Тимофейихъе кӀиабилеб кагъат 2 - Аллагьасул Калима

2 бетӀер МасихӀ ГӀисал ритӀухъав рагъухъан

¹ Аллагьасул баркаталъул къуват-гуч гьарзаго щвезе ккола, дир вас, дуе. Гьеб нилъее щола МасихӀ ГӀисаде цолъиялдалъун.

² ЦӀакъго гӀемерал нугӀзал ругеб бакӀалда дидасан дуда рагӀанщинаб жо дуца бице божизеги бегьулел, цогидазда малъизе махщелги бугел гӀадамазда.

³ МасихӀ ГӀисал ритӀухъав рагъухъанас гӀадин, гӀазаб-гӀакъуба хӀехьезе хӀадурго вукӀа.

⁴ Чабхъеналда гӀахьаллъарав рагъухъан магӀишатиял ишазде машгъуллъуларо, жив бодулъе ахӀарав цевехъан разилъизавизе хӀаракат бахъула гьес.

⁵ Гугарухъанасеги бергьенлъиялъул гор щоларо, букӀине кколеб къагӀидаялъ гьев гугаричӀони.

⁶ Гьединго гӀетӀ тӀун хӀалтӀарав хурухъанасеги тӀоцебе щвезе ккола хуриса бачӀаралъул бутӀа.

⁷ Дир рагӀабазул пикру гьабе дуца. Кинабго бичӀчӀизе кумек гьабила дуе ТӀадегӀанас.

⁸ Давудил наслуялъул вас ГӀиса МасихӀ ракӀалдаса ине виччаге. Гьев хваралъуса вахъиналъул бицунеб Рохалил хабар тӀибитӀизабулеб буго дица.

⁹ Гьеб сабаблъун гӀазаб буго дие – такъсирчиясда кинигин, рахсал ран руго. Амма Аллагьасул каламалда рахсал разе кӀоларо!

¹⁰ Гьединлъидал дица кинабго хӀехьолеб буго тӀаса рищаразе гӀоло – МасихӀ ГӀисаде цолъун, гьезие абадияб къудратги хвасарлъиги щвезе.

¹¹ ЦӀакъ ритӀухъал рагӀаби руго: Гьесда цадахъ нилъ хун ратани, Гьесда цадахъ чӀагоги рукӀина,

¹² Нилъеца хӀехьолеб бугони, Гьесда цадахъ парччахӀлъиги гьабизе буго, Нилъеца Гьесдаса инкар гьабуни, Гьесги нилъедаса инкар гьабила,

¹³ Нилъеда божизе бегьичӀониги, Гьесда божизе бегьула, Жинцаго жиндасаго инкар гьабизе кӀоларелъул Гьесда.

¹⁴ Гьездаги ракӀалде щвезабе гьеб. Аллагьасда цебе кидаго кьварун лъазабе гьезда гьодорал рагӀабазул рахъалъ дагӀба-къец гьабугейилан. ГӀенеккаразе гьелдасан, къосин гурони, пайда гьечӀо.

ГӀазаб-гӀакъуба хӀехьолев чи

¹⁵ Мун гӀазаб-гӀакъуба хӀехьарав чи вугелъул, кӀвараб хӀалалъ хӀаракат бахъе Аллагь разилъизавизе. ЗахӀматалдаса намуслъизе бакӀ гьечӀев ва хӀакъаб рагӀи гурони бицунарев хӀалтӀухъанлъун вукӀа.

¹⁶ Иман гьечӀел ва гьодорал харбал рикӀкӀад гьаре. Гьез гӀадамал Аллагьасдаса цӀакъго рикӀкӀалъизарула.

¹⁷ ГьересинасихӀатчагӀазул рагӀаби тӀиритӀула, чорхол цо лага хьордони, цогидал лугбуздеги гьеб бахунеб гӀадин. Гьединазда гьоркьор руго Гименейги Филетги,

¹⁸ – гьел хӀакъаб нухдаса тарун руго ва гьез абулеб буго гӀалам гьанжего хваралъуса бахъун бугилан, гьелдалъун цо-цоязул божи-иман кӀалагъоркье чӀвалеб буго.

¹⁹ Амма Аллагьас тӀамураб кьучӀ щулияб буго, кьуричӀого чӀун буго, «Аллагьасда жиндиралго лъала» ва «БетӀергьанасул цӀар рехсаравщинав чи квешлъиялдаса рикӀкӀалъе!» абурал рагӀабазул мугьруги буго гьеб кьучӀалда.

²⁰ Бечедаб рокъоб, гӀарац-меседалъул гуребги, цӀулал ва щагӀил цӀарагӀги букӀуна. Гьезул цояздасан щибаб къойил пайда босула, цогидал тун рукӀуна бертин-тоялъул къоялъ къватӀире рахъизе.

²¹ Квешабщиналдаса вацӀцӀад чӀарав чи релълъуна гьединаб, цо хирияб къоялъе къачӀан бугеб цӀарагӀалда. Гьеб бацӀцӀадго хутӀула, бетӀергьанасе гьелдаса пайда бахуна ва лъикӀалщинал ишазе ярагьуна.

²² ГӀолохъанаб мехалда рекӀелъе лъугьунел квешал къасдаздаса рикӀкӀалъе. РакӀбацӀцӀадго ТӀадегӀанасе тӀагӀат-гӀибадат гьабулезда цадахъ хӀаракат бахъе ритӀухълъи, божи-иман, рокьи ва рекъел нужелъго хутӀизе.

²³ ГӀадалаб ва жагьилаб дагӀба-рагӀиялдаса рикӀкӀалъе, дуда лъала гьелъ кьалде рачунеблъи.

²⁴ ТӀадегӀанасе хъулухъ гьабулев чиясда рекъараб гьечӀо гьелда гьоркьов гӀахьаллъизе. Гьев вукӀине ккола киназдехунго ракӀлъикӀав, малъизе бажарулев ва сабруяв чи.

²⁵ Жинде дандечӀаразеги гьес хӀеренго-хӀалимго гьабизе ккола насихӀат. Щиб лъалеб, жидеца гьабуралдаса рекӀекълъизе тӀамила Аллагьас гьел ва хӀакъабщинаб лъаялде рачина.

²⁶ Цинги гьел кантӀила, илбисалъул амруялъе мутӀигӀлъиялдалъун гьел ккун рукӀараб къорикьа рорчӀила.