Тимофейихъе кӀиабилеб кагъат 4 - Аллагьасул Калима

4 бетӀер

¹ Аллагьасда цебе ва чӀагоязеги хваразеги суд гьабизе ПарччахӀлъун вачӀунев МасихӀ ГӀисада цебе дица кутакалда гьарулеб буго:

² санагӀалъи бугеб мехалъги, гьечӀеб мехалъги, Аллагьасул рагӀи гӀадамазда лъазабизе хӀаракат бахъе. Дуца гьел божизаре, гьезие бадибчӀвай гьабе, рекӀелъ сабругун малъе гьезда. Дарсал кьолаго, кидагоги сабру гьабичӀого тоге.

³ Жидеда битӀараб малъулел ругел хӀехьезе кӀвечӀого, гӀадамаз рагӀизе хӀасрат бугебщинаб рагӀизелъун жидедаго сверухъе мугӀалимзабазул тӀубараб бо бакӀарулеб заман бачӀине буго.

⁴ ХӀакъабщинаб рагӀизе бокьичӀого, маргьабазухъ гӀенеккила гьел.

⁵ Амма сундулъго дур сабру букӀине ккола. ГӀазаб-гӀакъуба хӀехье. Рохалил хабар лъазабун, дурго иш гьабе, дурго хъулухъ тӀубазабе.

⁶ Дир рахъалъ абуни, хирияб бакӀалда лъураб хъабиниса чагъир лъугӀулеб гӀадин, лъугӀун унел руго дир гӀумруялъул къоял. Къокъине заман гӀагарлъун буго.

⁷ Дун лъикӀго гугарана, дун чӀчӀалде щвезегӀан векерана, дица божи-иман цӀунана.

⁸ Аллагь разилъизавидал, гьанже дие къачӀан буго бергьенлъиялъул шапакъат. Къиямасеб къоялъ ТӀадегӀанас кьела дие гьеб. Гьев вуго ритӀухъав судияв. ЦохӀо дие гуребги, гьев вачӀиналъухъ гӀащикъго ралагьун чӀун ругелщиназеги кьела гьес гьеб.

Жиндирго рахъалдасан гьари

⁹ Дуца хӀаракат бахъе хехго дихъе вачӀине.

¹⁰ Гьаб дуниялалде рокьи цӀикӀкӀун дун рехун тана Демасица ва Фессалоникаялде ана. Крескент Галатиялде ана, Тит Далматиялде ана.

¹¹ Дида аскӀов цохӀо Лука хутӀун вуго. Маркги цадахъ ваче дуца, дир хъулухъалъулъ гьес дие цӀакъ кумек гьабула.

¹² Тихик дица Эфесалде витӀана.

¹³ Мун гьаниве вачӀунаго, дуца босе Троадаялда Карпил бакӀалда хутӀараб дир гӀаба, тӀахьалги росе, хасго къухьдузда хъварал.

¹⁴ Маххул устар Александрица гӀемераб квешлъи гьабуна дие. Гьесул ишазда рекъон жаза гьабеги БетӀергьанас гьесие!

¹⁵ Мунги гьесдаса цӀунун чӀа, нилъеца лъазабулеб бугеб Хабаралде цӀакъ гӀасиго дандечӀун вугин гьев.

¹⁶ ТӀоцебе дие суд гьабулеб букӀараб мехалда, кумекалъе щивниги вачӀинчӀо, киназго дун рехун тун вуго. Гьезул гӀайиблъун рикӀкӀунгеги гьеб!

¹⁷ Амма ТӀадегӀанав ГӀиса дида цадахъ вукӀана. Гьес дие къуват кьуна цогидал халкъаздаги Рохалил хабар тӀубанго лъазабизе. ГъалбацӀалъул гажаздаса хвасар гьавуна гьес дун.

¹⁸ ТӀадегӀанас дун кинабго квешлъиялдаса ворчӀизавила ва щибго зарал ккечӀого жиндирго Зобалазулаб ПарччахӀлъиялде вачина. Гьесие абадияб рецц! Амин!

Кагътил ахиралда саламалъул рагӀаби

¹⁹ Салам бице Прискиллада ва Аквилада, гьединго Онесифорил тӀолабго рукъалъул агьлуялда.

²⁰ Эраст Коринфалда чӀун вуго. Унтун вукӀиндал, Трофим дица Милеталда тана.

²¹ Хасел тӀаде щвелалде вачӀине хӀаракат бахъе. Дуде салам битӀулеб буго Эвбулица, Пудица, Линица, Клавдияца ва киналго диналъул вацаз.

²² ТӀадегӀанас кидаго рехун тогеги мун! Аллагьасул цӀоб лъеги нужеда!