Лука 10 - Аллагьасул Калима

10 бетӀер Лъабкъоялда анцӀго мурид халкъалъухъе витӀула

¹ Гьелдаса хадуб ТӀадегӀанав ГӀисаца тӀаса вищана жеги лъабкъоялда анцӀго чи ва жиндасаго цере кӀи-кӀиккун ритӀана живго щвезе ракӀалда букӀарабщинаб шагьаралдеги росулъеги.

² Гьес гьезда абуна: – Хуриб хӀалухъен гӀемер бижун буго, хӀалтӀухъаби дагь руго. Гьеб лъилъизе кверщел кодоб бугев БетӀергьанасда гьаре лъилъарухъаби ритӀеян.

³ Гьанже а! Гьале дица нуж ритӀулел руго бацӀазда гъорлъе кьагӀи гӀадин.

⁴ Я гӀарац лъун таргьа босуге, я къайи лъун къвачӀа босуге, я хисун ретӀине хьитал росуге, нухда данде ккарасе саламги кьоге.

⁵ Лъил бакӀалде нуж щваниги, гьезие рекъел гьарун, «Ассаламу гӀалайкум (Рекъел нужее)» абун лъугьа гьесул къавулъе.

⁶ Саламалъе (ай ракълие) мустахӀикъав чи вугони – нужер салам гьесде щвела, гьечӀони – гьеб нужедего тӀадбуссина.

⁷ Гьеб къавулъ чӀа нуж, гьезда цадахъ квана-гьекъон, – хӀалтӀухъанасе мухь хӀалалаб букӀунелъул. Цо къавулъа цоги къавулъе гочаруге.

^8-9 Цо шагьаралде щун, нуж гьенир къабул гьаруни, нужее кьурабги кванай, гьенир ругел унтаралги сахлъизаре, Аллагьасул ПарччахӀлъи нужеде тӀаде гӀунтӀун бугиланги бице гьезда.

¹⁰ Ваамма цо шагьаралде щун, нуж гьенир къабул гьаричӀони, къотӀнореги рахъун, гьадин абе:

¹¹ «Нужер шагьаралда нижер хӀатӀазда тӀад чӀараб хӀургицин нижеца къватӀазде нужеего кӀутӀулеб буго. Амма лъан букӀаха Аллагьасул ПарччахӀлъи тӀаде гӀунтӀун бугеблъи».

¹² Дица нужеда абулеб буго: къиямасеб къоялъ Содомалъул халкъ гӀемерго лъикӀ букӀина гьеб шагьаралъул халкъалдаса.

Балагьги гӀазабги Аллагьасде руссинчӀел шагьаразде

¹³ Балагьги гӀазабги дуе, Хоразин шагьар! Балагьги гӀазабги дуе, Байтсаида шагьар! Амма Тиралъулгун Сидоналъул гӀадамазда рихьун рукӀаралани нужеда рихьарал гӀадинал мугӀжизатал, тӀутӀу-хъухъураб парталги ретӀун, ботӀроде рахъуги бан, ракьалда гӀодорги чӀун, церего руссинаан гьел Аллагьасде.

¹⁴ Гьединлъидалин Тиралъулги Сидоналъулги халкъалъе къиямасеб къоялъ нужееялдаса бигьа букӀине бугеб!

¹⁵ Дудаги, Капернаум, зобалазде бахине гьабилинищ ракӀалде кколеб бугеб? ЖужахӀалъул кӀкӀалахъе рехила мун!

¹⁶ Нужехъ гӀенеккулел дихъги гӀенеккула, нужеде инкар кколез дидеги инкар ккола, диде инкар кколез дун жинца витӀарав Аллагьасдеги инкар ккола.

Лъабкъоялда анцӀавго мурид тӀадвуссун вачӀуна

¹⁷ Лъабкъоялда анцӀавго мурид рохуца холаго тӀадруссун рачӀана. – Я, БетӀерчӀахъад! – ан абуна гьез. – Жундулгицин мутӀигӀлъула нижее, дур цӀар рехсон гьезие амру гьабураб мехалъ.

¹⁸ ГӀисаца гьезда абуна: – Дида бихьана илбис пири гӀадин зодисан бортун унеб!

¹⁹ Гьале дица нужее къудрат кьуна щибго зарал гьечӀого борхьалги ичӀкӀалалги хӀатӀаз мерхьине ва тушманалъул тӀолабго къуват-гучалда тӀад кверщелги кьуна.

²⁰ Амма нуж рохуге хъубал жундул нужее мутӀигӀлъулел ругилан, нуж роха зобалазда жидер цӀарал хъваразда гьоркьор рукӀиналдаса.

«Дуе рецц буго, дир Эмен!»

²¹ Илагьияб РухӀалъ цӀурав ва вохизавурав ГӀисаца гьебмехалъ абуна: – Дуе рецц буго, дир Эмен, зоб-ракьалъул БетӀергьан, цӀодораздаса ва гӀакъилаздаса балъго гьабун, лъимер гӀадиназе гьаб кинабго дуца загьир гьабуралъухъ. Уха, дир Эмен, гьелъулълъидалха бугеб дур цӀобалъул гӀатӀилъи!

²² Кинабго дие дир Инсуца кьураб буго. Инсуда гурони, лъиданиги лъаларо Вас щивали. Васасда ва Эмен жидее загьир гьавизе Васасе бокьарал гӀадамазда гурони, лъиданиги лъаларо Эмен щивали.

²³ Муридаздехун вуссун, цохӀо гьезда абуна ГӀисаца: – Гьардарал гурищха гьаб кинабго бихьулел нужер берал.

²⁴ Дица нужеда абулеб буго: гӀемерал аварагзабазеги парччахӀзабазеги бокьун букӀана нужеда бихьулеб бугеб бихьизе, амма гьезда бихьичӀо. Нужеда рагӀулеб бугеб рагӀизеги бокьун букӀана, амма гьезда рагӀичӀо.

ГурхӀел бугев самариясул хӀакъалъулъ

²⁵ Гьале цо динияв гӀалимчияс, гьесул хӀалбихьизе, суал кьуна: – Я, МугӀалим! Абадияб рукъалъул бутӀа щвезе щиб дица гьабизе кколеб?

²⁶ ГӀисаца гьесда абуна: – Къануналда кин бугеб? Щиб цӀалараб дуца гьелъул хӀакъалъулъ?

²⁷ Дос жаваб кьуна: – «Дурго БетӀергьан Аллагь дуе вокьа дур тӀолабго ракӀалдалъун, дур тӀолабго рухӀалдалъун, дур тӀолабго къуват-жаналдалъун, дур тӀолабго гӀакълу-пикруялдалъун» ва «Мунго гӀадин вокьа дуе дуда аскӀов вугевги».

²⁸ ГӀисаца гьесда абуна: – Дуца битӀун жаваб кьуна. Гьеле гьедин гьабуни, абадияб гӀумру букӀина дур.

²⁹ Живго ритӀухъ гьавизелъун, дов чияс гьикъана: – Щивха кколев «дида аскӀов вугев»?

³⁰ Гьанже ГӀисаца гьесие, мисал бачун, хабар бицана: – Цо чи унев вукӀана Иерусалималдаса Иерихоналде. ТӀаде кӀанцӀун хъачагъаз гьесухъа къайи бахъана, кьабун-вухун, хвалде ккезавун гьевги тун, нахъе ана.

³¹ Гьале цо кашиш ккана досда тӀаде, амма гьев нухлул добцояб рахъалдехун лъугьана.

³² Гьединго цо левитги ккана досда тӀаде, гьевги лъугьана нухлул добцояб рахъалде.

³³ Сапаралда вукӀарав цо самариявги ккана досда тӀаде. Дов вихьаравго, гурхӀизе бачӀун,

³⁴ аскӀове ун, чогъроца чурун ва нах бахун, досул ругънал къачӀана гьес, жиндирго гӀорцӀмидаги рекӀинавун, петералде вачун, досие хъулухъги гьабуна.

³⁵ Нахъисеб къоялъ, петералъул бетӀергьанасе кӀиго динарги кьун, самарияс абуна: «Дуца тӀалаб гьабе досул. Гьалдаса цӀикӀкӀун дуца хвезабизе ккани, тӀадвуссун вачӀунаго гьебги бецӀила дица дуе».

³⁶ Хъачагъаз зулму гьабурасда «аскӀов вугевлъун» щив рикӀкӀинев гьел лъабаздаго гьоркьоса?

³⁷ – Досда гурхӀун кумек гьабуравха, – ян жаваб кьуна динияв гӀалимчияс. ГӀисаца гьесда абуна: – Инеги ун, дуцаги гьедин гьабе, – ян.

Марталги Марямилги хӀакъалъулъ

³⁸ Гьедин ГӀисаги муридалги сапаралда рукӀаго, гьев цо росулъе щвана. Марта абулей цо гӀаданалъ ГӀиса гьоболлъухъ вачана.

³⁹ Гьелъул йикӀана Марям абун яцги. ТӀадегӀанав ГӀисал хӀатӀаахада гӀодойги чӀун, гьесул харбихъ гӀенеккун йикӀана гьей.

⁴⁰ Мартайилан абуни, гьебмехалъ гьезие кӀудияб гьоболлъи гьабизе квалквадилей йикӀана. ГӀисада аскӀое ячӀун, гьелъ абуна: – Я, БетӀерчӀахъад! Дуе агъазго гьечӀо яцалъ дун гьаний квалквадизе тун йикӀиналъул. Дие кумек гьабизе яхъаян абе гьелда.

⁴¹ ТӀадегӀанав ГӀисаца, гьелъие жаваб кьун, абуна: – Марта! Марта! Мун гӀемераб жоялда квер чӀвазе лъугьун йиго,

⁴² амма цо жо кквезе ккола чияс. Гьале Марямица лъикӀаб бутӀа тӀаса бищана, лъиданиги кӀвеларо гьелъухъа гьеб бахъизе.