Иоаннил лъабабилеб кагъат 1 - Аллагьасул Калима

Саламалъул рагӀаби

¹ Иман лъуразул агьлуялъул бетӀерасдасан – хӀакълъунго дие вокьулев дир хирияв Гайиде.

² Дица Аллагьасда гьарулеб буго, дир хирияв, дур рухӀ лъикӀ бугеб гӀадин, сундулъго мун лъикӀ тагийилан ва дуе сахлъи кьегийилан.

³ ХӀакъабщиналъе мун ритӀухъго чӀун вугилан ва хӀакъабщинабгун хьвадулевги вугилан гьанире рачӀарал вацаз бициндал, дун цӀакъ вохана.

⁴ Дир лъимал хӀакъабщинабгун хьвадулел ругилан рагӀиялдаса кӀудияб рохел гьечӀо дие.

Гай веццулев вуго

⁵ Вацазе ва хасго нухлулазе дуца квербакъулеб букӀиналъулъ буго, дир хирияв, дур ритӀухълъи.

⁶ Иман лъуразул агьлуялъе гьез нугӀлъи гьабуна жалги дуе рокьулилан. Аллагь разилъулеб хӀалалда дуца гьел нухда регӀани, дур лъикӀаб иш букӀина гьеб.

⁷ Иман лъечӀезухъа щибниги босичӀого, МасихӀил цӀаралъе гӀоло нухда рахъун ругелъулха гьел.

⁸ Гьединлъидал гьединал гӀадамазда квер чӀвазе ккола нилъеца, гьелгун цадахъ лъугьун хӀакъабщиналъе гӀоло хӀалтӀизе.

Диотрефил квешал ишал

⁹ Дица иман лъуразул агьлуялъухъе хъван букӀана гьелъул хӀакъалъулъ, амма гьениб цевехъанлъи бокьулев Диотрефица ниж рикӀкӀунел гьечӀо.

¹⁰ Гьединлъидал, дун гьениве вачӀани, дица загьир гьабила нижеда гьес лъун букӀараб бугьтан. Ва гьеб гӀечӀелъубе, гьес жинцагоги инкар гьабулеб буго нухда ругел вацал къабул гьаризе, къабул гьаризе бокьараздаги биччалеб гьечӀо ва иман лъуразул агьлуялда гьоркьоса гьел нахъе гъолел руго.

¹¹ Дир хирияв, квешлъиялдаса гуреб, лъикӀлъиялдаса босе мисал. ЛъикӀлъи гьабулевав ккола Аллагьасдасан лъугьарав, квешлъи гьабурасдаги Аллагь вихьичӀо.

Деметрийил лъикӀал ишал

¹² Деметрийил хӀакъалъулъ киназго нугӀлъи гьабуна, хӀакъабщиналъгицин гьабуна гьесул хӀакъалъулъ нугӀлъи. Нижецаги гьабулеб буго гьеб нугӀлъи, дудаго лъалаха нижер нугӀлъи ритӀухъаб букӀунеблъи.

КватӀичӀого рихьила

¹³ Духъе хъвазе жони гӀемер бугоан, амма щакъи-къаламалъ хъваралда гӀей гьабизе бокьун гьечӀо.

¹⁴ Дир хьул буго кватӀичӀого мун вихьизе ва, цоцазул кӀал бихьун, кӀалъа-ралъазе.

¹⁵ Вассалам. ЦӀар-цӀарккун рехсечӀониги, гьудулзабазулги буго дуде салам.