Лука 18 - Аллагьасул Калима

18 бетӀер Къоролалъулги къадиясулги мисал

¹ Цинги ГӀисаца жиндирго муридазда, мисал бачун, бицана Аллагьасда гьардезе ккеялъул ва хьул къотӀизе бегьунгутӀиялъул хӀакъалъулъ хабар.

² – Цо шагьаралда вукӀун вуго Аллагьасукьаги хӀинкъуларев гӀадамазукьаги нечоларев цо къади.

³ Гьебго шагьаралда йикӀун йиго цо къоролайги. Гьей щибаб къойил ячӀуней йикӀун йиго гьев къадиясухъе цо пуланав жиндир дагӀбадуласдаса жий цӀунеян.

⁴ Амма къади гӀемераб мехалъ разилъун гьечӀо. Ахирги цо къоялъ гьес пикру гьабун буго: «Я Аллагьасукьа хӀинкъуларо дун, я гӀадамазукьа нечоларо.

⁵ Амма гьадай къоролалъ дие рахӀат толеб гьечӀелъул, дица гьелъул къваригӀел тӀубан лъикӀ, гурони – гьелъ, нахъаса къотӀичӀого гьание хьвадун, дир бетӀер сверизабила».

⁶ Бихьулищ Аллагь рикӀкӀунарев къадиясулгицин ккараб пикру? – ян абуна ГӀисаца гьезда. –

⁷ Къасиги къадги жиндир цӀобалде хьул лъун, гьари-дугӀаялда жинде ахӀделел ругел тӀаса рищарал лагъзал Аллагьасги цӀуниларищ? Гьезул мурад тӀубазабизе кватӀилищ гьев?

⁸ Дица нужеда абулеб буго: гьес гьел хеккого цӀунила. Амма ГӀадамил Лъимер вачӀараб мехалъ, божи-иман батиладай гьесда гьаб ракьалда?

Магъало бакӀарулев чиясулги фарисеясулги мисал

⁹ Цоги ГӀисаца, мисал бачун, бицана жалго вализабийиланги чӀун, цогидал къабихӀ гьарулел цо-цо гӀадамазул хӀакъалъулъ гьадинаб хабар:

¹⁰ – Аллагьасе дугӀаялъе Мукъадасаб Рокъове лъугьун вуго кӀиго чи: магъало бакӀарулев чиги фарисеявги.

¹¹ Жиндирго бакӀалда вахъун чӀун, фарисеяс рекӀелъ дугӀа гьабун буго: «Я, дир Аллагь! Дуе рецц буго дун цогидазда релълъарав вижичӀелъул; хъачагъазда, макручагӀазда, зиначагӀазда, хӀатта гьав магъало бакӀарулев чиясда релълъарав гьечӀелъул.

¹² Анкьида жаниб кӀиго къоялъ кӀал ккола дица, дие щварабщиналъул хайиралъул анцӀил бутӀа садакъаде кьола».

¹³ Магъало бакӀарулев чийин абуни дова нахъегӀан чӀун вукӀун вуго, берал зодихъе руссинаризецин намуслъун. Амма, керенги бухулаго, абулеб букӀун буго гьес: «Я, дир Аллагь! Мунагьазул цӀурав дида гурхӀа!» – абун.

¹⁴ Дица нужеда абулеб буго: дов фарисеясда данде ккуни, гьев магъало бакӀарулев чи Аллагьасда цеве цӀикӀкӀунго вацӀцӀалъун тӀадвуссана жиндирго рокъове. Жинцаго живго тӀадегӀанлъизавурав гӀодовегӀанлъула, живго гӀодовегӀанго чӀарав тӀадегӀанлъичӀого хутӀуларо.

ГӀисахъе лъимал рачун рачӀуна

¹⁵ ГӀисинал лъималги рачун рачӀунаан ГӀисахъе, гьезда тӀад квер бахъеян гьарун. Муридазда гьеб бихьидал, гьез гьел риччалел рукӀинчӀо.

¹⁶ Амма ГӀисаца, лъималги аскӀоре ахӀун, муридазда абуна: – Риччанте лъимал дихъе рачӀине, гьезие квекӀен гьабуге. Гьединазейин Аллагьасул ПарччахӀлъи щун бугеб!

¹⁷ ХӀакълъун абулеб буго дица нужеда: Аллагьасул ПарччахӀлъи лъимаца гӀадин къабул гьабичӀев чиясе гьенибе нух гьечӀо.

Аллагьасул ПарччахӀлъиги инсанасул бечелъиги

¹⁸ Цо кӀудияв хӀакимас ГӀисада гьикъана: – Я, лъикӀав МугӀалим! Абадияб рукъалъул бутӀа щвеялъе щиб дица гьабизе кколеб?

¹⁹ ГӀисаца гьесда абуна: – Щай дуца дида лъикӀавилан абулеб? Щивниги лъикӀав вукӀунаро, цохӀо Аллагь гурони!

²⁰ Дуда лъалагури Аллагьасул амруял: «зина гьабуге», «чи чӀваге», «цӀогьодуге», «гьересинугӀлъи гьабуге», «эбел-инсул адаб-хъатир гьабе».

²¹ Гьес ГӀисада абуна: – ГӀолохъанаб мехалдасаго тӀуразарулел руго дица гьел амруял.

²² ГӀисаца абуна: – Цо жо буго дуе камун. Дурго бугеб кинабго боцӀи-рикъзи биче ва мискин-пакъирасе садакъаде кье, гьелъухъ дуе насиблъила зобалазул хазина. Цинги дихъе вачӀа, дида цадахъ вилълъине.

²³ Гьеб рагӀидал, дов чи цӀакъ пашманлъана. Гьев вукӀун вуго кутакалда бечедав чи.

²⁴ Гьесухъ валагьун ГӀисаца абуна: – Бечедав чиясе Аллагьасул ПарччахӀлъиялде лъугьине захӀмалъулеб куц!

²⁵ РукӀкӀадул ролъиялъусан лъугьине вараниялъего бигьа букӀина Аллагьасул ПарччахӀлъиялде ворчӀизе бечедав чиясеялдаса.

²⁶ Гьесухъ гӀенеккун рукӀараз гьикъана ГӀисада: – Гьедин батани, хвасарлъизе кӀолев чигӀаги щивдайха?

²⁷ Гьес жаваб кьуна: – Инсанасда кӀоларебги Аллагьасда кӀола, – ян.

²⁸ Пётрица абуна: – Гьале нижерго бугебщинабги рехун тун, ниж дуда хадур рилълъана…

²⁹ ГӀисаца гьезда абуна: – ХӀакълъун абулеб буго дица нужеда: Аллагьасул ПарччахӀлъиялъе гӀоло мина-рукъги, лъимал-хъизанги, вацал-яцалги, эбел-эменги рехун тарав цониги чи хутӀизе гьечӀо,

³⁰ гьелъухъ гьаб заманаялда гӀемерго цӀикӀкӀараб шапакъат щвечӀого, ва ахираталъул рокъоб абадияб гӀумру насиблъичӀого.

ГӀазаб-гӀакъубаялъул хӀакъалъулъ – лъабабизеги

³¹ Жиндирго анцӀила кӀиявго муридги аскӀове ахӀун, ГӀисаца абуна: – Гьале нилъ Иерусалималде унел руго. ГӀадамил Лъимадул хӀакъалъулъ цебеккунго Аллагьас аварагзабазда лъазабун букӀараб хӀукму тӀубала гьениб.

³² Гьев цогидаб халкъалъул гӀадамазда кодове кьела, гьезги инжит-хӀакъир гьавила, тӀаде тударила,

³³ вухила-кьабила, цинги чӀвала ва хун лъабабилеб къоялъ гьев чӀаголъила.

³⁴ Амма гьезда щибниги бичӀчӀичӀо. Гьел рагӀабазул магӀна босизе бажаричӀо гьезухъа. Сундул хӀакъалъулъ бицунеб бугебали лъачӀо гьезда.

Иерихоналде щолаго, ГӀисаца цо бецав чи сахлъизавула

³⁵ Иерихон шагьаралде щолаго, цо бецав чи ватана нухлул ракьанда кӀусун гьарделев.

³⁶ ГӀадамазул руккел аскӀосан унеб рагӀидал, щиб ккарабилан гьикъана гьес.

³⁷ Гьесда бицана Назареталдаса ГӀиса вугин гьанисан вачӀунев.

³⁸ Гьебмехалъ гьардухъан ахӀдана: – Я, Давудил вас ГӀиса! ГурхӀа мун дида!

³⁹ Гьесда цересан унел гӀадамазе бокьун букӀана гьардухъан вуцӀцӀун чӀезавизе. Амма гьес дагьабги гьаракь борхун ахӀана: – Я, Давудил вас! ГурхӀа дида! – ян.

⁴⁰ Гьенив лъалхъун, ГӀисаца абуна гьев жинда аскӀове вачеян.

⁴¹ – Дица щиб гьабизе дуе бокьун бугеб? – абун гьикъана гьесда ГӀисаца. Дос абуна: – Я, БетӀерчӀахъад! Беразда нахъеги канлъи бихьизе бокьун буго!

⁴² ГӀисаца гьесда абуна: – Валагье гьанже! Дурго божи-иманалъ сахлъизавуна мун.

⁴³ ГьебсагӀат канлъи бихьун, ГӀисада цадахъ вилълъана гьев, Аллагьасе реццги гьабулаго. Гьеб бихьун, киналго гӀадамалги Аллагьасе рецц гьабизе лъугьана.