Коринфиязухъе кӀиабилеб кагъат 5 - Аллагьасул Калима

5 бетӀер

¹ Гьаб панадуниялалда нилъ чӀолеб бакӀ биххараб мехалъ, Аллагьас нилъее рукъ кьезе бугеблъи лъала нилъеда. Зобалазда бугеб инсанасул квераз гьабичӀеб абадияб рукъин гьеб.

² Гьанир ругебгӀан заманаялъ пашманго зигардула нилъ, нилъее бокьун букӀуна гьеб зобалазул рокъоре лъугьине.

³ Гьаб дуниялалда сундасаго махӀрумлъаниги, рукъ гьечӀого хутӀиларо нилъ гьенир.

⁴ Гьанир ругебгӀан заманаялъ къварилъахъдула нилъ. Гьаб панадуниялалда нилъер бугеб черхалдаса махӀрумлъизе бокьиялъ гуребха, зобалазда нилъер букӀунеб черх щвезе бокьиялъин. Холеб черх холареб черхалъ хисун гӀумру бергьина гьебмехалъ.

⁵ Илагьияб РухӀ аманатлъун нилъее кьурав Аллагьас гьелъиейин нилъ тӀаса рищарал.

⁶ Гьединлъидал нилъ сункьаниги киданиги хӀинкъулареллъун лъугьун руго. Нилъеда лъала, гьанир рокъор – нилъерго чорхолъ – ругебгӀан заманаялъ, нилъ ТӀадегӀанасдаса рикӀкӀад рукӀин.

⁷ Беразда бихьулелда рекъон гуреб, божулелда рекъонин нилъ хьвадулел ругел.

⁸ Сункьаниги киданиги хӀинкъулареллъун лъугьун ругелъул, нилъее лъикӀаб букӀинаан, нилъерго чорхолъа къватӀиреги лъугьун, ТӀадегӀанасда аскӀоре гочине.

⁹ Гьединлъидалин нилъее бищунго бокьулеб – гьаб дуниялалда гьесдаса рикӀкӀад рукӀаниги, ахираталда аскӀор рукӀаниги – ТӀадегӀанав нилъедаса разилъизе.

¹⁰ РухӀ чорхолъ букӀаго щивав чияс гьабураб лъикӀлъиялъухъ шапакъат щвезеги квешлъиялъухъ тамихӀ гьабизеги нилъ киналго МасихӀил судалда цере чӀезе ругелъулха.

Аллагьас МасихӀидалъун гӀалам Живгун рекъезабуна

¹¹ Аллагьасукьа хӀинкъи щиб жояли лъайдал, нижеца хӀаракат бахъулеб буго цогидаздаги гьеб лъазабизе. Ниж щал чагӀияли Аллагьасда лъала. Дида ракӀалде ккола нужедаги кӀвеларин ниж щалали лъаларин абизе.

¹² Ниж щал чагӀияли бихьизабизе гуро гьеб такрар гьабулеб бугеб. Жидерго рекӀелъ бугеб бахчун, бералда бихьулебаб рихьдаего цебе рехизабун, жидеего рецц-бакъ гьабулел гӀадамалги руго гьенир. Нижеца гьедин абулеб буго гьединал гӀадамазе жаваб кьезе нужее бигьалъизе ва нижедаса чӀухӀизе нужее рес букӀинеги.

¹³ Биччанте ниж гӀантлъун ругилан абизе. Нижеца Аллагьасе хъулухъ гьабулеб бугелъулин гьез гьедин абулеб бугеб. ЦӀодорго ругеб мехалъ гьабураб – гьеб нужее гӀоло буго.

¹⁴ МасихӀил рокьиялъул кверщаликь руго ниж. Нижеда бичӀчӀана киназего гӀоло цо Чи хваравлъи. Гьесда цадахъ киналгоги хун руго.

¹⁵ Гьев хвана киназего гӀоло, цинги чӀаго ругелаз гӀумру жидеего гӀоло гьабичӀого, – жидее гӀоло хварасе ва хваралъуса вахъинавурасе гӀоло гьабизе.

¹⁶ Гьанжеялдаса хадуб нилъеца лъиениги къимат кьезе бегьуларо гӀадамазул гӀакълу-пикруялдалъун. Цере нилъ МасихӀихъги ралагьулел рукӀарал ратани гӀадамазул бераздалъун, гьанже тӀокӀаб гьабулеб гьечӀо нилъеца гьедин.

¹⁷ МасихӀиде цолъарав чи ккола цӀидасан вижарав чи. Басрияб ана-хвана, гьале цӀияб тӀаде гӀунтӀана.

¹⁸ МасихӀидалъун нилъ Живгун рекъезарурав ва цогидалги нужеца Живгун рекъезареян нилъее амру гьабурав Аллагьасдасан буго гьеб кинабго.

¹⁹ Аллагьас МасихӀидалъун Живгун рекъезабуна тӀолабго гӀалам, гьезул мунагьалги рикӀкӀинчӀо Гьес. ГӀадамал рекъезареян амруги гьабуна Гьес нилъее.

²⁰ Ниж руго МасихӀил вакилзаби ва Аллагьас нижер кӀалдисан кӀалъан гӀадамазде ахӀулеб буго Жинде руссаян. МасихӀил цӀар рехсон гьарулеб буго нижеца Аллагьгун рекъе нужилан.

²¹ Мунагьго гьечӀевав нилъер мунагьалъе гӀоло къурбанлъун гьавуна Аллагьас, – гьесдалъун нилъеде Аллагьасдасан ритӀухълъи рещтӀинабизе.