Коринфиязухъе кӀиабилеб кагъат 4 - Аллагьасул Калима

4 бетӀер Илагьияб Нур кин загьирлъулеб

¹ Гьединлъидалин, Аллагьасул цӀоб лъун, Рохалил хабаралъе хъулухъ гьабизе божун тарал нижеца рачел чучулареб.

² Нижеца рехун тана гӀадамазда рихьизе, рагӀизе нечарал ишал, хӀилла-макруялдалъун щивниги гуккуларо, Аллагьасул рагӀиялъул бакӀалда гьерсал рекъезаруларо. Рагьун киназего хӀакъабщиналъул бицунаго, ниж Аллагьасда цере чӀола, ниж щалали ва кинал чагӀияли халкъалда рихьизе.

³ Гьедин бугониги, нижеца бицунеб Рохалил хабар гӀемерал гӀадамазе, пардавалъ гӀадин, бахчун буго. Гьеб бахчун буго гӀицӀго хвалде унезе,

⁴ гьаб дуниялалъул кверщел кодоб бугеб илбисалъ ракӀ бецлъизабуразе, – Аллагьасул суратлъун вугев МасихӀил къудраталъул хӀакъалъулъ Рохалил хабаралъул Нур гьезда бихьунгутӀизе.

⁵ Нижерго хӀакъалъулъ Рохалил хабар гурелъулха нижеца бицунеб бугеб, ГӀиса МасихӀ нилъер ТӀадегӀанав вугиланлъидалха. Нижни руго ГӀиса МасихӀие гӀоло нужее хъулухъ гьабулел гӀадамал.

⁶ НекӀо бецӀлъи бачахъизе канлъи бижарав Аллагьас гьеб канлъи нилъер рекӀелъеги лъугьинабуна. ГӀиса МасихӀил гьурмалъ гвангъараб Илагьияб Нур нилъее загьирлъизелъун гьабуна гьес гьедин.

⁷ Хазина жаниб цӀунарал гьадингоял щагӀил рагӀазда релълъун руго ниж. Нижелъ загьирлъараб цӀакъго цӀикӀкӀараб къудрат, нижедасан гуреб, Аллагьасдасан бугеблъи бихьуларищ гьелдасан?

⁸ Киналго нижеде тӀаделъун руго, амма нижее рорчӀизе бакӀ хутӀун буго. Ниж рес къотӀун руго, амма хьул къотӀун гьечӀо.

⁹ Нижее гӀадамаз гӀазаб-гӀакъуба кьолеб буго, амма Аллагьас ниж рехун тун гьечӀо. Ниж гӀодор ккезарун руго, амма къун гьечӀо.

¹⁰ ГӀисал хвел нижеца кидаго нижерго чорхолъ чӀезабула, гьелдаго цадахъ нижер чорхолъ ГӀисал гӀумруги загьирлъизе.

¹¹ ЧӀаго ругебгӀан мехалъ, ниж ГӀисае гӀоло хвезарулел руго. Нижер чурхдул хвалие мутӀигӀлъаниги, гьезулъ загьирлъула ГӀисадалъун насиблъулеб абадияб гӀумру.

¹² Гьедин нижелъ хвел хӀалтӀулеб буго, нужелъин абуни, гӀумру хӀалтӀулеб буго.

¹³ «Дун божана ва гьединлъидал дица бицана», – ян ТӀухьдузда хъвараб гӀадинаб божи-иман кьураб РухӀ нижелъ бугелъул, ниж божун руго, божун ругелъул бицунебги буго.

¹⁴ Нижеда лъала ТӀадегӀанав ГӀиса хваралъуса вахъинавурас, ГӀисада цадахъ рахъинарун, нижги нужги Жиндаго цере чӀезаризе рукӀин.

¹⁵ Гьеб кинабго гьабулеб буго нужее гӀоло, Аллагьасул баркат цӀикӀкӀун чиясда лъунагӀан, гьез цӀикӀкӀинабулеб бугелъул Аллагьасе гьабулеб реццги.

Божи-иманалда рекъонин хьвадизе кколел

¹⁶ Гьединлъидалин ниж ракӀ гӀодоб чӀван рукӀунарел. Нижер чорхол чӀаголъи дагь-дагьккун чӀунтулеб бугониги, рухӀияб чӀаголъи щибаб къоялъ цӀилъулебго цӀилъулеб буго.

¹⁷ Гьаб тӀадагьаб, дагьаб заманаялъулаб гӀазаб-гӀакъубаялъ нижее къачӀалеб буго гьелда данде ккун кутакалда цӀикӀкӀараб абадияб нигӀмат.

¹⁸ Беразда бихьулебаб гуреб, бихьуларебаб гӀадахъ босулеб буго нилъеца. Беразда бихьулебаб – тӀаса унелъул, бихьуларебаб – абадияб бугелъул!