Лука 6 - Аллагьасул Калима

6 бетӀер Шамат къоялъул хӀакъалъулъ

¹ Пуланаб шамат къоялъ ГӀиса унев вукӀана цо хурзабахъан. Хуриса ретӀун тӀоралги хъатинир кӀвекӀун, хӀалухъадул мугьал кунел рукӀана гьесул муридаз.

² Гьенир рукӀарал фарисеяз гьезда абуна: – Шамат къоялъ гьабизе гьукъараб иш щай нужеца гьабулеб? – ан.

³ ГӀисаца гьезие жавабалъе абуна: – Унго, цӀаличӀебищ нужеца, живгоги цадахъ рукӀаралги ракъун хутӀидал, Давудица щиб гьабурабали?

⁴ Аллагьасул рокъове жанивеги лъугьун, гьениса босун Давудица жинцагоги кванан буго, цадахъ рукӀаразеги кьун буго гӀицӀго кашишзабаз гурони кваназе гьукъараб чед.

⁵ ГӀисаца гьезда абуна: – Шамат къоялъул ихтияр ГӀадамил Лъимадухъ буго!

ГӀисаца сахлъизавула цо квер бакъварав чи

⁶ Цоги шамат къоялъ ГӀиса халкъалъе вагӀза-насихӀат гьабизе синагогаялъуве ун вукӀана. Гьенив вукӀана кваранаб квер бакъварав цо чи.

⁷ ГӀисада хадуб мухӀканго хал ккун чӀун рукӀана диниял гӀалимзабиги фарисеялги, гьес гьев чи сахлъизавилародайилан. Шамат къоялъ гьабураб хӀалтӀийилан ГӀисаде гӀайиб гӀунтӀизабизе бокьун букӀана гьазие.

⁸ Гьазул пикруги бичӀчӀун, ГӀисаца дов квер бакъварав чиясда абуна: – ТӀаде вахъун рукъ бакьулъе вачӀа, – ян. ТӀаде вахъун, рукъ бакьулъе вачӀана дов чи.

⁹ ГӀисаца гьезда абуна: – Дица нужеда цо жо гьикъила: шамат къоялъ лъикӀлъи гьукъун бугебищ, квешлъи гьабизе изну бугебищ? Чиясул рухӀ хвасар гьабизейищ кколеб, яги гьев хвезавизейищ кколев?

¹⁰ Гьезда берги речӀчӀизабун, ГӀисаца дов чиясда абуна: – Квер гӀебеде битӀе, – ян. Гьес абухъе гьабуна дов чияс ва кверги сахлъана.

¹¹ Ццидаца гьалаглъарал гьез цоцазда дандбалеб букӀана ГӀисае щибдай гьабун лъикӀилан.

ГӀисаца анцӀила кӀиго чапар тӀаса вищула

¹² Гьел къоязда ГӀиса Аллагьасе тӀагӀаталъе цо магӀарде вахана ва тӀубараб сордоялъго гьари-дугӀаялда вукӀана.

¹³ Нахъисеб къоялъ радал ГӀисаца жиндирго муридал аскӀоре ахӀана ва, тӀаса вищун, анцӀила кӀигоясда чапарзабийилан цӀар лъуна. Гьел рукӀана:

¹⁴ Пётрилан гьес тӀокӀцӀар кьурав Симон, гьесул вац Андрей, Якъуб, Иоанн, Филипп, Бартоломей,

¹⁵ Матфей, Фома, Алфейил вас Якъуб, Зелотилан тӀокӀцӀар бугев Симон,

¹⁶ Якъубил вас Ягьуда ва хадув ГӀисае хилиплъарав Ягьуда Искариот.

ГӀисаца унтарал сахлъизарула

¹⁷ Жиндирго муридазда цадахъ магӀардаса гъоркье рещтӀун, авлахъалде щвана ГӀиса. Гьев сверун ккуна муридазул руккелалъ ва тӀолабго Ягьудиялдаса, Иерусалималдаса, хӀорил рагӀалда ругел Тиралъул ва Сидоналъул улкабаздаса рачӀарал таманал гӀадамазги.

¹⁸ Гьел рачӀун рукӀана ГӀисал вагӀза-насихӀаталъухъ гӀенеккизеги, унта-щокълъиялдаса гьес рорчӀизаризеги. Хъубал жундузул гӀазабалъулъ рукӀарал гӀадамалги сахлъизаруна ГӀисаца гьенир.

¹⁹ ГӀисада квер хъвазегӀаги щвелародайилан тӀаде гьунун бачӀунеб букӀана халкъалъул руккел, – гьесдасан бачӀунеб букӀиндалха киналго унтарал сахлъизарулеб цо къуват-рухӀ.

ГӀисал кӀудияб вагӀза

²⁰ ТӀаса бер босичӀого муридазухъги валагьун, ГӀисаца байбихьана: – Гьардарал гурищ нуж, мискинал-пакъирал, нужее бугелъул Аллагьасул ПарччахӀлъи.

²¹ Гьардарал гурищ нуж, гьанже ракъун ругелал, Аллагьас нуж гӀорцӀизаризе ругелъул. Гьардарал гурищ нуж, гьанже гӀодилел ругелал, нуж релъанхъизе ругелъул.

²² ГӀадамил Лъимер сабаблъун нуж халкъалда рихиндал, нуж нахъе рачахъидал, инжит-хӀакъир гьаридал, нужеда квешаб цӀар чӀвайдал, – гьебмехалъги гьардарал гурищ нуж.

²³ Гьеб къоялъ роха нуж, рохун кӀанцӀезе лъугьа нуж, зобалазда кӀудияб шапакъат щвезе бугелъул нужее. Цересел аварагзабаз гьазул умумуздасанги хӀехьарабин гьеб кинабго.

²⁴ Балагьги гӀазабги гурищ нужее, бечедал, гьанибго лъикӀаб гӀумру бугелъул нужер.

²⁵ Балагьги гӀазабги гурищ нужее, гьанже гӀорцӀун ругелал, нуж ракъизе ругелъул. Балагьги гӀазабги гурищ нужее, гьанже релъанхъилел ругелал, магӀу тӀун гӀодизе ругелъул нуж.

²⁶ Балагьги гӀазабги гурищ нужее, киназго нужее рецц-бакъ гьабулеб бугеб мехалъ! Цересел гьересиаварагзабазе гьазул умумузги гьабурабин гьедин рецц-бакъ.

²⁷ Дихъ гӀенеккун ругел нужеда абулеб буго дица: нужерго тушбаби рокьа, нуж рокьуларезе лъикӀлъи гьабе.

²⁸ Нужее нагӀана кьолездаги баркат лъегиян абе, нуж къабихӀ гьаруралги дугӀадулъ рехсе,

²⁹ Дур кӀаркьен чӀварасда цебе цояб кӀаркьенги ккве, дудаса чухъа-гужгат бахъарасе гурде бахъизеги квалквал гьабуге.

³⁰ Гьараравщинасе гьарарабги кье, кьурабги нахъе тӀалаб гьабуге.

³¹ Цогидаз дуего гьабизе бокьулеб жо дуца гьезиеги гьабе.

³² Нужго рокьулелал нужее рокьиялъул кири кинаб букӀинеб? Мунагь-хӀакъалъул агьлуялъеги рокьулелъул жалго рокьулелал.

³³ Нужее лъикӀлъи гьабулесе бецӀун гьабулеб лъикӀлъиялъулги кири кинаб букӀинеб? Мунагь-хӀакъалъул агьлуялъгицин гьабулелъул гьебго жо.

³⁴ Нахъе кьеялде хьул лъун чияхъе къарзалъе кьураб боцӀул кири кинаб букӀинеб? Мунагь-хӀакъалъул агьлуялъги кьолелъул цоцахъе къарзалъе боцӀи, тӀаса бекичӀого, камичӀого тӀадбуссине букӀиналда ракӀги чӀун.

³⁵ Нужеейин абуни нужерго тушбаби рокьа, садакъаби гьаре, нахъе щвеялъул пикру гьабичӀого къарзалъе боцӀиги кье. Гьебмехалъ кири гӀемерлъила нужее, ва ТӀадегӀанав Аллагьасул васаллъун лъугьина нуж. Жидее гьабураб лъикӀлъи лъаларезеги квешазеги лъикӀлъи гьабулевлъун вугелъул гьев.

³⁶ Нужер Эменго гӀадин гурхӀел-рахӀму бугеллъун рукӀа нужги.

³⁷ Нужеца чияда гӀайиб чӀваге, – Аллагьас нужедаги гӀайиб чӀваларо; нужеца тамихӀалде цӀаге, – нужги тамихӀалде цӀаларо. Нуж тӀасалъугьа, – нужедаги тӀасалъугьина.

³⁸ Нужеца кье, – нужееги кьела. Дагьабги цӀикӀкӀун жанибе инелъун хьвагӀезабун, цинги бугӀун ва бетӀер гьабун цӀезабураб хӀалалаб сахӀалъ борцун бала нужер квенчӀелтӀе. Кинаб сахӀалъ нужеца борцаниги, гьединабго сахӀалъ борцине буго нужееги.

ГӀисаца, мисалал рачун, бицуна

³⁹ Гьадинаб мисалги бачана ГӀисаца гьезие: – Цо бецав чиясухъа бажариладай цоги бецав чи квер ккун вачине? КӀиялго цадахъ гвандинире рортилародай гьел?

⁴⁰ Жиндирго мугӀалимасдаса тӀадегӀанав вукӀунаро мутагӀил. Амма, цӀалун вахъараб мехалъ, бокьарав чи ващалъула мугӀалимасда.

⁴¹ Дурго бадиб бугеб чӀалу бихьичӀого, дур вацасул бадиб бугеб сум щай дуда бихьулеб?

⁴² Яги дуда кин кӀолеб: «Ворея, вац, дур бадиса сум бахъизе биччай!» – ян гьесда абизе, дурго бадиб бугеб чӀалуги бихьичӀого? Ле, ххвелал гьарун ругьунав чи, цин дуца дурго бадиса чӀалу бахъе, цинги бичӀчӀила дуда вацасул бадиса сум кин бахъилебали.

⁴³ ЛъикӀаб гъотӀода тӀад турараб пихъ букӀунаро, турараб гъотӀода тӀад лъикӀаб пихъги букӀунаро.

⁴⁴ Пихъихъ балагьун лъала гъветӀ батӀа гьабизе. Зазида тӀад инжир барщуларо, гӀинтӀидул хъархъидаса цӀибил бетӀуларо.

⁴⁵ ЛъикӀав чияс жиндирго рекӀелъ бугеб лъикӀаб хазинаялъул гъансиниса къватӀибе лъикӀлъи босула, квешав чиясин абуни квешаб хазинаялъул гъансиниса къватӀибе квешлъи босула. РакӀ цӀун тӀасан араб гурони гьесул кӀалалъ бицунарелъул.

⁴⁶ «Я, БетӀерчӀахъад! Я, БетӀерчӀахъад!» абун щай нужеца диде ахӀулеб, дица абураб жо нужеца гьабулеб гьечӀеб мехалъ?

⁴⁷ Дида аскӀове вачӀун, дир рагӀабазухъ гӀенеккарав ва гьел тӀуразарурав чи лъида релълъуневали мисал бачина дица нужее:

⁴⁸ гьев релълъуна тӀалде щвезегӀан гъваридго кьучӀги бухъун, мина барав чиясда. Щун бачӀараб гӀурул лъим речӀчӀаниги, щущан инчӀо гьеб, щулаго бан букӀиндал.

⁴⁹ Амма дихъ гӀенекканиги, дица абухъе гьабуларев чи релълъуна, кьучӀго бухъичӀого, ракьалда тӀад мина барав чиясда. Щун бачӀараб гӀурул лъим речӀчӀарабго, доб мина биххана, щущан ун, чӀудби хутӀана.