Лука 7 - Аллагьасул Калима

7 бетӀер ГӀисаца сахлъизавула нусилбетӀерасул рагьтӀател

¹ ГӀенеккун букӀараб халкъалъе гьабулеб вагӀзаги лъугӀизабун, гьениса вахъун ГӀиса Капернаумалде вачӀана.

² Гьенив Рималъул рагъухъабазул цо нусилбетӀерасул гьесие цӀакъ хирияв рагьтӀател вукӀана кутакаб унтиялъ хвалил боснов лъун.

³ ГӀиса вуссун вугин рагӀидал, гьес жугьутӀазул чӀахӀиял чагӀи ритӀана жиндир рагьтӀател сахлъизавизе вачӀаян гьесда гьаризе.

⁴ ГӀисахъе рачӀун кутакалда гьардезе лъугьана гьел, дуца кумек гьабизе мустахӀикъав чи вугин гьевиланги абуна.

⁵ Гьесие нилъер халкъ цӀакъ бокьулила, нижер гьаниб синагогагицин гьес бараб бугила.

⁶ ГӀиса гьезда цадахъ ана. Досул бакӀалде щолел рукӀаго, нусилбетӀерас данде жиндирго гьудулзаби ритӀун рачӀана вачӀинчӀониги кӀваричӀилан ГӀисада лъазабизе, ТӀадегӀанав ГӀиса къавулъе лъугьинегӀанасеб къадруялъул чи гурин живилан абизе.

⁷ Духъе вачӀине мустахӀикъав чиги гурин жив, жиндир рагьтӀател сахлъизе кӀолеб къуваталъул цо рагӀи абеян гьаризе ритӀун ругоан гьес гьел.

⁸ Живги вугила тӀадехун ругезул амру тӀубазабулев, жиндир ихтияралда ругел рагъухъабазе рагӀудалъун амру-буюрухъ гьабулев чи. Айилан цоясда абуни, гьев унила. ВачӀайилан цогидасда абуни, гьев вачӀунила. Пуланаб иш тӀубазабейилан рагьтӀателасда абуни, гьес тӀубазабулила.

⁹ Гьединал рагӀабаз гӀажаиблъизавуна ГӀиса. Жиндаго хадуб бачӀунеб букӀараб халкъалдехун вуссун, гьес абуна: – Гьале дица нужеда абулеб буго: Исраилил халкъалда гьоркьобгицин лъилниги дандчӀвачӀо дида гьединаб божи-иман.

¹⁰ НусилбетӀерас ГӀисахъе ритӀарал гӀадамал тӀадруссун рачӀиналде, рагьтӀател сахлъун ватана.

Наин шагьаралдаса цо къоролалъул вас чӀаголъизавула ГӀисаца

¹¹ КватӀичӀого ГӀиса ана Наин абулеб шагьаралде. Муридалги рукӀана цадахъ. Халкъалъул руккалабиги рачӀана гьесда хадур.

¹² Шагьаралъул кавудахъе щолеб мехалъ, гьале къватӀибе босун бачӀунеб батана цо хварав чиясул мали. Гьев вукӀана эбелалъул цохӀо вугев вас, гьей эбелги къоролай йикӀана. ГӀезегӀанго халкъ букӀана хвел букъизе унеб.

¹³ Гьей эбел йихьидал, ракӀ гурхӀун, ТӀадегӀанав ГӀисаца: – ГӀодуге! – ян абуна гьелда.

¹⁴ Цинги аскӀове ун, хварасул молода квер хъвана. Мали босун унел рукӀарал гӀадамал лъалхъана. ГӀисаца гьебмехалъ абуна: – Ле, гӀолохъанчи! Дица дуда тӀаде вахъаян абулеб буго.

¹⁵ Хварав чи тӀаде ворхана ва кӀалъазе лъугьана. Гьедин чӀаголъизавун, ГӀисаца гьев гӀолохъанчи гьесул эбелалъухъе кьуна.

¹⁶ Кутакаб хӀинкъиялъ къвал бан рукӀана гьел киналго, Аллагьасе рецц гьабулаго, гьез абулеб букӀана: – КӀудияв авараг рещтӀун вуго нилъехъе, жиндирго халкъалъе кумекалъе лъугьун вуго Аллагь.

¹⁷ ГӀисал хӀакъалъулъ хабар тӀибитӀана тӀолабго Ягьудиялдаги сверухъ ругел бакӀаздаги.

ЯхӀя аварагас ГӀисахъе муридзаби ритӀун рачӀуна

¹⁸ ЯхӀяда жиндирго муридаз бицана гьеб киналъулго хӀакъалъулъ.

¹⁹ КӀиго муридги тӀаде ахӀун, ЯхӀяца гьел ТӀадегӀанав ГӀисахъе ритӀана: «Мунищ дов нижехъе вачӀине кколев чи, яги цогидав вачӀинегӀанищ ниж ралагьун чӀезе кколел?» – абун гьикъизе.

²⁰ ГӀисахъе рачӀун, гьез абуна: – ЯхӀя аварагас ниж ритӀана: «Мунищ дов нижехъе вачӀине кколев чи, яги цогидав вачӀинегӀанищ ниж ралагьун чӀезе кколел?» – абун гьикъизе.

²¹ (Гьеб заманаялде щвезегӀан ГӀисаца гӀемерал гӀадамал сахлъизарун рукӀана унта-щокълъиялдаса, хъубал жундуздаса ва гӀемерал бецал чагӀазда канлъиги бихьизабун букӀана.)

²² ГӀисаца гьезие жавабалъе абуна: – Инеги ун, нужеца ЯхӀяда бице нужеда рагӀарабги бихьарабги: бецазда канлъи бихьулеб бугин, бохдулъа ракъварал рилълъанхъулел ругин, барасалъ унтарал рацӀцӀалъулел ругин, гӀинкъазда рагӀи рагӀулеб бугин, хварал чӀаголъулел ругин, мискинзабазда Рохалил хабар бицунеб бугин.

²³ Дир рахъалъ щакдаричӀев чи талихӀав вугиланги абе.

ГӀисаца ЯхӀя аварагасул хӀакъалъулъ бицуна

²⁴ Гьел ЯхӀял чапарзаби нахъе араб мехалъ, ГӀисаца гӀадамазда бицана ЯхӀял хӀакъалъулъ: – Щиб бихьизе нуж добмехалъ гӀицӀаб авлахъалде ун рукӀарал? Гьороца хьвагӀезабулеб муцӀи бихьизейищ?

²⁵ Щив вихьизе ун рукӀарал? Беричаб ратӀлилъ вугев чи вихьизейищ? ЧӀухӀараб ретӀел ретӀарал ва бечедаб яшавалда ругел гӀадамал парччахӀзабазул кӀалгӀабазухъ руго.

²⁶ Щив вихьизеха ун рукӀарал? Авараг вихьизейищ? Аварагасдасагицин кӀудияв чи вихьизе ун рукӀанилан абулеб буго дица нужеда!

²⁷ Гьесул хӀакъалъулъин ТӀухьдузда хъван бугеб: «Гьале, мун вачӀиналде дуе нух къачӀазе дирго илчи вуго дица цеве витӀулев».

²⁸ Дица нужеда абулеб буго: эбелалъ чехь къинлъун гьаруразда гьоркьов ЯхӀя аварагасдаса кӀудияв чи гьечӀо. Амма Аллагьасул ПарччахӀлъиялда ругезул бищун гьитӀинавгицин гьесдаса кӀудияв вуго. (

²⁹ ЯхӀял вагӀза рагӀарал киналго гӀадамаз, хӀатта магъало бакӀарулел чагӀазги, лъадалъ ччун рахъизарун, Аллагьасул Нух ритӀухъ гьабуна.

³⁰ Амма фарисеязги диниял гӀалимзабазги лъадалъ ччун рахъизе инкар ккуна ва жидее бугеб Аллагьасул амру къабул гьабичӀо.)

³¹ Сунда данде кквелел дица гьаб заманаялъул гӀадамал, лъида релълъун гьел ругел?

³² «Нижеца зурма пуна – Нуж кьурдизе рахъинчӀо! МагӀил бакънал рачана – Нуж гӀодизе лъугьинчӀо!» – ян къотӀноре рахъун цоцазде ахӀдолел лъималазда релълъуна гьел.

³³ ВитӀун вачӀана я чед кунарев, я чагъир гьекъоларев ЯхӀя авараг. Нужеца абуна гьев шайтӀабаз ккурав чи вугилан.

³⁴ ВачӀана кваназеги кваналев, гьекъезеги гьекъолев ГӀадамил Лъимер. Нужеца абулеб буго: «Гьале чехьквеш, гьекъолдухъан, магъало бакӀарулел чагӀазулги мунагь-хӀакъалъул агьлуялъулги гьудул», – абун.

³⁵ Амма Аллагьасул ГӀакъиллъиялда рекъон хьвадулел гӀадамаз бихьизабула Аллагьасул ГӀакъиллъиялъул ритӀухълъи.

Симон абулев фарисеясул бакӀалде уна ГӀиса

³⁶ Цо фарисеяс гьоболлъухъ ахӀун, гьенив кваналев вукӀана ГӀиса.

³⁷ Гьале гьеб шагьаралдаса цо мунагьал гӀемерай гӀадан, ГӀиса гьев фарисеясул бакӀалда вукӀинги лъан, махӀгьуинаб нахул цӀун щагӀил сурахӀигун, ячӀана.

³⁸ Гьесда нахъехунги чӀун, гӀодулаго магӀица гьесул хӀатӀал риччизаруна гьелъ, жиндирго ботӀрол расуца рацӀцӀана гьел, убачал гьарулаго доб махӀгьуинаб нахги бахана гьесул хӀатӀазда.

³⁹ Гьеб бихьидал, ГӀиса кванде ахӀарав фарисеясда ракӀалде ккана, гьав чи авараг вукӀаравани, гьасда лъалаанин кинай гӀаданалъ жинда квер хъвалеб бугебали. Мунагьазул цӀурай гӀаданлъидалха гьей йигей.

⁴⁰ Гьебмехалъ ГӀисаца гьесда абуна: – Симон! Цо дуда бицине жо буго дир. – Бице, дир МугӀалим, – ан абуна Симоница.

⁴¹ ГӀисаца бицана: – Къарзалъ гӀадамазухъе гӀарац кьолев цо чиясул вукӀун вуго кӀиго налъулав. Цояс гьесие кьезе букӀун буго щунусго динар, цогидас – кӀикъоялда анцӀго динар.

⁴² Налъи бецӀизе гьезул рес гьечӀолъи бихьун, кӀиясего хӀалал гьабун тун буго гьес. Гьанже дуца бице дида: кинасе гьев цӀикӀкӀун вокьилев?

⁴³ Симоница жаваб гьабуна: – Дида ракӀалде ккола, цӀикӀкӀун гӀарац нахъе кьезе букӀарасе цӀикӀкӀун вокьилин абун. ГӀисаца абуна: – БитӀун ракӀалде ккун буго дуда.

⁴⁴ Цинги гъой чӀужугӀаданалдехун вуссун, гьес Симонида гьикъана: – Дуда йихьулищ гьай гӀадан? Дун дур рокъове лъугьараб мехалъ дир хӀатӀал чуризе лъим кьечӀо дуца. Гьалъ жиндирго магӀица чурана дир хӀатӀал, жиндирго ботӀрол расуца ракъвазеги гьаруна гьел.

⁴⁵ Саламалъул убач гьабичӀо дуца дида, гьалъин абуни дун гьаниве вачӀаралдаса нахъего убачазул цӀезарулел руго дир хӀатӀал.

⁴⁶ Салам гьабун нах бахинчӀо дуца дир бетӀералда, гьалъин абуни дир хӀатӀазда бахунеб буго бищунго махӀгьуинаб нах.

⁴⁷ Гьединлъидал дица дуда абулеб буго: гьелъул мунагьал цӀикӀкӀун чуридалин гьелъие дун цӀикӀкӀун вокьулев вугев. Мунагьал дагь чурулесе дагь гурони вокьуларо.

⁴⁸ Дой гӀадамалда гьес абуна: – Мун мунагьаздаса яцӀцӀалъана, – ян.

⁴⁹ Цадахъ кваналел рукӀаразда ракӀалде ккана: – Гьавго щив, гӀадамал мунагьаздасацин рацӀцӀад гьаризе кӀолев, чи?

⁵⁰ ГӀисаца дой гӀадамалда абуна: – Дурго божи-иманалъ хвасар гьаюна мун. Гьанже а дурго.