Коринфиязухъе кӀиабилеб кагъат 6 - Аллагьасул Калима

6 бетӀер

¹ Аллагьасда цере хӀалтӀулаго нижеца нужеда гьарулеб буго: Аллагьас нужеде рещтӀараб баркат гӀадада хвезе тогейилан.

² Гьес абун бугелъул: «Болжал щвараб заманалда дур гьари-дугӀа къабул гьабуна Дица, мун хвасарлъизе хъван букӀараб къоялъ дуе кумекги гьабуна Дица», – ян. Гьале гьанже бачӀун буго доб болжал щвараб заман, бачӀун буго нилъ хвасарлъизе хъван букӀараб къо!

³ Нижеца лъиениги квекӀен гьабуларо, – Аллагьасе гьабулеб хъулухъалда лъицаниги гӀайиб чӀвангутӀизе.

⁴ Гьелъул гӀаксалда, нижеца гьабулебщиналдалъун бихьизабула Аллагьасе хъулухъ гьабулеб букӀин: кӀудияб сабруялда хӀехьола балагьал, къварилъаби, гӀазабал,

⁵ тӀилица рухи, туснахъалда тӀами, питнаби, захӀматаб хӀалтӀи, макьу тей, кӀалкквей.

⁶ Нижелъ буго рацӀцӀалъи, лъай-гӀакълу, сабру, ракӀлъикӀлъи, Илагьияб РухӀ, унго-унгояб рокьи,

⁷ хӀакъаб рагӀи ва Аллагьасдасан бачӀараб къуват. Нижер кваранабги квегӀабги хъатикь буго ритӀухълъиялъул ярагъ.

⁸ Нижер хӀурматги гьабула, ниж хӀакъирги гьарула. Ниж какула, ниж реццула. Нижеца гуккулел ругилан абула, амма нижеда божизе бегьула.

⁹ Нижер цӀар тӀибитӀун гьечӀо, амма киназдаго ниж лъала. Ниж хванилан рикӀкӀуна, амма ниж чӀаго рукӀин бихьулеб гьечӀищ! Суд гьабун ниж рухана, амма чӀвазе кӀвечӀо.

¹⁰ Ниж къварид гьарула, амма ниж рохун рукӀуна. Ниж мискинго руго, амма нижеца гӀемерал гӀадамал бечелъизарула. Нижер щибниги гьечӀо, амма кинабгоги нижеда кодоб буго.

¹¹ Нижер кӀутӀбуз, коринфиял, битӀараб бицуна нужеда, нижер ракӀалги нужее рагьарал руго.

¹² Нижеца гуро нужедаса ракӀалда бугебщинаб бахчулеб бугеб, нужецайин ракӀалда бугебщинаб нижедаса бахчулеб бугеб.

¹³ Дирго лъималазда гӀадин гьарулеб буго дица нужеда: нужецаги ракӀал рагье нижее.

Нилъ руго Аллагьасул мукъадасаб рукъ

¹⁴ Иман гьечӀелгун цадахъ цо рукьалда рарал оцал гӀадин рукӀунге. РитӀухълъиги пасалъиги цоцазда бухьине кин бегьулеб? Канлъиги бецӀлъиги кин цадахъ букӀунеб?

¹⁵ МасихӀидаги илбисалдаги гьоркьоб маслихӀат кин гьабулеб? Иман лъуравги иман гьечӀевги цоцазда кин релълъунев?

¹⁶ Мукъадасаб Рукъалдаги гьересиаллагьзабаздаги гьоркьоб кинаб хурхен-рухьен букӀунеб? Нилъ ругелъулха хӀакъав Аллагьасул Мукъадасаб Рукълъун. Илагьиял ТӀухьдузда хъван бугелъул: «Дун гьезухъе рещтӀина, гьезда цадахъ вукӀина, гьезул Аллагьлъун лъугьина, ва гьелги дир халкълъун лъугьина, – ян абулеб буго БетӀергьанас.

¹⁷ – Гьединлъидал гьезда гьоркьоса нахъе а, гьездаса батӀаго чӀа, хӀарамаб жоялдаги хъваге».

¹⁸ Цоги: «Дица нуж дихъего рачина, нужее эменлъи гьабила, нужги Дие васаллъунги ясаллъунги рукӀина, – ян абулеб буго Къудратав БетӀергьанас».