Эстер 8 - Аллагьасул Калима

Ягьудиязе жалго цӀунизе парччахӀас изну кьей

¹ Доб къоялъ парччахӀ Ахашверошица ягьудиязул тушман Гьаманил кинабго боцӀи-рикъзи Эстер бикае кьуна. Мардохай парччахӀасда цеве ахӀана, гьев щив жиндие кколевали Эстерица бициндал.

² ПарччахӀас Гьаманихъа нахъе босараб баргъич, бахъун Мардохайие кьуна. Эстерицайин абуни Мардохай тӀолабго Гьаманил букӀараб рателалда тӀад тана.

³ Нахъеги Эстер парччахӀасда цее яхъун кӀалъана: гьесул хӀатӀазда цее щапун, гӀодун гьардана, агагӀияв Гьаманица ягьудиязе ургъараб вахӀшияб къисмат хисизабеян.

⁴ ПарччахӀас Эстерил рахъалде балагьун жиндирго меседил гӀанса гӀебеде битӀана. Эстер тӀаде яхъана ва парччахӀасда цее яхъун чӀана.

⁵ Цинги гьелъ абуна: «ПарччахӀасе къабуллъани, ва дида парччахӀасул ракӀ рекъолеб батани, парччахӀасда гьеб иш битӀараблъун бихьани, ва гьев дида гурхӀулев ватани, биччанте гьес буюрухъ кьезе дов АгагӀил наслуялъул чи Гьамедатил вас Гьаманица тӀолалго парччахӀасул вилаятазда ругел ягьудиял гъуреян хъварал кагътал нахъ руссинареян.

⁶ Дир халкъалде тӀаде гьадинаб балагь рещтӀунеб букӀаго, кӀвелищ дида парахат чӀезе, дир агьлу гъурулеб бугони кин дица гьеб хӀехьелеб?»

⁷ ПарччахӀ Ахашверошица Эстер бикадаги ягьудияв Мардохайидаги абуна: «Дица кинабго Гьаманил рател кьуна Эстерие, гьев живгоги хӀобода ван чӀвана, гьес ягьудиял тӀагӀинаризе макру гьабуралъухъ.

⁸ Гьанже нужецаги хъвай парччахӀасул цӀаралдасан ягьудиязе рекъараб буюрухъ, нужеего бокьараб къагӀидаялъ, ва парччахӀасул мугьру тӀад бикӀараб баргъичги чӀвай гьелда. ПарччахӀасул цӀаралдасан хъвараб ва гьесул мугьру тӀад чӀвараб буюрухъ хисулареб букӀуна».

⁹ Хадуб, лъабабилеб моцӀрол, ай сиван моцӀрол къоло лъабабилеб къоялъ ахӀана парччахӀасул катибал, ва Мардохайица малъухъе, хъвана цӀияб буюрухъ. Хъвана кагътал ягьудиязул халкъалъухъе, парччахӀасул Гьиндустаналдаса Эфиопиялде щвезегӀан нусиялда къоло анкьго вилаятазул вазиразухъе, сардаразухъе, киналго халкъазул чӀухӀбузухъе, щибаб халкъалъухъе гьелъул жиндирго мацӀалда ва хъвай-хъвагӀаялда рекъон, гьединго ягьудиязухъе гьезул жидерго мацӀалда ва хъвай-хъвагӀаялда рекъон.

¹⁰ Буюрухъ хъвана парччахӀасул цӀаралдасан ва гьесул мугьруги чӀвана гьелда. ПарччахӀасул чол рехъалъа тӀаса рищарал чуязда рекӀун чапарзаби ритӀана гьел кагътал киса-кирего щвезаризе.

¹¹ Гьеб парччахӀасул буюрухъалда рекъон ягьудиязул ихтияр букӀана жиб-жиб шагьаралда жалго цӀуниялъе гӀоло данделъизе: жиб-жиб агьлуялъул ва вилаяталъул киналго, ягьудиязда данде рахъарал тушбабазул руккелал лъималгун ва руччабигун цадахъ гъурун-чӀван тӀагӀинаризе ва гьезул боцӀи-магӀишатги хъамал гьабизе.

¹² Гьеб иш тӀубазабизе, тӀолалго парччахӀ Ахашверошил вилаятазда чӀезабуна цо къо – анцӀила кӀиабилеб моцӀрол, ай, адар моцӀрол, анцӀила лъабабилеб къо.

¹³ Гьеб хъвай-хъвагӀаялъул кагътал, киналго вилаятазда тӀиритӀизареян, ва, киналго халкъазда рагӀизе ва тушбабаздаса рецӀел босизе, гьеб къоялде ягьудиял хӀадур рукӀине, гьелъул гӀакӀа ахӀеян лъазабуна.

¹⁴ ПарччахӀасул хехал чуязда рекӀун, чапарзаби гӀедегӀана гьесул амру тӀубазабизе. Гьеб буюрухъалъул гӀакӀа ахӀана Шушан хъалаялдаги.

¹⁵ Мардохай парччахӀасухъа къватӀиве вачӀунаго, гьесда ретӀун букӀана хирияб хъахӀаб ва канчӀхъахӀилаб парччахӀлъиялъул ретӀел, ботӀрода лъун букӀана кӀудияб меседил таж ва тӀасан ретӀун букӀана, цӀакъго хирияб, хъахӀаб ва билбагӀараб квас-квасул ххамил гьабураб гӀаба. Шушан шагьаралде кӀудияб разилъи-рохел рештӀана.

¹⁶ Ягьудиязе дуниял къалъана, кутакаб рохел-разилъи ва кӀодолъи насиблъана.

¹⁷ Гьеб парччахӀасул буюрухъ бачӀарабщинаб вилаяталда ва шагьаралда, ягьудиязул кӀудияб разилъи-рохел букӀана, ва сухӀмат-кепалде журалел рукӀана. Цинги батӀиял халкъазул гӀемерал гӀадамаз ягьудиязул дин босана, щайгурелъул ягьудияздаса кӀудияб хӀинкъи рещтӀана гьезде.