Лука 13 - Аллагьасул Калима

13 бетӀер «Тавбу гьабичӀони, хвалде ина нуж»

¹ Гьебмехалъ ГӀисахъе рачӀун, цо чагӀаз бицана гьесда, Пилатица Галилеялъул гӀадамалги чӀванин ва Мукъадасаб Рокъоб гьез къурбаналъе хъураб боцӀул биялда гъорлъе гьезул биги жубазабунилан.

² ГӀисаца гьезда абуна: – Жидее гьединаб гӀазаб кьурал чагӀи Галилеялъул цогидал гӀадамаздаса мунагь-хӀакъ гӀемерал рукӀаниланищ нужеда ракӀалде кколеб?

³ РукӀинчӀилан абулеб буго дица нужеда: амма тавбу гьабичӀони, нужги гьедин хвалде ина.

⁴ Яги доб Силоамалъул си биххун гъоркье ккун хварав анцӀила микьго чи Иерусалималъул цогидал гӀадамаздаса мунагь-хӀакъ гӀемерал рукӀаниланищ нужеда ракӀалде кколеб?

⁵ РукӀинчӀилан абулеб буго дица нужеда: тавбу гьабичӀони, нужги гьедин хвалде ина.

Инжиралъул гъотӀол мисал

⁶ Цинги ГӀисаца гьезие хабар бицана. Цо чияс ахикь инжиралъул гъветӀ чӀун букӀун буго. ВачӀун хал гьабидал гьелда тӀад пихъ бижун батун гьечӀо.

⁷ Гьес ахихъанасда абун буго: «Гьале лъабабго соналъ вачӀунев вуго дун гьаб гъотӀохъе. Цониги инжир бижун батичӀо гьалда тӀад. КъотӀун рехе гьаб, ракь гӀадада хвезе течӀого».

⁸ Ахихъанас абун буго: «Я, бетӀерчӀахъад! Цо исаналъиялъги жибго те гьеб. Дица гьелъул рохтиялъукь ракьги гьогь гьабила, ракги бала.

⁹ ТӀадеялъул бижизе бегьула гьелда тӀад пихъ. Нагагь бижичӀони, къотӀун рехила».

ГӀисаца сахлъизаюла гьодилъа къуларай цо чӀужугӀадан

¹⁰ Цо шамат къоялъ синагогаялъув вагӀза-насихӀат гьабулев вукӀана ГӀиса.

¹¹ КӀичӀван гьодилъа къуларай цо чӀужугӀаданги йикӀана, тӀаде йорхун яхъун чӀезего кӀоларей. Гьелъул чорхолъ бугеб хъубаб женалъ анцӀила микьго соналъ чӀезаюн йикӀана гьей гьеб гӀазабалъукь.

¹² Гьей йихьидал, аскӀое ахӀун, ГӀисаца гьелда абуна: – Йо, чӀужугӀадан! Мун дурго гӀузруялдаса хвасарлъана, – ян.

¹³ Цинги гьелда тӀад квер бахъана гьес. ГьебсагӀатго гьелъул гьод битӀун бачӀана, Аллагьасе рецц гьабизе лъугьана гьей.

¹⁴ ГӀисаца шамат къоялъ гьей гӀадан сахлъизе гьаюнилан ццин бахъарав синагогаялъул хӀакимас гӀадамаздехун вуссун абуна: – Анкьида жаниб анлъго къо буго нилъ хӀалтӀизе кколеб. Шамат къоялъ рачӀинчӀого, гьел цогидал къояз рачӀа нужго сахлъизаризе.

¹⁵ Гьебмехалъ гьесие жавабалъе ТӀадегӀанав ГӀисаца абуна: – Ле, нуж ххвелал гьаризе ругьунлъараб уммат! Нужеда гъорлъ вугевищ русснадаса бичун нужерго оц яги хӀама шамат къоялъ гьекъезе бачунарев цониги чи?

¹⁶ Ибрагьимил умматалъул гьай чӀужугӀадан анцӀила микьго соналъ юхьун чӀезаюн йикӀана илбисалъ. Жакъа шамат къоялъ дица гьей илбисалъул рухьадаса йичизе бегьулей йикӀинчӀейищ?

¹⁷ ГӀисаца гьедин абидал, гӀадамазда цере инжитлъана дол гьесда дандечӀун рукӀарал чагӀи. Амма халкъин абуни, гьесул киналго хӀикматал ишаздаса бохун букӀана.

Горчицаялъул мугьалъул ва реччеялъул мисалал

¹⁸ ГӀисаца гьезда абуна: – Аллагьасул ПарччахӀлъи сунда релълъунеб ва дица гьеб сунда данде кквезе бегьулеб?

¹⁹ Гьеб релълъуна горчицаялъул хьодул гьитӀинаб мугьалда. Инсанас гьеб хьодул мугь ахикь чӀана, гьелдасан кӀудияб хъарахъ бижана, гьелъул гӀаркьалабазул рагӀдукь хӀанчӀаз бусабиги гьаруна.

²⁰ Нахъеги гьес абуна: – Цоги сунда данде кквелеб дица Аллагьасул ПарччахӀлъи?

²¹ Гьеб данде кквезе бегьула цо пуланай чӀужугӀаданалъ ханждал лъабго къалиялда гъорлъе рехараб ва тӀубанго гьеб беччизабураб реччеялда.

ЧӀедераб нуцӀил мисал

²² Шагьаразде ва росабалъе щун, халкъалъе вагӀзабиги гьарулаго, Иерусалималдехун валагьун унев вукӀана ГӀиса.

²³ Цо чияс гьесда гьикъана: – Я, БетӀерчӀахъад! Дагьал чагӀи гурони хвасарлъунгутӀи битӀараб жойищ? Гьес гьезда абуна:

²⁴ – ЧӀедераб нуцӀихъан жанире лъугьине хӀаракат бахъе нужеца. Дица нужеда абулеб буго: гӀемераз жигар бахъила гьеб нуцӀихъан лъугьине, амма гьезда кӀвеларо.

²⁵ Вахъун рукъалъул бетӀергьанас нуцӀа рахарабго, къватӀирги чӀун, гьеб бухизе ва ахӀдезе лъугьина нуж: «Я, бетӀерчӀахъад! Нижее нуцӀа ричӀе!» – ян. Гьес нужеда абила: «Дида лъаларо нуж киса-щалали».

²⁶ Гьебмехалъ нуж лъугьина гьесда бичӀчӀизабизе: «Ниж руго дуда цадахъ квана-гьекъарал чагӀи, нижер шагьаралъул къватӀазда дуца нижее вагӀзабиги гьарун рукӀана».

²⁷ Гьес жаваб кьела нужее: «Дида лъаларо нуж киса-щалали. РикӀкӀалъе нуж дидаса, ле квешлъи гьабурал киналго гӀадамал!»

²⁸ Аллагьасул ПарччахӀлъиялда Ибрагьимги, ИсхӀакъги, Якъубги ва цогидал аварагзабиги нужеда рихьараб ва нужги гьениса къватӀире рехараб мехалъ, гӀодилел ва цаби къерщезарулел хутӀила нуж.

²⁹ Машрикъалдаса ва магърибалдаса, севералъул ва къилбаялъул рахъалдаса рачӀина гӀадамал ва Аллагьасул ПарччахӀлъиялда квана-гьекъезе гӀодор чӀела.

³⁰ Цере рукӀаразул цо-цоял нахъе ккела, ва нахъа рукӀаразул цо-цоял цере ккела.

ГӀисаца бицуна Иерусалималъул хӀакъалъулъ

³¹ Гьеле гьеб заманаялда ГӀисахъе цо чанго фарисеяв вачӀана, Гьеродие мун чӀвазе бокьун бугин, гьаниса вахъун дурго нухда айилан лъазабизе.

³² ГӀисаца гьезда абуна: – Инеги ун гьеб царада абе нужеца, жундуз ккуралги унтаралги жакъаги метерги сахлъизарилин дица, цинги сезе дица дирго хӀалтӀи лъугӀизабилин.

³³ ХӀакъикъаталдаги жакъаги, метерги, сезеги дун Иерусалималдехун валагьун инчӀого гӀоларо. Гьенив гурони авараг чӀвазе къотӀи гьечӀелъул.

³⁴ Вай, Иерусалим, Иерусалим! Аварагзаби чӀвалеб ва духъе ритӀарал Аллагьасул илчизабазда ганчӀал речӀчӀулеб шагьар! Чан нухалъха дие бокьун букӀараб, къурщица тӀанчӀи гӀадин, дур гӀадамал дирго кваркьиялда гъоркье рачине, амма нужее гьеб бокьичӀо.

³⁵ Балагьея, нужер Хирияб Рукъ чӀобого хутӀила. Дица нужеда абулеб буго: «БетӀергьанас витӀун вачӀунев вугесда баркат лъеги», – ян нужеца абизегӀан вихьиларо нужеда дун гьанжеялдаса хадув.