Лука 17 - Аллагьасул Калима

17 бетӀер ГӀисал цо-цо гӀакълаби

¹ Жиндирго муридазда ГӀисаца абуна: – Инсан мунагьалъукье ккезавулеб жо дуниялалда лъугьинчӀого букӀунаро, амма кӀудияб балагьги гӀазабги – гьеб босун вачӀарав чиясе.

² Дида божулезда гьоркьоса цониги лъимер гӀадинав пулан мунагьалде цӀазегӀан, гьесие лъикӀаб букӀинаан, гьобоги горбода бухьун, ралъдалъе рехани.

³ Ворегиха, нуж гьелдаса цӀуне. Вацас дуе квешлъи гьабуни, гьесие бадибчӀвай гьабе. Гьев рекӀекълъани, тӀасалъугьун те.

⁴ Къода жаниб анкьго нухалъ гьес дуе квешлъи гьабуниги, анкьабго нухалъ духъе вачӀун, гьес жив рекӀекълъанилан абуни, – тӀасалъугьа гьесдаса.

⁵ Гьебмехалъ чапарзабаз ТӀадегӀанав ГӀисада абуна: – Нижер рекӀелъ божи цӀикӀкӀинабе, – ян.

⁶ ТӀадегӀанав ГӀисаца абуна: – Горчицаялъул хьодул мугьгӀанасеб божигун нужеца гьаб инжиралъул гъотӀода абуни, кьолболъа бахъун ун доба ралъдал бакьулъ чӀаян, нужер амру гьелъ тӀубазабилаан.

⁷ Нужер цонигиясул цо лагъ вугилан те. Гьев векьарун свакан хуриса яги рохьдодаса вачӀун вугони, хехго кваназе гӀодов чӀаян абулищ гьесда?

⁸ Гьелъул гӀаксалда, гьесда абуларищ хехго квен гьабеян ва дун квана-гьекъон вахъинегӀан дие хъулухъалъе чӀаян, цинги мунгоги квана-гьекъеян?

⁹ Гьеб амру тӀубазабуралъухъ лагъасе баркала кьолебищ?

¹⁰ Гьедин гьабула нужецаги: нужее амру гьабурабщинаб тӀубазабун хадуб, нужеца абула ниж ругин пайда гьечӀел лагъзал, нижеда абураб гурони гьабичӀин нижецаян.

ГӀисаца вацӀцӀад гьавула барасалъ унтарав анцӀго чи

¹¹ Иерусалималдехун валагьун Самариялъулги Галилеялъулги гӀорхъудасан унев вукӀана ГӀиса.

¹² Цо росулъе щолаго, гьесда дандеккана барасалъ унтарав анцӀго чи. РикӀкӀадегӀан чӀун,

¹³ гьез ахӀулеб букӀана: – Я, ГӀиса! НасихӀатчи! ГурхӀа нижеда! – ян.

¹⁴ Гьел рихьараб мехалъ, ГӀисаца абуна: – Рахъа нуж гьанже кашишзабазухъе а ва нужго рацӀцӀалъун рукӀин бихьизабе. Гьениса унаго гьезул чурхдул барасалдаса рацӀцӀалъана.

¹⁵ Живго сахлъун вукӀин бихьун, гьезул цояв, ахӀунго ахӀун Аллагьасе рецц гьабулаго, тӀадвуссун вачӀана.

¹⁶ Цинги, ГӀисал хӀатӀазда цеве накалдаги чӀун, гьесие баркала кьуна. Гьевни Самариялдаса чи вукӀана.

¹⁷ ГӀисаца гьесда абуна: – Нужер анцӀавго сахлъичӀевищ? Дов ичӀавго кивеха арав?

¹⁸ Унго, гьав чияр чиясда гурони, дир ракьалдаса цониги чиясда ракӀалде ккечӀебищха Аллагьасе рецц гьабизе?

¹⁹ Цинги гьесда абуна: – Вахъа тӀаде, а гьанже, дурго божи-иманалъ хвасар гьавунин мун.

«Аллагьасул ПарччахӀлъи кида букӀине бугеб?»

²⁰ Аллагьасул ПарччахӀлъи кида букӀине бугебилан фарисеяз гьикъидал, ГӀисаца абуна:

²¹ – Аллагьасул ПарччахӀлъи гӀадамазда бихьичӀого бачӀина. Лъицаниги абиларо гьеб гьале гьаниб бугилан, яги доле доба бугилан. Гьале гьаниб нужелъин бугеб Аллагьасул ПарччахӀлъи.

²² Гьес жиндирго муридазда абуна: – ГӀадамил Лъимер нужеда цадахъ вугеб цо къогӀаги бихьизе нуж гӀащикълъараб заман бачӀина. Амма нужеда гьев вихьиларо.

²³ Нужеда абила гьале гьанив вугин, яги дова вугилан. ГӀенеккуге гьезухъ, унге гьезда хадур.

²⁴ Зобалазул цояб рахъалдаса цоги рахъалде паркъун унеб пири гӀадин вукӀина ГӀадамил Лъимер, гьев вачӀараб къоялъ.

²⁵ Амма цин гьес гӀемераб гӀазаб хӀехьезе ккезе буго, ва гьаб умматалъ гьесдаса инкар гьабизе буго.

²⁶ НухӀ аварагасул заманаялъ ккараб гӀадаб иш ккезе буго ГӀадамил Лъимадул заманаялъги.

²⁷ Квана-гьекъолел рукӀана, лъудби рачунел, россабазе унел рукӀана гӀадамал НухӀ гамида жаниве лъугьинегӀан. Цинги тӀупан тӀуна ва тӀолабго махлукъат лъадалъ гъанкъана.

²⁸ Гьебго жо ккана ЛутӀ аварагасул заманаялъги. Кваналел, гьекъолел, бичулел, хисулел, хурзал рекьулел, минаби ралел рукӀана гӀадамал ЛутӀ авараг Содом шагьаралдаса къватӀиве лъугьинегӀан.

²⁹ Цинги цӀадулги чӀабтӀилги цӀад бана зодисан, ва киналго хвана.

³⁰ Гьедин букӀине буго ГӀадамил Лъимер загьирлъараб мехалъги.

³¹ Гьеб къоялъ тӀохда вугев чи жиндирго къайи-къоноялда хадув гъоркье рещтӀунгеян абе, хурив вугевги рокъоб хутӀаралда хадув тӀадвуссунгеян абе.

³² ЛутӀ аварагасул чӀужуялъул ккараб иш ракӀалда чӀезабе.

³³ Жиндирго гӀумру цӀунизеян лъугьарав чи гьелдаса махӀрумлъила; жиндирго гӀумруялдаса махӀрумлъизе разилъарас гьеб хвасар гьабила.

³⁴ Дица абулеб буго нужеда: гьеб сордоялъ цо боснор регун ругел кӀигоязул цояв вачина, цогидав хутӀила.

³⁵ ГӀатӀ ххенолей йигей кӀиго чӀужугӀаданалъул цояй ячина, цогидай хутӀила.

^36-37 Муридаз ГӀисада гьикъана: – Я, БетӀерчӀахъад! Киб гьеб букӀине бугеб? – ан. Гьес жаваб гьабуна: – Жаназа бугеб бакӀалде чудкал ракӀарула, – ян.