Тимофейихъе кӀиабилеб кагъат 1 - Аллагьасул Калима

1 бетӀер Саламалъул рагӀаби

¹ Аллагьасе бокьун МасихӀ ГӀисал чапарлъун лъугьарав Аллагьас гӀаламалъе кьелин абун букӀараб ва гьанже МасихӀ ГӀисадалъун загьирлъараб абадияб гӀумруялъул хӀакъалъулъ Хабар бицине витӀарав Павелил рахъалдасан

² дие хирияв вас Тимофейиде. Эмен – Аллагьасдасан ва нилъер ТӀадегӀанав МасихӀ ГӀисадасан рекъел, баркат ва гурхӀел насиблъаги дуе!

Павелица Аллагьасе рецц гьабулеб буго

³ Къасиги къадги гьоркьоса къотӀичӀого дир щибаб гьари-дугӀаялъулъ мун ракӀалде щвараб мехалъ, дица рецц гьабула дир умумузго гӀадин, ракӀбацӀцӀадго жиндие хъулухъ гьабулев Аллагьасе.

⁴ Дида ракӀалда буго дур бадисан чвахараб магӀу, ва дун урхъун вуго, мунги вихьун, ракӀ-ракӀалъго вохизе щвеялъухъ.

⁵ Дида ракӀалде щола дур унго-унгояб божи-иман. Гьеб цебего тӀинкӀана дур кӀодо Лоидал ва дур эбел Эвникал рекӀелъе. Дир ракӀчӀола дур рекӀелъги гьеб букӀиналда.

⁶ Гьеле гьединлъидал дица дуда ракӀалде щвезабулеб буго: дица тӀад квер лъун Аллагьасдасан дулъе лъугьараб махщел-гьунаралъул цӀа боркьизабе.

⁷ Аллагьас нилъее хӀинкъун чӀеялъул гуреб, къуваталъул, рокьул ва цӀодорлъиялъул рухӀин кьун бугеб.

ТӀадегӀанасе нугӀлъи

⁸ Мун рекӀекълъуге нилъер ТӀадегӀанасул хӀакъалъулъ нугӀлъи гьабулеб букӀиналдасаги, гьесде иман лъей сабаблъун дун туснахъалда вукӀиналдасаги намуслъуге. Аллагьас дуеги сабру кьун бугелъул, дуцаги хӀехье Рохалил хабар сабаблъун дие бугеб гӀадинаб гӀазаб-гӀакъуба.

⁹ ТӀасаги рищун, гьес нилъ хвасар гьаруна ва рацӀцӀалъейилан лъазабуна, нилъер ишазухъ балагьун гуреб, гьесие бокьидал ва нилъеда гурхӀидал. МасихӀ ГӀисадалъун гьеб баркат нилъее Аллагьас кьун букӀана дуниял бижилелдего.

¹⁰ Гьанже гьеб загьирлъана нилъ хвасар гьарурав МасихӀ ГӀиса вачӀиналдалъун. Гьес хвел хвезабуна ва Рохалил хабар рещтӀарабго гӀаламалъе абадияб гӀумруги загьирлъизабуна.

¹¹ Гьеб Рохалил хабар бицине чапарлъун, илчилъун ва мугӀалимлъун витӀана Аллагьас дун.

¹² Гьеб сабаблъунин дица гьадинаб гӀазаб-гӀакъуба хӀехьолеб бугеб. Амма дун гьелдаса рекӀекълъуларо. Дида лъала лъида дун божаравали ва дир ракӀчӀола диде божилъи гьабураб жо гьес Къиямасеб къо чӀезегӀан цӀунизе букӀиналда.

¹³ Дица дуда малъарал хӀакъал рагӀаби кьуричӀого ккве дуца. Риччанте гьел дуе мисаллъун рукӀине. МасихӀ ГӀисагун цолъун, божиги рокьиги цӀуне.

¹⁴ Нилъелъ бугеб Илагьияб РухӀалъул къуваталдалъун дуде божилъи гьабураб лъикӀабщинабги цӀуне.

¹⁵ Дуда лъала Асия вилаяталда киназго, гьездаго цадахъ Фигелицаги Гьермогеницаги, диде мугъ рехараблъи.

¹⁶ БетӀергьанасул цӀоб лъеги Онесифорил кинабго рукъалъул агьлуялда: чанги дир рекӀее хӀалхьи лъугьинабуна гьес ва дун туснахъалда вукӀиналдасаги намуслъичӀо.

¹⁷ Рималде вачӀараб мехалъ, дун валагьизе хӀаракат бахъана ахирги дун ватизегӀан.

¹⁸ Къиямасеб къоялъ БетӀергьан гурхӀаги гьесда! Эфесалда гьес дие гьабунщинаб кумек лъидасаго лъикӀ лъала дуда.