Лука 22 - Аллагьасул Калима

22 бетӀер Ягьуда Искариот ГӀисае хилиплъула

¹ Жинда Пасхаян цӀар лъураб РеччичӀел Панкъазул Байрам гӀагарлъулеб букӀана.

² ЧӀахӀиял кашишзабиги диниял гӀалимзабиги ургъулел рукӀана ГӀиса тӀагӀинавизе санагӀат ккелародайилан, амма халкъалъукьаги хӀинкъулел рукӀана гьел.

³ Дов анцӀила кӀигоясул цояв, Искариотин тӀокӀцӀар бугев Ягьудал рекӀелъе илбис лъугьана.

⁴ ЧӀахӀиял кашишзабаздаги Мукъадасаб Рукъ цӀунулел рагъухъабазул бутӀруздаги аскӀове ун, гьезулгун къотӀи-къай гьабуна ГӀиса гьезул кверде кьезе.

⁵ Гьел рохана ва гьесие гӀарац кьезе къотӀи гьабуна.

⁶ Ягьуда гьелда разилъана. Цинги гьес балагьулеб букӀана гӀадамал гьечӀеб бакӀалда ГӀиса гьезул кверде кьезе санагӀалъи бугеб заман.

Пасхаялъул квен

⁷ РеччичӀел панкъал режулеб ва къурбаналъе пасхаялъул кьегӀер хъолеб къо тӀаде щвана.

⁸ ГӀисаца Пётридаги Иоаннидаги абуна, нилъеего пасхаялъул квен хӀадур гьабизе аян.

⁹ Киб нижеца гьеб гьабизе дуе бокьун бугебилан гьикъана гьез ГӀисада.

¹⁰ ГӀисаца гьезда абуна: – Балагьея, шагьаралде жанире лъугьараб мехалъ, лъадал гӀеретӀги цӀун вачӀунев цо чи ватила нужеда. Гьев жаниве лъугьараб рокъоре а нужги гьесда хадур.

¹¹ Цинги нужеца рукъалъул бетӀергьанасда абе: «МугӀалимасе лъазе бокьун буго жиндирго муридалгун цадахъ пасхаялъул квание рукъ киб бугебали».

¹² Гьес нужеда бихьизабила цо гӀатӀидаб къачӀараб тӀасарукъ. Гьеле гьениб хӀадуре нужеца квен.

¹³ Шагьаралде щведал, ГӀисаца абухъе тӀубана гьез иш. Цинги пасхаялъул квенги хӀадур гьабуна.

¹⁴ Къаси кванил ригь щвараб мехалъ, вачӀун ГӀиса кваназе гӀодов чӀана, гьесда аскӀов вукӀана анцӀила кӀиявго чапарги.

¹⁵ ГӀисаца гьезда абуна: – Дица гӀазаб-гӀакъуба хӀехьезе ккелалде гьаб Пасхаялъул квен нужеда цадахъ кваназе цӀакъ гӀащикълъун вукӀана дун.

¹⁶ Дица нужеда абулеб буго: Аллагьасул ПарччахӀлъиялда ахирисеб пасхаялъул байрам тӀобитӀизегӀан тӀокӀаб кваназе гьечӀо дица гьеб.

¹⁷ Цинги гьес, чагъиралъул цӀураб щурунги босун, тӀаде дугӀаги гьабун, абуна: – Ма, нужедаго гьоркьоб бикье гьаб.

¹⁸ Дица нужеда абулеб буго: Аллагьасул ПарччахӀлъи рещтӀинегӀан гьанжеялдаса нахъе тӀокӀаб гьекъезе гьечӀо дица гьаб цӀолбол цӀцӀураб жа.

¹⁹ Цо чедги кодобе босун, тӀаде дугӀаги гьабун, гьезухъе кьолаго ГӀисаца абуна: – Гьаб буго нужее гӀоло къурбанлъулеб дир черх. Дунги ракӀалде щун, нужецаги гьабе гьадин.

²⁰ Кванан рахъараб мехалъ, додинго щурунги кодобе босун, ГӀисаца абуна: – Гьаб буго нужее гӀоло тӀолеб дир би – ЦӀияб КъотӀи щулалъиялъе тӀолеб би.

²¹ Амма дида цадахъ гьаб кванде квер бегьана дие хилиплъизе вугев чиясги.

²² Гьедин ГӀадамил Лъимер жиндирго къадаралде щвела, амма гьесие хилиплъарасдеги балагь бачӀина.

²³ Гьел цоцаздехун гаргадизе лъугьана: щивдай гьевилан, лъицадай гьеб гьабизехъин бугебилан.

«Бищунго кӀудиявлъун щив кколев?»

²⁴ Цоги гьезда гьоркьоб дагӀба-къец ккана жидеда гьоркьов бищунго кӀудиявлъун щивдай кколаян.

²⁵ ГӀисаца гьезда абуна: – ПарччахӀзабаз халкъазе ханлъи гьабула, гӀадамазги гьел кверщелчагӀи рикӀкӀуна лъикӀлъи гьабулел чагӀилъун.

²⁶ Амма нужеда гьоркьоб гьедин букӀине бегьуларо: нужер бищунго кӀудияв чӀа бищунго гьитӀинав вугев гӀадин, кверщел бугевги чӀа цогидазе хъулухъалъе.

²⁷ Щив кӀудиявлъун рикӀкӀунев: кваналев вугев чийищ яги кваналезе хъулухъалъе чӀарав чийищ? Кваналев вугев чи гурищ? Гьале дун гьанив нужее хъулухъалъе чӀун вуго.

²⁸ Нужни дида цадахъ къо хӀехьарал чагӀи руго.

²⁹ Гьединлъидал дир Инсуца дие ирсалъе кьураб ПарччахӀлъи дица нужееги ирсалъе толеб буго.

³⁰ Дир ПарччахӀлъиялда нужги дида цадахъ квана-гьекъолел рукӀине руго ва Исраилил анцӀила кӀиябго наслуялъе суд гьабизе тахазда тӀад гӀодорги чӀезе руго.

«Дуца дидаса инкар гьабила»

³¹ Симон! Симон! Ворегиха! Илбисалъ гьарана нуж цӀалкӀизе риччайилан, цӀалкӀица кколелги кколарелги ролъул мугьал ратӀа гьарулеб гӀадин.

³² Дица дуе дугӀа гьабуна мун иманалдаса ватӀалъунгутӀизе, цинги дида аскӀове тӀадвуссараб мехалъ, дурго вацазул ракӀбатизабе.

³³ Пётрица гьесда абуна: – Я, БетӀерчӀахъад! Дуда цадахъ туснахъалде инеги хвезеги хӀадурав вуго дун.

³⁴ Амма ГӀисаца гьесда абуна: – Дица дуда абулеб буго, Пётр: радакье хӀелеко бахъиналде дуца лъабцӀулго абила дун дуда лъаларилан.

ГӀисаца хӀадурлъейилан абула

³⁵ ГӀисаца гьезда абуна: – Я гӀарац лъун таргьа босичӀого, я къайи лъун къвачӀа босичӀого, я хисун ретӀине хьитал росичӀого дица нуж ритӀараб мехалъ, сундулниги къварилъи букӀанищ нужее? БукӀинчӀилан жаваб кьуна гьез.

³⁶ Гьес гьезда абуна: – Гьанже гӀарцул таргьа бугес гьебги цадахъ босе, гьединго къвачӀаги босе. Хвалчен гьечӀес, чухъа-гужгатги бичун, гьеб босизе санагӀат гьабе.

³⁷ Дица нужеда абулеб буго: «Гьев такъсирчилъун рикӀкӀина», – ян Илагьиял ТӀухьдузда дир хӀакъалъулъ хъван букӀарабги тӀубазе буго, дир рахъалъ букӀараб кинабго гьанже тӀубазехъин бугелъул.

³⁸ – Я, БетӀерчӀахъад! Гьале, кӀиго хвалчен буго гьаниб, – ан абуна гьез. – ГӀела, – ян абуна ГӀисаца гьезда.

Зайтуналъул магӀарда ГӀиса Аллагьасде гьардола

³⁹ Цинги гьениса къватӀиве вахъун, кидаго гӀадин, Зайтуналъул магӀарде ана гьев, муридалги рахъана гьесда хадур.

⁴⁰ Доре щведал, ГӀисаца гьезда абуна: – Гьари-дугӀаялде русса, нужго къосинарунгутӀизе.

⁴¹ Рехараб гамачӀ щолеб манзилалъ гьездаса рикӀкӀадегӀанги ун, суждаялдаги чӀун, дугӀа гьабизе лъугьана ГӀиса.

⁴² Гьес абулеб букӀана: – Я, дир Эмен, дур хӀукму бугеб батани, гьеб хвалил лълъар гьекъезабуге дида. Амма дие бокьухъе гуреб, дуего бокьухъе букӀине биччанте.

⁴⁵ ДугӀаги лъугӀизабун, муридазда аскӀове щведал, пашманлъиялъ тату хун, кьижун ратана ГӀисада гьел.

⁴⁶ – Щай нуж кьижарал? – ан абуна гьес. – ТӀаде рахъа ва гьари-дугӀаялде русса, нужго къосинарунгутӀизе.

ГӀиса ккун вачун уна

⁴⁷ ГӀисаца гьедин абулаго, гьале тӀаде щвана гӀемераб халкъ, ва цеве-цеве вукӀана дол анцӀила кӀигояздасан цояв Ягьуда абулев чиги. ГӀисада убач гьабизе аскӀовегӀан вачӀана гьев.

⁴⁸ ГӀисаца гьесда абуна: – Ягьуда! Убачги гьабунищ дуца ГӀадамил Лъимер тушбабазухъе кьолев вугев?

⁴⁹ Гьениб ккезехъин бугеб иш бихьидал, сверухъ рукӀараз ГӀисада абуна: – Я, БетӀерчӀахъад! Хвалчаби рахъилищ? – ан.

⁵⁰ Гьезул цояс хвалчен кьабун кӀудияв кашишасул цо рагьтӀателасул кваранаб гӀин къотӀана.

⁵¹ – ГӀела! Те! – ян абуна гьезда ГӀисаца ва, квер хъван, дов рагьтӀателасул гӀин сахлъизабуна.

⁵² Жинда хадур рачӀарал чӀахӀиял кашишзабаздаги, Мукъадасаб Рукъ цӀунулел рагъухъабазул бутӀруздаги, чӀухӀби-хӀакимзабаздаги ГӀисаца абуна: – Хвалчабигун, тӀилалгун, хъачагъ кквезе рачӀунел кинигин, рачӀун руго нуж дун вачине.

⁵³ Щибаб къоялъ нужеда цеве Мукъадасав Рокъов вукӀунаангури дун, гьениб диде квер борхичӀо нужеца. Амма гьанже нужер заман бачӀун буго, бецӀаб къуваталъухъе кверщел щун буго.

Пётрица ГӀисадаса инкар гьабула

⁵⁴ Ккун вачун гьез ГӀиса кӀудияв кашишасул бакӀалде щвезавуна. Нахъа-нахъа чӀун гьезда хадув вачӀунев вукӀана Пётрги.

⁵⁵ Гьеб минаялъул азбар бакьулъ цӀаги бакун, сверухъ гӀодор чӀана рагъухъаби. Гьезда гьоркьов Пётрги вукӀана.

⁵⁶ ЦӀадухъ гьев вихьидал, гьесухъ ялагьунги чӀун, цо гъаравашалъ абуна гьавги досда цадахъ вукӀанилан.

⁵⁷ Пётрица, нагӀадала ккун, абуна: – Дида лъаларо, яц, гьев.

⁵⁸ Гьелдаса гӀемер мех иналдего, цоги чиясги абуна, гьев вихьидал, мунги дозул чи вугилан. Пётрица абуна: – Гуро, гьудул.

⁵⁹ СагӀатгӀан заман индал, цоги чияс цӀакъ ракӀчӀун абуна: – Гьав хӀакъикъаталдаги досда цадахъ вукӀарав чи вуго, Галилеялдасалъидалха гьавги, – ян.

⁶⁰ Амма Пётрица абуна: – Дуца бицунеб жо щиб, гьудул? ГьебсагӀат хӀелеко гӀегӀедизе лъугьана.

⁶¹ Гьебмехалъ гьесдехун вуссун Пётрихъ валагьана ТӀадегӀанав ГӀиса, ва Пётрида ракӀалде щвана хӀелеко бахъиналде лъабцӀул дуца жиндаса инкар гьабилилан ТӀадегӀанав ГӀисаца жиндаго абун рукӀарал рагӀаби.

⁶² КъватӀиве ун гӀек-гӀекиялда гӀодана Пётр.

ГӀиса тӀадегӀанаб судалда цеве чӀезавула

⁶³ ГӀиса цӀунун рукӀарал гӀадамаз гьев къабихӀ гьавулев вукӀана, гьесда кьабулеб букӀана.

⁶⁴ Беразда чӀортоги бухьун абулаан, мун авараг ватани, лъица кьабурабали бицейилан.

⁶⁵ Цогидалги къабихӀал-инжитал рагӀаби гӀемер абуна ГӀисада гьез.

⁶⁶ Дуниял рогьараб мехалъ, халкъалъул чӀухӀби-хӀакимзабиги, кӀудиял кашишзабиги, диниял гӀалимзабиги данделъана гьенире, ГӀисаги вачун вачӀана суд гьабулеб рокъове.

⁶⁷ – Бице, мун МасихӀищ? – ан гьикъана ГӀисада.

⁶⁸ Гьес абуна: – Дица жаваб кьуниги, нуж божиларо. Дица суал кьуни, нужеца жавабги кьеларо.

⁶⁹ Гьанжеялдаса нахъе ГӀадамил Лъимер гӀодов чӀезе вуго Къудратав Аллагьасул кваранаб рахъалда.

⁷⁰ Киназго гьикъана: – Гьедин батани, мун Аллагьасул Васищха? ГӀисаца гьезда абуна: – Нужецаго абулеб бугогури дун гьев вугилан.

⁷¹ Гьез абуна: – Цоги нугӀзал щай нилъее. Гьасул жиндирго кӀалдисан рачӀарал рагӀаби рагӀанагури нилъеда.