хадубги Мукъадасаб Рокъоб вагӀза гьабулаго, ГӀисаца абуна: – Диниял гӀалимзабаз щай абулеб МасихӀ Давудил вас вугилан.

³⁶ Илагьияб РухӀалъ малъун Давудица жинцаго гурищ абулеб бугеб: «ТӀадегӀанав Аллагьас дир БетӀергьанасда абуна: „Дир кваранаб рахъалда гӀодов вукӀа, дица дур тушбаби дур хӀатӀазда цере чӀезаризегӀан“».

³⁷ Гьедин Давудица жинцаго МасихӀиде жиндир БетӀергьанилан абулеб бугони, Давудил вас кин гьев кколев? ГӀемераб халкъ букӀана ГӀисал гьединал вагӀзабазухъ гъира-цӀаялда гӀенеккун.

«Диниял гӀалимзабаздаса цӀунун чӀа нуж!»

³⁸ ГӀисаца гӀадамазда малъулаан: – Воре, гьал диниял гӀалимзабаздаса цӀунун чӀа нуж. Гьезие бокьула халатал гӀабабиги ретӀун хьвадизе, базаркъотӀноб халкъалъ жидеего салам кьезе,

³⁹ синагогабазда жанир киназдасаго церегӀан гӀодор чӀезе ва гьоболлъухъ кванил тӀотӀода нахъа бищунго хӀурматияб бакӀ кквезе.

⁴⁰ Рос хун хутӀарал къоролзабазул боцӀи-рикъзиги кванала гьез, рихьдаего халатал дугӀаби гьарула. Гьеб кинабго цӀикӀкӀун гьабунагӀан, гӀасияб букӀине буго гьезие тамихӀ.

Къоролалъул садакъаялъул хӀакъалъулъ

⁴¹ Мукъадасаб Рокъоб садакъаде гӀарац лъолеб бакӀалда дандвитӀун гӀодовги чӀун, ГӀиса валагьун вукӀана гьенибе гӀарац рехулел гӀадамазухъ. Чанги бечедал гӀадамаз гӀемераб гӀарац рехулеб бугоан гьенибе.

⁴² ЯчӀун цо мискинай къоролалъ рехана бащдаб капекалъул багьаяб кӀиго пахьул гӀарац.

⁴³ Жиндирго муридалги аскӀоре ахӀун, ГӀисаца гьезда абуна: – ХӀакълъун абулеб буго дица нужеда: гьанибе садакъаде гӀарац рехаразул бицани, гьадай мискинай къоролалъ бищунго цӀикӀкӀунин кьураб.

⁴⁴ Цогидаз садакъа гьабуна жидерго боцӀи-рикъзи тӀокӀлъун, долъин абуни жиндиего хӀажат букӀаниги, садакъаде кьуна жиндирго бетӀербахъиялъе хутӀун букӀарабщинаб.