Лука 9 - Аллагьасул Калима

9 бетӀер ГӀисаца чапарзаби халкъалъухъе ритӀула

¹ АнцӀила кӀиявго чапарги ахӀун, унта-щокъалги жундуз ккуралги сахлъизаризе къуватги ихтиярги кьуна гьезие ГӀисаца.

² Цинги гьел чапарзаби ритӀана Аллагьасул ПарччахӀлъиялъул хӀакъалъулъ лъазабизе ва гӀадамал сахлъизаризе.

³ Гьес гьезда абуна: – Я гӀанса, я таргьа-къвачӀа, я квен-тӀех, я гӀарац-месед, я хисизе ретӀел – щибниги босуге нужеца цадахъ.

⁴ Цо лъилниги рокъоре лъугьани, гьеб ракьалдаса нахъе инегӀан, гьенир чӀа.

⁵ Ваамма нуж къабул гьаричӀони, гьеб шагьаралдаса къватӀире рахъунаго, нужерго хьитаздаса хӀурги кӀутӀун те. Аллагьасда цебе гьез жаваб кьезе букӀине хутӀа абе гьеб.

⁶ Рахъун гьел росабалъа росабалъе ана, Рохалил хабар бицунаго ва киса-кирго унтаралги сахлъизарулаго.

Гьерод щакдарулев вуго щивдай гьев ГӀисайилан

⁷ Гьерод ханасдаги рагӀана ГӀисал гьел киналго ишазул хӀакъалъулъ, ва гьев малъкъосун хутӀана. Цо-цо гӀадамаз абулеб букӀиндалха хваралъуса вахъун ЯхӀя вачӀун вугилан.

⁸ Цогидаз абулеб букӀана Иляс авараг вачӀун вугилан, цо-цояцайин абуни, цебе заманаялъул аварагзабазул цояв чӀаголъун вугилан хабар биччан букӀана.

⁹ Гьеродицани абулеб букӀана: – ЯхӀял дица бетӀер къотӀана; жиндир хӀакъалъулъ дида гьадинал харбал рагӀулел ругев чи щивха кколев? Гьев вихьизе гъира букӀана Гьеродил.

ГӀисаца щуазарго чи гӀорцӀизавула

¹⁰ ТӀадруссун рачӀун чапарзабаз ГӀисада бицана жидецаго гьабура-таралъул хӀакъалъулъ. Цинги, цохӀо гьелги рачун, гьев ана Байтсаида абулеб шагьаралде.

¹¹ Амма, гӀадамазда лъан, гьелги гьесда хадур ана. Гьес гьел тӀаде къабул гьаруна. Гьезие Аллагьасул ПарччахӀлъиялъул хӀакъалъулъ бицана ва гьесул кумекалде хӀажалъарал сахлъизеги гьаруна.

¹² Гьале маркӀачӀумех щолеб букӀана. АскӀове вачӀун анцӀила кӀиявго чапарас гьесда абуна: – Сордо базеги жидеего квание гӀамал гьабизеги гӀагардаса гӀебеде ругел росабалъе ва кулабазде айилан абе гьал гӀадамазда, гӀадан-чиго гьечӀеб бакӀ бугин гьаб.

¹³ ГӀисаца гьезда абуна: – Нужеца кваназаре гьел. Гьез абула: – Щуго чедги кӀиго ччугӀаги гурони гьечӀо нижехъ, гьел киназего гӀураб кваназе жо босизе ани гурони.

¹⁴ (Гьенив вукӀана щуазаргогӀанасев бихьинчи.) Жиндирго чапарзабазда гьес абуна: – Нужеца гьел, гӀага-шагарго кӀикъоялда анцӀ-анцӀ чи кколедухъ, кьера-кьерал гьарун чӀезаре, – ян.

¹⁵ Гьес абухъе гӀодор чӀезаруна гьез гьел киналго.

¹⁶ ГӀисаца щуябго чедги кӀиябго ччугӀаги кодобе босана, зобалаздехун вуссун кванде дугӀа гьабуна ва бек-бекун муридазухъе кьуна халкъалъе бикьейилан.

¹⁷ Киналго гӀорцӀизегӀан кванана, анцӀила кӀиго гьегь цӀураб нахъегицин хутӀана.

Пётрица иман лъуна ГӀиса МасихӀ вукӀиналде

¹⁸ Цо нухалъ ГӀиса живго цохӀо вукӀана Аллагьасда гьарделев. Муридалги рукӀана гьесда цадахъ. Гьес гьезда гьикъана: – Щивлъун дун гӀадамаз рикӀкӀунев? – абун.

¹⁹ Гьез жаваб кьуна: – Цояз мун ЯхӀя авараг вугилан абулеб буго, цогидаз абулеб буго Иляс авараг вугилан, цо-цояз абулеб буго цебе заманаялъул аварагзабазул цояв вугин хваралъуса вахъун вачӀунилан.

²⁰ Гьес гьезда гьикъана: – Нужеца щивлъунха дун рикӀкӀунев? – абун. – Мун Аллагьасул МасихӀ вуго, – ян жаваб кьуна Пётрица.

²¹ Гьес гьезда кьварун лъазабуна лъиданиги гьелъул хӀакъалъулъ бицунгейилан.

ГӀисае букӀине бугеб гӀазаб-гӀакъуба

²² ГӀисаца бицана ГӀадамил Лъимаца гӀемераб гӀазаб-гӀакъуба хӀехьезе ккезе бугин, чӀухӀби-хӀакимзабазги, чӀахӀиял кашишзабазги, диниял гӀалимзабазги гьесдаса инкар гьабизе бугин, чӀвазе вугин ва лъабабилеб къоялъ Аллагьас чӀаголъизавизеги вугин.

²³ Цинги гьес киназдаго абуна: – Дида цадахъ вилълъине бокьарав чи ватани, гьес жиндирго напсалдаса инкар гьабе, жиндаго тӀаде ккараб хъанчил гӀазабги щибаб къоялъ бачче ва дида хадув вачӀа.

²⁴ Щаян абуни, жиндирго гӀумру цӀунизе бокьулев чи гьелдаса махӀрумлъила, дие гӀоло гӀумруялдаса махӀрумлъизе разилъарас гьеб хвасар гьабила.

²⁵ Живго рецӀалие кьун яги тӀагӀун хадуб, тӀолабго дуниялалъул кверщел хъатикье щвеялъул щиб пайда бугеб инсанасе?

²⁶ Дунги дир рагӀабиги сан гьаричӀев чи ГӀадамил Лъимацаги сан гьавизе гьечӀо, жиндиргоги, Инсулги, мукъадасал малаикзабазулги нуралъ гвангъун гьев вачӀунеб мехалъ.

²⁷ ХӀакълъун абулеб буго дица нужеда: Аллагьасул ПарччахӀлъи бихьичӀого жидеца хвалил лълъар гьекъезе гьечӀел гӀадамалги ругелха гьанир эхетаразда гьоркьор.

ГӀиса хиса-басун лъугьуна

²⁸ Гьес гьедин абуралдаса микьгогӀанасеб къо индал, Пётрги, Иоаннги, Якъубги цадахъ рачун, Аллагьасе гьари-дугӀаялъе магӀарде вахана ГӀиса.

²⁹ Гьари-дугӀаялда ГӀиса вукӀаго, гьесул гьурмал куц хисана, ретӀелги хъахӀлъана, кенчӀезе лъугьана.

³⁰ Гьале кӀиго чи ГӀисада гаргадула. Гьел рукӀана Мусаги Илясги.

³¹ ТӀад нур чӀун букӀана ГӀисадаги гьездаги. Гьез бицунеб букӀана Иерусалималда цӀезабизе бугин ГӀисал къадаралъул лълъар.

³² Ригьунаредухъ кьижун рукӀана Пётрги цадахъ ругелги. Ригьараб мехалъ гьезда бихьана ГӀисада тӀад чӀараб нур, кӀиго чиги вугоан аскӀов эхетун.

³³ Гьев кӀиявго чи ГӀисада аскӀоса нахъе унеб мехалъ, Пётрица гьесда абуна: – Я, НасихӀатчи! ЛъикӀ буго гьаниб нилъее. РачӀа лъабго хъощ базин: цо дуе, цо Мусае, цо Илясие. (Гьедин абуна Пётрица щиб абилебали лъаларого хутӀидал.)

³⁴ Гьев кӀалъан вахъиналдего, цо хъахӀаб накӀкӀул парча бачӀун рахчизаруна гьел, ва, гьеб накӀкӀукье ккедал, хӀинкъана муридал.

³⁵ Цинги накӀкӀуда гьоркьосан бахъана цо гьаракь: – Гьав ккола дица витӀизе тӀаса вищарав дир Вас. Гьасухъ гӀенекке нуж!

³⁶ Гьеб гьаракь къотӀараб мехалъ, ГӀиса нахъеги живго хутӀун вугоан. Муридаз гьеб балъго гьабуна ва жидедаго бихьаралъул хӀакъалъулъ доб мехалъ лъиданиги бицинчӀо.

ГӀисаца сахлъизавула жундуз ккурав цо вас

³⁷ Нахъисеб къоялъ, магӀардаса гъоркье рещтӀиндал, ГӀисада данде гӀемераб халкъ бачӀана.

³⁸ Гьале халкъалъул руккелалда гьоркьосан цо чияс ахӀана: – Я, МугӀалим! Дир цохӀо вугев васасухъ валагьеян гьарула дица дуда.

³⁹ Женалъ ккола гьев ва тохлъукьего чӀчӀичӀчӀидизе лъугьуна, цинги, кӀалдиб полопги бан, тӀеркӀезавула. ГӀемераб гӀазаб-гӀакъуба кьун хадув гурони виччан толаро.

⁴⁰ Дур муридазда гьарана дица гьеб жен бачахъеян, амма гьезухъа бажаричӀо.

⁴¹ ГӀисаца абуна: – ГӀай, нуж иман гьечӀеб ва пасатаб уммат! КидалъагӀан дун нужеда цадахъ вукӀинев ва кидалъагӀан нуж хӀехьезе кколел? Ваче гьаниве дурго вас.

⁴² Вачун вачӀунаго, жен васасде тӀаделъана, тӀамун гӀодовгун, тӀеркӀезавуна. Амма ГӀисаца гьеб хъубаб жен чӀезабуна ва сахлъизавун васги инсухъе кьуна.

⁴³ Киналго хӀикмалъун хутӀана, Аллагьасул хӀалкӀолъи бихьуларищан. Кинабго халкъ ГӀисал мугӀжизаталъ гӀажаиблъизабун бугеб мехалъ, жиндирго муридазда гьес абуна:

ГӀисаца нахъеги бицуна жиндиего ккезе бугелъул

⁴⁴ – Гьал дир рагӀаби гӀинзунир лъе нужеца: ГӀадамил Лъимер кьезе вуго гӀадамазда кодове.

⁴⁵ Амма гьезда бичӀчӀичӀо гьел рагӀабазул магӀна. БичӀчӀичӀого букӀинелъун, гьездаса бахчун букӀана гьеб. Гьелъул хӀакъалъулъ гьикъизеги хӀинкъана гьел.

«Бищун кӀудияв щив?»

⁴⁶ Гьезул дагӀба ккана жидеда гъорлъ щивдай бищунго кӀудиявлъун вугевилан.

⁴⁷ Гьезул рекӀелъ бугеб пикруги бичӀчӀун, кодобе босун, жиндаго аскӀоб лъуна ГӀисаца цо лъимер.

⁴⁸ Гьес гьезда абуна: – Цо гьадинаб лъимер лъицаниги, дие гӀоло, къабул гьабуни, гьеб бащалъизе буго дун къабул гьавиялда. Дун лъицаниги къабул гьавуни, гьеб бащалъизе буго дун нужехъе витӀарав Аллагьги къабул гьавиялда. Гьединлъидал нужеда гъорлъги бищунго гьитӀинав ккола бищунго кӀудиявлъун.

«Нужеда дандечӀоларев чи ккола нужер рахъалда вугев чи»

⁴⁹ Гьебмехалъ Иоанница абуна: – Я, НасихӀатчи! Нижеда ватана цо чи дур цӀаралдалъун жундул рачахъулев. Нилъеда нахъвилълъунев гьечӀелъул, нижеца гьукъана досие гьеб иш гьабизе.

⁵⁰ ГӀисаца гьесда абуна: – Гьукъуге гьесие гьеб. Нужеда дандечӀоларев чи ккола нужер рахъалда вугев чи.

Самариялъул цо росдаца ГӀисае гьоболлъи гьабичӀо

⁵¹ Зобалазде живго вачунеб заман гӀагарлъидал, Иерусалималде ине таваккал тӀамуна ГӀисаца.

⁵² Жиндасаго цере муридал ритӀана гьес сапаралде. Самариялъул цо росулъ чӀана гьел, ГӀиса вачӀиналде хӀадурлъи гьабун.

⁵³ Амма гьениб ГӀисае гьоболлъи гьабичӀо, гьев Иерусалималде унев вукӀин лъан.

⁵⁴ Гьебмехалъ гьесул муридал Якъубица ва Иоанница абуна: – Я, БетӀерчӀахъад! Дуе бокьилаанищ зодисан цӀадул балагь рещтӀун гьал хвезареян нилъеца абизе.

⁵⁵ Гьелъие изну гьечӀилан абуна ГӀисаца, гьездехунги вуссун.

⁵⁶ Цинги гьел цоги росулъе ана.

«Аллагьасул ПарччахӀлъиялъе щив ярагьунарев?»

⁵⁷ Нухда унаго цо чияс ГӀисада абуна: – Мун киве аниги, дуда цадахъ вилълъина дунги.

⁵⁸ ГӀисаца гьесда абуна: – Царал жиндирго рукӀун буго, хӀанчӀил бусен буго, амма ГӀадамил Лъимадул бетӀер бегьизе бакӀ гьечӀо, – ян.

⁵⁹ Цоги чиясдани ГӀисаца абуна: – Дида цадахъ вилълъа, – ян. Амма дос абуна: – Дир хварав эмен вукъизе ине изну кье дие.

⁶⁰ ГӀисаца гьесда абуна: – Хвараца рукъизе те хварал чагӀи. Мунин абуни Аллагьасул ПарччахӀлъи тӀаде гӀунтӀун букӀин лъазабизе а.

⁶¹ Цогиги чиясги гьесда абуна: – Дун дуда цадахъ вилълъина, БетӀерчӀахъад! Амма агьлу-хъизаналъулгун къолъикӀ гьабизе ине изну кье.

⁶² ГӀисаца гьесда абуна: – Хур бекьизе пурцил гӀоркьги ккун, нахъ-нахъ валагьулев чи Аллагьасул ПарччахӀлъиялъе ярагьунаро.