Коринфиязухъе кӀиабилеб кагъат 9 - Аллагьасул Калима

9 бетӀер

¹ Аллагьасул халкъалъе кумек гьабизе кколеблъи дица хъвачӀониги бегьила.

² Нужер гъира-шавкъ букӀин лъайдал, македониязеги реццана дица нуж, гъоркьисаялдаса нахъего Ахая кумекалъе хӀадурго бугилан. Нужер гьеб гъира-шавкъалъ квербакъана гьезул гӀемерисезги чода цӀал кьабизе.

³ Гьеб мехалъ нуж хӀадурго рукӀина, дица цебеги бицун букӀана гьелъул хӀакъалъулъ. Гьеб ишалъулъ дица нуж реццун абурал рагӀаби гӀадада ккечӀого рукӀинелъун ритӀулел руго нужехъе гьал диналъул вацал.

⁴ Цинги, дида цадахъ македониял гьенире рачӀараб мехалъ, нуж хӀадурго ратичӀони, гьезда цере нуж сурарал гӀечӀого, нижги сурила, – ракӀчӀун нужеда божун рукӀиндалха.

⁵ Гьединлъидал дица хӀукму гьабуна гьал вацазда гьаризе, дидаса цере гьенире ун, нужеца рагӀи кьун букӀараб садакъа гьениб цебеккунго бакӀареян. Гьеб букӀина хӀалица бахъараб гуреб, ракӀ разилъун кьураб садакъа.

⁶ КӀочон тоге: лъедерго хьон хьарасе лъедерго бижула, ризго хьарасе ризго бижула.

⁷ Щивас кьезе биччай гьесул ракӀалъ къабул гьабураб къадаралда. Бокьун гурони кьоге, кьун хадуб ракӀбухӀуге. РакӀ разилъун кьолев чи вокьула Аллагьасе.

⁸ Аллагьасда кӀола нужее кинабго гьарзалъуледухъ ва садакъаде кьезеги тӀокӀлъуледухъ баркат рещтӀинабизе.

⁹ ТӀухьдузда хъван бугелъулха: «Мискиназе квергӀатӀидав вуго Аллагь, гьесул гьеб лъикӀлъи гӀадамазда абадиялъ кӀочон толаро», – ян.

¹⁰ Хуриб хьазе хьонги кваназе хинкӀ-чедги кьолес нужееги кьела къваригӀарабщинаб. Нужер лъикӀлъиялъул хурги цӀун бачӀина.

¹¹ Кинабго рахъалъ бечелъила нуж, нужер сахаватлъиги цӀикӀкӀина. Нижедасан нуж ругьунлъараб сахаватлъи сабаблъун гӀемерал гӀадамаз Аллагьасе рецц гьабила.

¹² Аллагьасе хирияб халкъалъе пайдаги кьела нужер садакъаялъ, гьелъухъ Аллагьасе гьабулеб реццги цӀикӀкӀина, цӀад бан хадуб гӀоразул, лъаразул лъим гӀадин.

¹³ Гьеб садакъаялъ бихьизабила нужер божи-иман щулалъун букӀин. МасихӀил хӀакъалъулъ Рохалил хабаралъе, – нужеца иман лъураб хабаралъе нужер мутӀигӀлъиялъухъги жидееги цогидазеги нужер квергӀатӀилъиялъухъги Аллагьасе рецц гьабила гьез.

¹⁴ Нужги рехсон, ракӀ-ракӀалъго гьари-дугӀа гьабила гьез, нужелъ Аллагьасул баркат цӀакъго цӀикӀкӀун букӀин лъан.

¹⁵ Бицун хӀалкӀоларебгӀан кӀудияб баркат нилъеде рещтӀинабулев Аллагьасе рецц!