Лука 20 - Аллагьасул Калима

20 бетӀер «Лъица дуе ихтияр кьураб?»

¹ Иерусалималъул Мукъадасаб Рокъоб вагӀза-насихӀат гьабулев, Рохалил хабар бицунев ГӀиса вугеб мехалъ, гьенире рачӀана чӀахӀиял кашишзаби, диниял гӀалимзаби ва чӀухӀби-хӀакимзаби.

² Гьез гьесда гьикъана: – Гьаб хӀалтӀи гьабизе ихтияр бугебищ дур? Лъица дуе гьеб ихтияр кьураб? – абун.

³ ГӀисаца гьезда абуна: – Дицаги кьела нужее цо суал. Бице:

⁴ лъадалъ ччун рахъун гӀадамал рацӀцӀад гьаризе ихтияр ЯхӀяе кисан щун букӀараб: зобалаздасанищ яги гӀадамаздасанищ?

⁵ Цоцазда гьоркьоб хабар ккана гьезул. «Зобалаздасан букӀанин абуни, гьес абила гури, щайха нуж ЯхӀяда божичӀелилан.

⁶ ГӀадамаздасан букӀанин абуни, тӀолабго халкъалъ ганчӀица чӀвала нилъ, ЯхӀя гьез авараглъун рикӀкӀунев вугелъул».

⁷ Кисан гьеб ихтияр букӀарабали жидеда лъаларилан кьуна гьез жаваб.

⁸ ГӀисаца гьездаги абуна: – Дица нужедаги бицинаро лъил ихтияралдалъун гьаб иш гьабулеб бугебали.

ЦӀолбол ах ижараялъе кьун тарасул хӀакъалъулъ

⁹ Цинги гьес, халкъалдехун вуссун, мисал бачун, гьадинаб хабар бицине байбихьана: – Цо чияс цӀолбол ах гьабун буго. Цинги ахихъабазухъе ижараялъе гьеб ахги кьун, гьев чи къватӀиве ун вуго ва гӀемераб заманаялъ гьенив чӀун вуго.

¹⁰ ЦӀибил барщараб мехалъ, гьес дол ижарачагӀазухъе цо рагьтӀател витӀун вуго жиндие кколеб бутӀа кьейин абейилан. Доз гьев рагьтӀател вухун вуго ва чӀового нахъе хъамун вуго.

¹¹ Цоги рагьтӀател витӀун вуго дос. Вухун-кьабун, инжит гьавун доз гьевги чӀового нахъе хъамун вуго.

¹² Лъабабилевги витӀун вуго дос. Доз гьев лъукъ-лъукъун къватӀиве рехун вуго.

¹³ Щибдай дица гьабилебилан ракӀалде ккун буго ахил бетӀергьанасда. «Дица гьезухъе витӀила дирго вокьулев вас. ГьесулгӀаги хӀурмат гьабилеб батила доз».

¹⁴ Гьев вихьараб мехалъ, дол ижарачагӀаз цоцазда абун буго: «Гьале гурищ ирсилав, рачӀа гьав чӀвазе, – ирсги нилъеего хутӀизе».

¹⁵ Ахикьа къватӀивеги рехун, чӀван вуго доз гьев вас. Гьанже гьел ижарачагӀазе щибдай гьабила ахил бетӀергьанас?

¹⁶ ВачӀинеги вачӀун, чӀвала гьес гьел, ахги цогидазухъе кьела. Харбихъ гӀенеккараз абуна Аллагьас цӀунагийилан.

¹⁷ – Гьедин батани, – ян гьикъана ГӀисаца, гьезухъги валагьун, – ТӀехьалда хъван бугеб гьадинаб калимаялъул магӀна щибали лъалищ нужеда: «Къадалъ лъезецин ярагьунарилан къадахъабаз нахъе рехараб гамачӀ битӀахъе цололъ лъун буго»?

¹⁸ Гьеб ганчӀиде вортаравщинавги щущан ине вуго, бортун бачӀун гамачӀ тӀад речӀчӀаравги чӀинтӀизе вуго.

¹⁹ Диниял гӀалимзабазе ва чӀахӀиял кашишзабазе бокьун букӀана, гьебсагӀатго кквезеги ккун, ГӀиса жанив тӀамизе, амма халкъалъукьа хӀинкъун тана. Гьеб мисал ГӀисаца жидер рахъалъ бачараб букӀин бичӀчӀана гьезда.

Къайсарасе магъало кьеялъул хӀакъалъулъ

²⁰ Цинги ГӀисада хадуб хал кквезе лъугьана гьел ва жасусал ритӀана, жалго рацӀцӀадал чагӀи ругеб ххвел гьабун, ГӀисал кӀал таризабизе кӀоларищали хӀалбихьеян. Ккун вачун сардарасда кодове кьун, гьес ГӀисае тамихӀ гьабизе гӀураб гӀайиб-хатӀа балагьизе бокьун букӀиндалха гьезие.

²¹ Гьел жасусаз ГӀисада гьикъана: – Я, МугӀалим! Нижеда лъала дур рагӀиги вагӀзаги ритӀухъаб букӀин. Гьурмахъ балагьун иш гьабулеб гӀамалги дур гьечӀо, Аллагьасул хӀакъаб нух буго дур малъиги.

²² Бице нижеда, къануналда рекъон, къайсарасе магъало кьезе бегьулебищ нижеца яги бегьуларебищ?

²³ Гьезул хӀилла-макру бичӀчӀун, ГӀисаца абуна: –

²⁴ Цо динар бихьея дида. Лъил суратги хъвай-хъвагӀайги гьалда бугеб? Къайсарасул бугилан абуна гьез.

²⁵ – Гьедин батани, къайсарасулаб къайсарасе кье, Аллагьасулаб Аллагьасе кье, – ян абуна ГӀисаца гьезда.

²⁶ Гьедин жасусазухъаги бажаричӀо гӀадамал ругеб бакӀалда ГӀисахъа рагӀи бахъизе. Гьесул жавабалъ хӀикмалъизарун, руцӀцӀун чӀана гьел.

Хварал тӀаде рахъинариялъул хӀакъалъулъ

²⁷ Цинги ГӀисахъе рачӀана къиямасеб къоялъ хварал тӀаде рахъине рукӀиналде инкар ккун чӀарал саддукеял абулел гӀадамал. Гьез ГӀисада абуна:

²⁸ – Я, МугӀалим! Мусаца нилъее бихьизабун буго: цо пуланав чиясул вац хвани, гьесдасан лъимерги нахъе хутӀичӀони, гьесул вацас яче абе жиндирго хварав вацасул лъади, дов хварав вацасул наслу къинчӀого букӀине.

²⁹ Масала, анкьго вац вукӀун вуго. ЧӀужу ячун хадув, лъимер гьабилалдего хун вуго кӀудияв вац.

³⁰ Гьесул чӀужу ячун йиго хадусев вацас, гьевги хун вуго.

³¹ Лъабабилевги хун вуго. Гьедин цо-цоккун хун, анкьавго вацасул рижи лъугьун гьечӀо.

³² Ахиралда хун йиго гьезул йикӀарай чӀужуги.

³³ ХӀасил, гьей анкьго росасул лъадилъун йикӀарай гӀадан къиямасеб къоялъ лъил чӀужулъун йикӀине йигей? Гьезие жавабалъе ГӀисаца абуна:

³⁴ – Дуниялалъул рукъалъул бихьиназ лъудбиги рачуна, руччаби россабазеги уна.

³⁵ Амма къиямасеб къоялъ тӀаде рахъун ахираталъул рукъалъе мустахӀикълъаразул я лъудби, я росал рукӀине гьечӀо.

³⁶ ТӀокӀалъ хвезеги холаро гьел, малаикзабазда бащалъулелъул гьел ва хваралъуса гьес чӀаголъизарурал Аллагьасул лъималлъунги кколелъул.

³⁷ ЦӀа рекӀун бугониги, бухӀунго лъугӀулареб хъархъилъан жинда рагӀанин: «Дун вуго Ибрагьимил Аллагь, ИсхӀакъил Аллагь, Якъубил Аллагь!» – абун БетӀергьанас ахӀулеб гьаракьилан бицунеб бакӀалда, Мусацаги бихьизабулеб буго хварал чӀаголъизе ругилан.

³⁸ Аллагь – гьев хваразул Аллагь гуро, чӀагоязул Аллагь вуго, гьесие киналгоги чӀагоял ругелъул.

³⁹ Гьебмехалъ цо-цо диниял гӀалимзабаз абуна: – Я, МугӀалим! ЦӀакъ лъикӀ абуна дуца, – ян.

⁴⁰ ТӀокӀаб лъилниги бахӀарчилъи гӀечӀо ГӀисада щибниги гьикъизе.

«Давудил вас гуро МасихӀ»

⁴¹ Гьес гьезда абуна: – Давудил вас вугин МасихӀилан щай абулеб?

⁴² Туркабазул Хирияб ТӀехьалда (Забуралда) Давудица жинцаго абулеб бугогури: «ТӀадегӀанав Аллагьас дир БетӀергьанасда абуна: „Дир кваранаб рахъалда гӀодов вукӀа,

⁴³ дица дур тушбаби дур хӀатӀал лъураб бакӀалда цере чӀезаризегӀан“».

⁴⁴ Гьедин Давудица жинцаго гьесде жиндир БетӀергьанилан абулеб бугони, Давудил вас кин гьев кколев?

«Диниял гӀалимзабаздаса цӀунун чӀа нуж!»

⁴⁵ ТӀолабго халкъалда рагӀиледухъ абуна ГӀисаца жиндирго муридазда:

⁴⁶ – Воре, гьал диниял гӀалимзабаздаса цӀунун чӀа нуж. Гьезие бокьула халатал гӀабабиги ретӀун хьвадизе, базаркъотӀноб халкъалъ жидеего салам кьезе, синагогабазда жанир киназдасаго церегӀан гӀодор чӀезе ва гьоболлъухъ кванил тӀотӀода нахъа бищунго хӀурматияб бакӀ кквезе.

⁴⁷ Росал хун хутӀарал къоролзабазул боцӀи-рикъзи кванала гьез ва рихьдаего халатал дугӀаби гьарула. Гьеб кинабго цӀикӀкӀун гьабунагӀан гӀасияб букӀине буго гьезие тамихӀ.