Тимофейихъе кӀиабилеб кагъат 3 - Аллагьасул Калима

3 бетӀер ЗахӀматаб заман бачӀине буго

¹ Цоги дуда лъай, Къиямасеб къоялде гӀагарлъидал, захӀматаб заман бачӀине букӀин.

² ГӀадамазе цохӀо жалго рокьила, гӀарацги бокьила, жалго жидецаго реццила; гӀамал кӀодолъила, хъачӀал рагӀаби абила; эбел-инсухъ гӀенеккиларо, баркала лъаларо, иман-диналдаса ратӀалъила.

³ Гьел рукӀина рекӀелъ рокьиги гурхӀелги гьечӀел, мацӀ гьабулел, пасатал, гӀасиял, лъикӀлъи рихарал,

⁴ хиянат гьабулел, тӀасанккарал, чӀухӀарал чагӀи. Аллагь разилъизавичӀого, жидерго чурхдул разилъизарила.

⁵ Рихьдаего Аллагьасда божулеллъун чӀела, хӀакъикъаталдайин абуни, гьез божи-иман гӀадахъ босуларо. Гьединал гӀадамаздаса рикӀкӀад чӀа мун.

⁶ Гьездаго релълъарал руго гьанже цо-цо гӀадамал. Чияр рукъзабахъе лъугьун, гьез жидеего мутӀигӀ гьарула мунагьазул гьир бакӀлъарал, батӀи-батӀиял къасдаз къосинарурал, тохал руччаби.

⁷ Гьел руччаби кидаго цо щибалиго лъазабизейилан лъугьуна, амма киданиги хӀакъабщиналда нахъгӀунтӀуларо.

⁸ Мусаде данде Яннесги Ямбресги чӀарал гӀадин, пасатаб пикруялъул гьел гӀадамалги хӀакъабщиналде дандечӀун руго. Гьодораб батана гьезул божи-иман.

⁹ Амма гьезул иш битӀун ккеларо. Дол кӀиязулго гӀантлъиго гӀадин, гьезул гӀантлъиги къватӀибе загьирлъила!

Ахирисел насихӀатал

^10-11 НасихӀатал, хьвада-чӀвади, цебе лъураб мурад, божи-иман, сабру, рокьи ва къохӀехьей, гьединго Антиохиялда, Икониялда ва Листраялда дица хӀехьезе ккараб хадурчӀей ва гӀазаб-гӀакъуба – гьезул кинаб босун хал гьабуниги, мун кидаго дида хьолбохъ вукӀана. Гьеб кинабгоги гӀазаб-гӀакъубаялдаса ТӀадегӀанас ворчӀизавуна дун!

¹² МасихӀ ГӀисаде цолъун, бацӀцӀадго гӀумру гьабизе бокьаралщиназеги букӀине буго гьединаб гӀазаб-гӀакъуба.

¹³ Амма квешлъиги хӀилла-рекӀкӀги гьабулел гӀадамал дагьабги квешалде ина. Гьезги гуккулел руго – гьелги гуккулел руго.

¹⁴ Мунго чӀа дудаго малъарабги тӀубанго дур рекӀеца къабул гьабурабги ккун. Дуда лъала дур мугӀалимзаби щалали.

¹⁵ Лъимерлъудасаго лъана дуда Хириял ТӀухьдул. Гьел ТӀухьдузул гӀакъиллъиялда кӀола МасихӀ ГӀисаде божи-иманалдалъун мун хвасарлъулеб куц малъизе.

¹⁶ Киналго ТӀухьдул – Аллагьасул калам буго. Гьез хӀакъабщинаб малъула, тӀекъабщинаб къватӀиб чӀвазабула, гъалатӀ-хатӀа битӀизабула, ритӀухъаб гӀумруялъул хӀакъалъулъ насихӀат гьабула. Сундуего пайда буго гьезул.

¹⁷ Хириял ТӀухьдуз Аллагьасе хъулухъ гьабулев чи камиллъизавула ва лъикӀал ишазе хӀажалъулебщинабги гьесие насиблъизабула.