Лука 2 - Аллагьасул Калима

2 бетӀер Марямие Вас гьавула

¹ Гьеб букӀана кинабго халкъалъул хъвай-хъвагӀай гьабейилан Август къайсарил амру бачӀараб заман.

² Сириялда сардарлъун Квириний таралдаса хадуб халкъалъул тӀоцебесеб хъвай-хъвагӀай букӀана гьеб.

³ Жиде-жидер шагьаралде хъвай-хъвагӀаялъе унел рукӀана гӀадамал.

⁴ Галилеялъул Назарет шагьаралдаса вахъун Юсупги ана Ягьудиялда бугеб Бетлегьем абулеб Давудил шагьаралде хъвай-хъвагӀаялъе, гьев вукӀиндал Давудил наслу-зурияталъул чи.

⁵ Цадахъ ячун йикӀана гьесие магьари лъурай, лъимер гьабизе мех щварай Марямги.

⁶ Гьале гьадаб шагьаралде щвараб мехалъ, лъимер гьабизе хӀара чӀвана гьелда.

⁷ Марямица гьавуна жиндирго тӀоцевесев вас. Петералда гьезие рещтӀине бакӀ щун букӀинчӀелъул, кьуща-рущан цо руссниб лъуна гьелъ лъимер.

ГӀухьбузухъе вачӀун малаикас рохел бицуна

⁸ Сардилъ жидерго рехъен цӀунун рорчӀуда чӀарал гӀухьби рукӀана гьенир цо гӀалахалда.

⁹ Гьезухъе рещтӀана Бичасул малаик. БетӀергьанасдасан бачӀараб гвангъараб нуралъ къалъ-къалъизаруна гьел гӀухьби, гӀасияб хӀинкъиялъ къахӀан ккуна гьел.

¹⁰ – ХӀинкъуге, – ян абуна гьезда малаикас. – ТӀолабго гӀаламалъего гӀахьалаб кӀудияб рохел бицине вачӀун вуго дун нужехъе.

¹¹ Давудил шагьаралда жакъа гьавуна жинца нуж хвасар гьаризе вугев ТӀадегӀанав МасихӀ.

¹² Гьелъие гӀаламатги буго нужее: руссниб лъун батила нужеда кьущараб лъимер.

¹³ Цойидасанго зобалаздасан малаикзабазул бо рещтӀана гьев малаикасда аскӀоб. Аллагьасе рецц гьабулаго гьез ахӀулеб букӀана:

¹⁴ – ТӀадегӀанал зобалазда – Аллагьасе рецц! ГӀодоб ракьалда – разилъаразе рекъел!

¹⁵ Малаикзаби зодире тӀадруссун роржун индал, гьал гӀухьбуз цоцазда абуна: – БетӀергьанасдасан нилъехъе бачӀараб гьаб хабаралъул хӀакъикъат лъазе, Бетлегьемалде рилълъине рачӀа, – ян.

¹⁶ ГӀедегӀун доре щведал, гьазда Марямги ятана, Юсупги ватана, руссниб лъун Лъимерги батана.

¹⁷ Лъимер бихьарабго, гӀухьбуз бицана малаикасдасан гьеб Лъимадул хӀакъалъулъ жидеда рагӀарабщинаб.

¹⁸ Гьеб рагӀанщинав чи хӀикмалъизавуна гӀухьбузул хабаралъ.

¹⁹ Марямицани гьел киналго рагӀаби хазина гӀадин рекӀелъ цӀунана, ва гьелъул пикрабазда йикӀунаан гьей.

²⁰ Малаикас жидеда бицухъе иш ккун батидал, бихьаралъухъги рагӀаралъухъги Аллагьасе тасбихӀги реццги гьабулаго нахъруссун ана гӀухьби.

Иерусалималъул Мукъадасаб Рокъове восун вачӀуна ГӀиса

²¹ Микьго къо байдал, Васасе сунат гьабураб мехалъ, гьесие кьуна эбелалъул ургьив гьев хулилалдего малаикас абун букӀараб ГӀиса абураб цӀар.

²² Мусал къануналда рекъон, лъимер гьабун хадуб гьел рацӀцӀад гьаризе кколел къоял тӀаде щведал, гьез Вас Иерусалималде вачана БетӀергьанасе назру гьавун кьезе.

²³ (БетӀергьанасдасан бугеб къануналда рекъон тӀоцебе гьабураб бихьинаб рижи БетӀергьанасул назрулъун рикӀкӀунаан.)

²⁴ Гьебго къануналда рекъон, къурбаналъе хъвезе кколаан кӀиго рохьил микки яги кӀиго миккидул тӀинчӀ.

²⁵ Доб заманаялда Иерусалималда вукӀана Симеон абурав цо чи. Гьев вукӀана жиндилъ иманги варагӀги бугев, Исраилил халкъ хвасарлъиялъухъ урхъарав чи. Илагьияб РухӀ жинде гӀагарлъарав чиги вукӀана Симеон.

²⁶ Илагьияб РухӀалъ гьесие илгьам гьабун букӀана Бичасул МасихӀ вихьичӀого гьев хвезе гьечӀилан.

²⁷ Илагьияб РухӀалъин гьев доб къоялъ Мукъадасаб Рокъовеги вачун вачӀарав. Эбелалъги инсуцаги гьитӀинав вас ГӀисаги вачун вачӀана гьениве, къануналъул гӀадат тӀубазабизе.

²⁸ Симеоница, гьевги кодове вачун, Аллагьасе реццги гьабун, гьадин абуна:

^29-32 – Я, дир БетӀергьан, дун дур лагъ, дур къотӀи тӀубан, гьанже парахатго къадаралде щолев вуго, дирго беразда бихьидал дуца хӀадурун букӀараб хвасарлъи. Гьаб буго киналго халкъал кантӀизарилеб Нур ва дурго Исраилил халкъалъул къадру-рецц!

³³ Симеоница васасул хӀакъалъулъ абурал гьел рагӀабаз гӀажаиблъизаруна Юсупги Марямги.

³⁴ Симеоница гьезие дугӀа гьабуна ва гьесул эбел Марямида абуна: – Гьале гьаб Лъимер сабаблъун Исраилил халкъалъул гӀемерисел гӀодор ккела ва гӀемерисел тӀаде рахъина.

³⁵ Дурги рекӀелъ ханжар къазе буго. Гьаб Лъимер лъугьина Аллагьасул гӀаламатлъун, амма гӀемерисез гьелда дагӀба базе буго, гьелдалъун гӀемерисезул рекӀелъ ругел къасдал загьирлъила.

³⁶ Гьений йикӀана Ашерил наслуялъул Пенуэлил яс ХӀаннат, жиндилъ кашпу-карамалъи бугей, цӀакъго херай гӀадан. Анкьго соналъ гурони росасда цадахъ гӀумру тӀамичӀо гьелъ.

³⁷ Гьелдаса хадуб ункъоялда ункъо сон къороллъуда арай гьей, къасиги къадги кӀал ккун, какал ран, кидаго Мукъадасаб Рокъоса къватӀие яхъинчӀого, БетӀергьанасе тӀагӀат-гӀибадаталда чӀун йикӀана.

³⁸ Гьебмехалъ, аскӀоеги ячӀун, Аллагьасе реццги гьабун, гьеб Лъимадул хӀакъалъулъ бицана гьелъ Иерусалим хвасарлъиялъухъ урхъун рукӀаралщиназда.

³⁹ БетӀергьанасдасан бугеб къануналда рекъон кинабго ишги тӀубазабун, гьел Галилеялде, жидерго Назарет шагьаралде, тӀадруссана.

⁴⁰ Вас кӀудияв гӀолев вукӀана, гӀолохъанлъиялде вахунев вукӀана, гӀакълу цӀубалеб букӀана. Аллагьасул баркат бессун букӀана гьесулъ.

ГьитӀинав ГӀиса Иерусалималъул Мукъадасаб Рокъове вачӀуна

⁴¹ Щибаб соналъ гьесул эбелги эменги унаан Иерусалималде Пасхаялъул байрамалде.

⁴² АнцӀила кӀиго соналде ГӀиса вахиндалги, гӀадаталда рекъон, Иерусалималде байрамалде ана гьал, гьевги вачун.

⁴³ Байрамалъул къоял индал, ал тӀадруссана, гьитӀинав ГӀиса Иерусалималдаго чӀана. Юсупидаги васасул эбелалдаги лъачӀо гьев гьенив чӀаравлъи.

⁴⁴ Цогидазда цадахъ ун ватилин гьевилан тана гьаз. Цо къойил нух тедал, гӀага-божаразда гьоркьов гьев валагьизе лъугьана гьал.

⁴⁵ Гьевги ватичӀого, тӀадруссун гьев валагьизе Иерусалималде ине ккана.

⁴⁶ Гьале лъабабилеб къоялъ гьазда гьев Мукъадасаб Рокъов ватана мугӀалимзабазда гьоркьов, гьезухъ гӀенеккун ва гьезда цӀехолдулев.

⁴⁷ ГӀенеккаралщинал хӀикмалъизарун рукӀана гьесул гӀакъиллъиялъ ва жавабазул камиллъиялъ.

⁴⁸ Гьев вихьидал, гӀажаиблъун хутӀана Юсупги Марямги. Эбелалъ гьесда абуна: – Я, дир лъимер, дуца нижее гьабураб щиб? Гьав дур эменги дунги чӀезе къадар тӀагӀун рукӀана мун валагьулел.

⁴⁹ Гьес гьазда абуна: – Дун валагьиго щай нужее букӀараб? Нужеда лъачӀебищ дун дирго Инсул рокъов вукӀине кколевлъи?

⁵⁰ Амма гьазда бичӀчӀичӀо гьел рагӀабазул магӀна.

⁵¹ Вахъун гьазда цадахъ Назареталде вилълъана гьев ва гьазие мутӀигӀлъун чӀана. Амма гьесул эбелалъ рекӀелъ цӀунун рукӀана гьел рагӀаби.

⁵² Сонал анагӀан, ГӀисал черх цӀубалеб букӀана, гӀакълу камиллъулеб букӀана, Аллагьасулги гӀадамазулги рокьи цӀикӀкӀунеб букӀана гьесдехун.