Эстер 4 - Аллагьасул Калима

Мардохайица Эстерида кумек гьари

¹ Гьеб хабар рагӀидал Мардохайица, бихъбихъун тӀад букӀараб ретӀелги бан, хӀебет ретӀана ва ботӀроде рахъуги бан, шагьар бакьулъеги ун, кӀудияб гьаракьги биччан гӀодана.

² Гьеб хӀалалда парччахӀасул кӀалгӀаялъул кавуда цеве щвезегӀан ана гьев, хӀебет тӀад ретӀарав чи парччахӀасул кӀалгӀаялде жаниве лъугьине гьукъун букӀиндал.

³ Гьеб буюрухъ ва парччахӀасул амру рагӀанщинаб вилаяталда ягьудиял кӀудияб къварилъиялде ккана, кӀалалги ккун, кӀудиял гьаркьалги риччан гӀодана; гӀемерисел, ретӀун хӀебетгун, рохъдолъ кӀалагъоркье регана.

⁴ Эстерил гъаравашал ва ахтаби рачӀун гьез гьелда Мардохайил ахӀвал-хӀал бицана. Гьелда кӀудияб ургъел чӀвана ва гьелъ Мардохайие ретӀел битӀана, хӀебетги бахъун, тӀад ретӀине. Амма гьес инкар гьабуна.

⁵ Цинги Эстерица, ГьатахӀин абулев, гьелъие хъулухъалъе чӀезавурав парччахӀасул ахта ахӀизавуна жиндихъего ва гьесда тӀад къана гьеб киналъулго магӀна щиб кколебин, ва сунца гьесул рахӀат хвезабун бугебин Мардохайида цӀехезе.

⁶ ГьатахӀ ана Мардохайихъе, парччахӀасул кӀалгӀаялъул кавабазда цебе бугеб, шагьаралъул майданалде.

⁷ Мардохайица ГьатахӀида бицана кинабго ккараб жо, ва Гьаманица, ягьудиял гъураралъухъ, парччахӀасул хазинаялде тӀаде жубазе рагӀи кьураб гӀарцул къадарги абуна.

⁸ Шушаналда къватӀибе бахъараб, ягьудиял гъуреян хъвараб амруялъул кагъатги кьуна гьес ахтахъе Эстерида бихьизабизе ва кинабго ккарабщинаб гьелъие баян гьабизе. Мардохайица гьесда абуна: «Гьелда лъазабе, парччахӀасухъеги ун, жиндирго халкъалъе гурхӀел-рахӀму гьареян гьесдасан».

⁹ ГьатахӀ тӀадвуссана ва кинабго Мардохайица бицанщинаб жо Эстерида лъазабуна.

¹⁰ Амма Эстерица гьадинаб жавабги босун ГьатахӀ Мардохайихъе витӀана:

¹¹ «ТӀолабго парччахӀасул чукъа-рахьаналда ва киналго гьесул вилаятазул халкъазда лъала: нагагьлъун, бихьинчи-чӀужугӀадан батӀалъи гьечӀого, цониги чи парччахӀасул кӀалгӀаялда бугеб жанисеб азбаралде, гьес ахӀичӀого, гьесда цеве вачӀани, къануналда рекъон гьесие гьабулеб хӀукму цо буго – чӀвазе къотӀи. ПарччахӀас жиндирго меседил гӀанса гьесул рахъалде балагьун гӀебеде битӀани, цохӀо гьев чи чӀаго тола. Дунилан абуни гьале лъеберго къо буго парччахӀас жиндихъего ахӀичӀелдаса».

¹² Мардохайида бицана Эстерица абураб.

¹³ Мардохайица гьадинаб жаваб битӀана Эстерихъе: «Дуда ракӀалде ккоге киналго ягьудиязда гьоркьой цо мун хвасарлъилин гьений парччахӀасул кӀалгӀаялда.

¹⁴ Жакъа мун юцӀцӀун чӀани, тархъанлъи ва хвасарлъи кисахун щунги щвела ягьудиязе, амма мунги дур инсул агьлуги паналъила гьеб мехалъ. Щиб лъалеб, гьаб къоялъе гӀолоцин гурищ мун бикалъун яхъараяли?»

¹⁵ Гьебмехалда Эстерица гьадинаб жаваб кьуна:

¹⁶ «Мун а гьанже, ва киналго Шушаналда ругелщинал ягьудиялги данде ракӀарун, кинацаго кӀал ккве дие гӀоло – лъабго сордо-къоялъ щибго кванаге ва гьекъоге. Гьединго дицаги кквела кӀал дирго гъаравашалгун цадахъ ва, гьеб парччахӀасул къануналъ гьукъараб иш букӀаниги, хадуй ина парччахӀасда цееги. Цинги хвани, хун йикӀа абе дун».

¹⁷ Мардохайица кинабго Эстерица малъухъе гьабуна.