Лука 16 - Аллагьасул Калима

16 бетӀер Божизе бегьуларев хъулухъчиясул хӀакъалъулъ

¹ Жиндирго муридазда ГӀисаца бицана: – Цо бечедав чиясул вукӀун вуго гьесул мал-мулкалъул тӀалаб гьабун тарав хъулухъчи.

² Жиндир мал-мулк чӀунтизабулеб бугин гьесилан рагӀидал, аскӀове ахӀун, гьесда абун буго: «Гьаб лъикӀаб гуреб хабар щиб дур хӀакъалъулъ дида рагӀулеб бугеб? Гьанже дуца хъван кье дихъе тӀаде бачӀаралъулги харж гьабуралъулги сияхӀ. ТӀокӀалъ дица мун гьеб хъулухъалда толаро», – ян.

³ Гьебмехалъ хъулухъчияс жинцаго жиндаго абун буго: «Щибдай дица гьабила? Гьанже дун гьас хъулухъалдаса вахъулев вуго. Хур гьанкӀизе дида кӀоларо, гьардухъ ине дун намуслъула.

⁴ Гьа, дида лъала щиб гьабилебали. Гьес хъулухъалдаса вахъараб мехалъ цогидаз дун жидерго къавулъе вачунеб куц гьабила дица».

⁵ Гьес жиндирго хважаинасул налъулал батӀа-батӀаго ахӀун руго жиндихъего. ТӀоцеве ахӀарасда гьикъун буго дир хважаинасе дуца кигӀан кьезе бугебан.

⁶ Нусго рагӀ зайтуналъул нахул кьезе бугилан гьес абидал, бахъун нахъе кьун буго налъи тӀад хъвараб кагъат: «Хехго гӀодов чӀун цӀидасан хъвай кӀикъоялда анцӀго букӀанилан».

⁷ Цогидасда гьикъун буго дуца щиб кьезе бугебан. Нусго къали ролъул кьезе бугилан бициндал, гьесдаги абун буго: «Ма гьаб кагъатги нахъе босе, цӀидасан хъвай ункъого букӀанилан».

⁸ Хадув хважаинас гьев веццулаан, сихӀиргони гьабунин гьес гьеб ишилан. Гьедин гьаб дуниялалъул рукъ къачӀалел чагӀи жалго гӀадал гӀадамазда гьоркьор гӀемерго сихӀирал руго, ахираталъул рукъ къачӀалездаса.

⁹ Гьединлъидал дица нужеда абулеб буго: дуниялалъул рокъоб хачараб боцӀи-рикъзи кьун, нужеца гьанир гьединал гьудулзаби ричун росе, боцӀи-рикъзи гьечӀого хутӀараб мехалъ, абадияб рокъоре нужго къабул гьаризе.

¹⁰ ГьитӀихӀинаб божун тезе бегьулев чиясда кӀудиялъулги божилъи гьабизе бегьула. ГьитӀиналъулъ хӀилла-макру гьабурас кӀудиялъулъги рекӀкӀ гьабула.

¹¹ Дуниялалъул рокъоб хачараб боцӀи-рикъзи божун тезе бегьуларел нужеде абадияб рукъалъул унго-унгояб хазинаялъул божилъи лъица гьабилеб?

¹² Чияр боцӀи божун тезе бегьуларел нужехъе, нужерабгоги лъица кьелеб?

¹³ Лъиданиги кӀоларо кӀиго бетӀергьанасе лагълъи гьабизе. Цояв гьесда рихина, цогидав вокьила. Яги цоясе гьес лагълъи ракӀбацӀцӀадго гьабила, цогидасе тӀаса-масаго гьабила. Гьедин нужедаги кӀвеларо Аллагьасеги дуниялалъул боцӀи-рикъзиялъеги лагълъи гьабизе.

ГӀисаца фарисеял къватӀир чӀвазарула

¹⁴ БоцӀи-рикъзи хириял фарисеял, ГӀисахъги гӀенеккун, гьесда тӀад релъанхъулел рукӀана.

¹⁵ ГӀисаца гьезда абуна: – ГӀадамаз нуж вализабилъун рикӀкӀуна, амма Аллагьасда лъалебха нужер рекӀелъ бугеб жо. ГӀадамазда цебе жиб тӀадегӀанаб, Аллагьасда цебе къабихӀаб буго.

¹⁶ ЯхӀяде щвезегӀанги букӀана диналъул къанун, рукӀана аварагзабиги. Гьев вачӀун хадуб Аллагьасул ПарччахӀлъиялъул хӀакъалъулъ Рохалил хабар бицунеб буго. Щивас хӀаракат бахъулеб буго хӀалица гьенире рорчӀизе.

¹⁷ Амма къануналъул цохӀо хӀарп бортизегӀан, зобалги ракьалги тӀагӀун ина.

¹⁸ ЧӀужуги йиччан тун, цогидай ячаравщинав чи жиндирго йикӀарай чӀужуялда цеве мунагьалъукье ккола. Гьеб мунагьги зиналъун рикӀкӀуна. Росасдаса ятӀалъарай гӀадан ячарав чиги зиначи ккола.

ГӀисаца бицуна цо бечедав чиясулги Лазарилги хӀакъалъулъ

¹⁹ – Цо бечедав чи вукӀун вуго. Гьес ретӀунеб букӀун буго дарай-зарбал. Щибаб къоялъ гьес гӀуцӀулеб букӀун буго бечедаб квана-гьекъей.

²⁰ ТӀолабго черхалде чанхъ барав цо Лазар абун гьардухъанги вукӀун вуго гьесул кавудул кӀалтӀа чӀарав.

²¹ Бечедав чиясул сурпаялдаса хутӀа-кӀучараб квен-тӀехгӀаги щвелародайилан чӀун вукӀун вуго гьев гьенив. ТӀадежоялъеги рекерун рачӀун гьабзаз гьесул чанхъаз цӀураб черхалда тӀад мацӀ бахъулеб букӀун буго.

²² Гьале, хвана гьев пакъир, малаикзабаз гьев Ибрагьим аварагасда аскӀове восун ана. Хвана дов бечедав чиги. Гьев хабалъ вукъана.

²³ Гьале жужахӀалъув квешаб гӀазабалъулъ вугев гьев бечедав чиясда, берал рорхун валагьидал, рикӀкӀадасан вихьана Ибрагьим аварагги гьесда аскӀов дов Лазарги.

²⁴ Бечедав чияс ахӀана: «Я, нижер эмен Ибрагьим! ГурхӀа мун дида! Гьаб цӀадулъ вежулев вугин дун, дир мацӀалда реччел хъвазегӀаги, лъадалъ килищги ччун, витӀе гьев Лазар».

²⁵ Ибрагьимица гьесда абуна: «Я, дир вас, дуца ракӀалде щвезабе: дуниялалъул рокъоб дуе кинабго лъикӀабщинаб щвана, Лазариейин абуни гьениб кинабго квешабщинаб щвана. Гьанже гьанив Лазар хӀалхьун вуго, мун гӀазабалъулъ вуго.

²⁶ Гьав духъе кин витӀилев, нилъеда гьоркьоб кӀудияб кӀкӀал лъугьун бугелъул. Гьединлъидал гьаниса гьенирехун рачӀине бокьаразе нух гьечӀо ва гьениса гьанирехун рачӀинеги бажаруларо».

²⁷ Нахъеги дов чияс гьарун буго: «Гьедин батани, дир эмен, дуца Лазар витӀе дир инсул рокъове.

²⁸ Дова дир щуго вац вуго. Дозда цӀодорго рукӀаян абизе витӀе. Гурони – гьелги рачӀина гьаб гӀазабалъул рокъоре».

²⁹ Ибрагьимица абун буго: «Дозие Мусаги цогидал аварагзабиги руго. Гьезухъ гӀенеккеян абе».

³⁰ Дов бечедав чияс абун буго: «Я, дир эмен Ибрагьим, гӀенеккуларо гьел! Амма цогӀаги хварав чи дуниялалде тӀадвуссун вачӀани – кантӀила, Аллагьасде руссина».

³¹ Гьебмехалъ Ибрагьимица абун буго гьесда: «Мусахъги цогидал аварагзабазухъги гӀенеккуларел чагӀи хваралъуса вахъун вачӀарав чиясдаги божиларо», – ян.