Лука 21 - Аллагьасул Калима

21 бетӀер Къоролалъул садакъаялъул хӀакъалъулъ

¹ Мукъадасаб Рокъоб садакъаде гӀарац лъолеб бакӀалде бечедал чагӀаз гӀемераб гӀарац рехулеб бихьана ГӀисада.

² Бащдаб капекалъул багьаяб кӀиго пахьул гӀарац гьенибе рехулей цо мискинай къоролайги йихьана гьесда.

³ ГӀисаца абуна: – ХӀакълъун абулеб буго дица нужеда: гьай мискинай къоролалъ киназдасаго цӀикӀкӀун гӀарац кьуна садакъаде.

⁴ Цогидаз садакъа гьабуна жидерго боцӀи-рикъзи тӀокӀлъун, долъин абуни, жиндиего хӀажат букӀаниги, садакъаде кьуна жиндирго бетӀербахъиялъе хутӀун букӀарабщинаб.

ГӀисаца бицуна дуниялалда ккезе бугелъул

⁵ Мукъадасаб Рукъалъул хӀакъалъулъ цо-цояз абулеб букӀана, унго, гьалъул къадазулъ лъун ругел ганчӀазул берцинлъи бихьуларищилан, бечедал сайигъатаз гьаб чӀухӀизабун бугеб куцилан. ГӀисаца абуна:

⁶ – Гьаб кинабго нужеда бихьулебщинаб, ганчӀида лъураб гамачӀ хутӀичӀого, кӀалагъоркье чӀварал къоял рачӀине руго.

⁷ – Я, МугӀалим! Кида гьеб букӀине бугеб? – ан гьикъана гьез гьесда. – Гьеб къо тӀаде щвеялъул гӀаламат бице нижеда.

⁸ ГӀисаца абуна: – Воре, къосинаризе гурин нуж! Чанги вукӀине вугелъулха, жив дун вугилан ва ахирзаман щванилан абун вачӀунев чи. Гьезда хадур унге нуж.

⁹ Рагъ-кьалги тунка-гӀусиги гӀемерлъун бугилан рагӀани, гьелдасаги хӀинкъуге нуж. Гьеб цебеккунго лъугьине ккола, амма ахирзаман гьедигӀан хехго тӀаде щоларо.

¹⁰ Цинги гьес абуна: – Цо халкъ цоги халкъалде, цо ханлъи цоги ханлъиялде тӀаде кӀанцӀила.

¹¹ Кутакалда ракь багъарила, бакӀ-бакӀалда унта-щокълъи баккила, ракъи тӀаде щвела, балагьал рещтӀина ва зобалаздасан чӀахӀиял гӀаламатал загьирлъила.

¹² Гьеб кинабго ккелалде, дун сабаблъун нужеда хадур лъугьина, кквезеги ккун, синагогабазде рачина, суд гьабила, гвандинире рехила, парччахӀзабазда ва наибзабазда цере чӀезарила.

¹³ Гьебмехалъ рес ккела нужее, дир муридал ругилан нугӀлъи гьабизе.

¹⁴ Кин гьезие жаваб кьелебали цебеккунго ургъел чӀвазе кколареблъиялда ракӀчӀезабе нужеца.

¹⁵ Щаян абуни, нужеда дандечӀезе ва данде кӀалъазе нужер киналго дагӀбадулазухъа бажарулареб пасихӀлъиги гӀакъиллъиги кьела дица нужее.

¹⁶ Нужее хилиплъила хӀатта нужер эбел-эмен ва вацал, нужер гӀагарал чагӀи ва гьудулзаби. Цо-цоял чӀвазеги чӀвала нужер.

¹⁷ Дун сабаблъун киналго гӀадамазда рихина нуж.

¹⁸ Амма нужер бутӀруздаса цо расги бортизе гьечӀебха.

¹⁹ Нужерго сабруялдалъун нужерго рухӀал хвасар гьаре.

²⁰ Боял рачӀун, Иерусалим сверун ккун бихьараб мехалъ, лъала нужеда гьеб шагьар чӀунтулеб заман гӀагарлъулеб букӀин.

²¹ Гьеле гьебмехалъ мугӀрузде лъута абе Ягьудиялда ругел гӀадамал. Шагьаралда жанир ругелал гьениса къватӀире тӀурун аян абе, шагьаралдаса къватӀирехун ругелал жанирего лъугьунгеян абе.

²² Щаян абуни, гьел ругелъул къисас босулел къоял, гьелдалъун ритӀухълъизе бугелъул Илагьиял ТӀухьдузда хъварабщинаб.

²³ Вай, къинал руччабазе ва каранда хахулел лъимал ругел улбузе букӀинаха дол къояз кӀудияб къварилъи-гӀазаб! ЦӀакъ кӀудияб балагь бачӀина гьеб ракьалде, Аллагьасул ццин рещтӀина гьеб халкъалде!

²⁴ Хвалчабаз бутӀрул къотӀаралги рукӀина, киналго улкабазде асирлъун рачун аралги рукӀина. Аллагь лъалареб халкъалъул къуват лъугӀараб заман тӀаде щвезегӀан, гьелъ хӀатӀикь мерхьина Иерусалим.

²⁵ Бакъ-моцӀалъул ва цӀвабзазул гӀаламатал загьирлъила, ракьалдайин абуни, ралъдал хъудиялъ ва карачалабазул кутакаб хъуялъ хӀинкъизарурал халкъал цӀакъго рихха-хочун лъугьина.

²⁶ Дуниялалде рещтӀине ругел балагьазухъ ралагьун чӀеялъги хӀинкъиялъги гӀадамал гӀакълуялдаса ина. Щаян абуни, къвакӀарал зобал гьаргьадизе ругелъул.

²⁷ Гьебмехалда вихьила накӀкӀул парчаялда тӀад гучалда ва кӀудияб къудраталда ГӀадамил Лъимер вачӀунев.

²⁸ Гьел гӀаламатал загьирлъаралго, нуж тӀаде рахъа ва бетӀер эхеде борхун ралагье – нужее тархъанлъилъидал бачӀунеб бугеб.

«Нужеца мисалалъе босе инжиралъул гъветӀ!»

²⁹ ГӀисаца гьезие гьадинаб мисал бачана: – Инжиралъул гъотӀохъ яги цогидал гъутӀбузухъ ралагье нуж.

³⁰ Гьел гъутӀби гӀурччинлъун рихьараб мехалъ, нужеда лъалагури рии тӀаде щолеб букӀин.

³¹ Гьелдаго релълъун, гьал дица рицарал гӀаламатал загьирлъараб мехалъ, нужеда лъала Аллагьасул ПарччахӀлъи гӀагарлъулеб букӀин.

«Воре, нуж рорчӀуда чӀа!»

³² ХӀакълъун абулеб буго дица нужеда: дуниялалда гьаб наслу букӀаго лъугьине буго гьеб кинабго.

³³ Зобалги ракьалги тӀагӀаниги, дир рагӀаби нахъе хутӀизе руго.

³⁴ Воре, гьекъолдун, пасалъун ва магӀишаталъул тӀалаб-агъаз гьабун, ракӀ бицалъизе биччаге, тохлъукьего гьеб къоялъ нужее къор гъезе гурин.

³⁵ Гьеб къо тӀаде бачӀине бугелъул тӀолабго гьаб ракьалда тӀад бугеб кинабго махлукъаталде!

³⁶ Гьединлъидал рорчӀуда чӀа! Кинабго гьеб ккезе бугелдаса хвасарлъизеги ва къиямасеб къоялъ ГӀадамил Лъимада цере чӀезе кӀвезеги кидаго гьари-дугӀаялда рукӀа.

³⁷ Гьел къоязда Мукъадасаб Рокъове вагӀза-насихӀат гьабизе вачӀунаан ГӀиса. Сордо базе гьев Зайтуналъул магӀарде тӀадвуссунаан.

³⁸ Щибаб къоялъ радалго бачӀунаан Мукъадасаб Рокъобе гьесухъ гӀенеккизе халкъ.