Лука 3 - Аллагьасул Калима

3 бетӀер ЯхӀя авараг халкъалда цеве вахъуна

¹ Тиберий къайсарлъун ккун анцӀила щуабилеб сон букӀана; Ягьудиялда сардарлъун вукӀана Понтий Пилат; Галилеялда ханлъун вукӀана Гьерод; гьесул вац Филипп вукӀана Итуреялда ва Трахонит вилаяталда ханлъун, Лисаний вукӀана Абиленаялда ханлъун;

² бищунго кӀудиял кашишзабилъун рукӀана Гьанна ва Кайафа. Гьеб заманаялда Закариял вас ЯхӀяе гӀицӀаб авлахъалда Аллагьасул илгьам лъугьана.

³ Иордан гӀоралда сверухъ ругел бакӀазде щун, нужерго мунагьал чуризе гӀоло, кантӀун Аллагьасде руссаян ва лъадалъ ччун рахъаян лъазабулеб букӀана гьес.

⁴ Гьелдалъун ритӀухълъана Ишая аварагасул ТӀехьалда ругел гьадинал рагӀаби: «Цо ахӀи буго авлахъалда рагӀулеб: – БетӀергьанасе нух къачӀай, битӀизабе гьесда цебе шагьра!

⁵ Щибаб кӀкӀал-хъитӀ бацизабе, щибаб гохӀ-щоб тӀуцлъизабе, свераби лъугӀизаре, эхедераялги лабаллъабиги гьечӀеб, цӀвакараб нух букӀа абе,

⁶ щибаб рижиялда бихьа абе Аллагьасдасан хвасарлъи!»

⁷ Гьале лъадалъ ччун рахъизе рачӀунел рукӀана халкъалъул руккелал. Гьезда ЯхӀяца абулаан: – ГӀай, нуж чӀегӀераб борхьил наслу! Нужеде гӀагарлъун бугеб Аллагьасул тамихӀалдаса лъутизе лъица малъараб?

⁸ Нужерго мунагьаздаса руссун, кантӀиялъул гъотӀода пихъ барщизабе, ниж Ибрагьимил наслуялъул лъимал ругиланги гаргадуге. Гьале дица нужеда абулеб буго: жиндие бокьани, гьал ганчӀаздасанги Ибрагьимил наслуялъул лъимал лъугьинаризе кӀола Аллагьасда.

⁹ ГъутӀбузда гъоркь гӀащтӀи лъун тун бугеблъи лъай нужеда. ЛъикӀаб пихъ тӀад бижичӀеб гъветӀ къотӀун цӀадаб лъезе бугебха!

¹⁰ – Нижеца щибха гьанже гьабизе кколеб? – ан гьикъулаан гьесда гӀадамаз.

¹¹ Гьес жаваб кьолаан: – КӀиго гурде бугес цояб гьечӀесе кье, квен бугесги гьединго гьабе.

¹² Лъадалъ ччун рахъизе рачӀарал магъало бакӀарулел чагӀазги гьикъана гьесда: – Я, МугӀалим, нижеца щибха гьабизе кколеб?

¹³ Гьезие жаваб кьуна ЯхӀяца: – Нужеда бихьизабуралдаса цӀикӀкӀун бахъуге лъихъаниги магъало.

¹⁴ Гьединго рачӀун рагъухъабаз гьикъана: – Нижеца щибха гьабизе кколеб? Гьезда абуна: – ХӀал-зулмуялдалъун ва гьечӀеб гӀайиб гӀунтӀизабун лъихъаго гӀарац бахъуге, нужеего щолеб харжалда разилъун чӀа.

¹⁵ МасихӀ вачӀиналъухъ урхъун балагьун чӀун букӀараб халкъалда ракӀалде кколеб букӀана ЯхӀяцин гуродай гьевилан.

¹⁶ ЯхӀяца киназдаго абуна: – Лъадалъ ччун рахъун, рацӀцӀад гьарулел руго дица нуж, амма вачӀунев вуго дидасаги гӀемерго къудрат цӀикӀкӀарав. Гьесул хьитил рухьен бичизецин мустахӀикъав гьечӀо дун. Гьес нуж рацӀцӀад гьарила Илагьияб РухӀалдалъун ва цӀаялдалъун.

¹⁷ Гьес бугьун хъатикь ккун буго, жиндирго гьоцӀиб ролъ бацӀцӀад гьабун, гьеб цагърахъе буссинабизе, накку гьес ссвинго гьечӀеб цӀадабе бан бухӀила.

¹⁸ ГӀадамазе Рохалил хабар бицун, гьединал ва цогидалги рагӀабаздалъун гӀемерал насихӀатал гьарулел рукӀана ЯхӀяца.

^19-20 Гьерод ханас жиндирго вацасул чӀужу ячинги ва гьеб гурелги гьесул квешлъаби ЯхӀяца какулел рукӀиндал, цогидал жиндирго цересезде тӀаде жубана гьев ханас ЯхӀя гвандинив тӀамиялъул квешлъиги.

ГӀиса Аллагьасул вас вукӀин загьирлъула

²¹ Гьале ЯхӀяца киналго лъадалъ ччун рахъулел рукӀараб заманаялда гьениве вачӀарав ГӀисаги лъадалъе лъугьун дугӀа гьабулев вукӀана. Гьебмехалъ зобалги кӀирикьизарун,

²² миккидул сураталда Илагьияб РухӀ рещтӀана гьесухъе ва зобалаздасан гьаракьги рагӀана: – Мун вуго дие вокьулев дир Вас! Дудаса вохун вуго дун!

ГӀиса МасихӀил цӀаразул рахас

²³ Аллагьасе хъулухъ гьабизе байбихьулеб мехалъ, ГӀисал букӀана лъебергогӀанасеб сон, ва гьесул умумузул силсила гьадинаб бугилан рикӀкӀунаан: гьесул эмен Юсуп, гьесулги эмен ГӀели, цинги

²⁴ Маттат, Леви, Малки, Яннай, Юсуп,

²⁵ Маттитья, ГӀамос, НахӀум, Гьесли, Наггай,

²⁶ МахӀат, Маттитья, ШимгӀи, Йосех, Йода,

²⁷ ЙохӀанан, Реса, Зеруббабел, Шеалтиэл, Нер,

²⁸ Малки, Адди, Къасам, Элмадам, ГӀер,

²⁹ ЙешуагӀ, ЭлигӀезер, Йорим, Маттат, Леви,

³⁰ ШимгӀон, Ягьуда, Юсуп, Йонан, Элякъим,

³¹ Мелеа, Менна, Маттата, Натан, Давуд,

³² Йишай, Йобед, БогӀаз, ШелахӀ, НахӀшон,

³³ ГӀаминадаб, Админ, Арам, ХӀецрон, Перец, Ягьуда,

³⁴ Якъуб, ИсхӀакъ, Ибрагьим, ТерахӀ, НахӀор,

³⁵ Серуг, РегӀу, Пелег, Эбер, ШелахӀ,

³⁶ Къейнан, Арпакшад, Шем, НухӀ, Ламек,

³⁷ МетушелахӀ, ХӀенок, Йаред, Магьалалеэл, Къейнан,

³⁸ Энос, Шит, Адам, Аллагь.