Коринфиязухъе кӀиабилеб кагъат 10 - Аллагьасул Калима

10 бетӀер Павел чапарас живго ритӀухъ гьавулев вуго

¹ Нужеда аскӀов вугеб мехалъ хӀинкъа-къалев, рикӀкӀалъараб мехалъ бахӀарчияв чийилан цо-цояз жиндир хӀакъалъулъ абулев дун – Павел – вуго нужедехун кӀалъалев.

² МасихӀил хӀеренлъиялъе ва лъикӀлъиялъе гӀоло гьарулеб буго нужеда, гьениве вачӀараб мехалъ бахӀарчи вахъинавуге дир! Нужеда лъан букӀа: дун гьединав бахӀарчияв вукӀуна гьал гӀадамазул къагӀидаялъ ниж хьвадулел ругин абулездехун.

³ Гьаб дуниялалъул гӀадамал ниж ругониги, нижеца гьабулеб рагъ гӀадамазул гӀадинаб гуро.

⁴ Гьеб рагъулъ ниж гӀадамазул гӀадинаб яргъидалъун гуро рагъулел, ниж рагъула щулиял хъулбиги щущазарулеб гучаб яргъидалъун. Аллагьасдасан щвана нижее гьеб.

⁵ Аллагь лъаялде дандечӀаразул чӀухӀи-пахрулъиялъул хъулбиги щущазарула нижеца. Мекъаб-тӀекъаб пикру-къасдги асирлъуде босула ва МасихӀие мутӀигӀаблъун лъугьинабула.

⁶ Нужер мутӀигӀлъи камиллъараб мехалъ, ниж хӀадурго рукӀина мутӀигӀлъуларевщинасе тамихӀ гьабизе.

⁷ Нужерго берда цебе бугелъухъ ралагье! Цо лъилниги ракӀчӀун батани жив МасихӀил рахъ ккурав чи вугилан, гьес жиндаго гьикъейин абе гьесдаса дагьищ нижеца МасихӀил рахъ кколеб бугебилан.

⁸ Нужер гӀумру хвезабизе гуреб, гьеб берцин гьабизе ТӀадегӀанас нижее кьураб ихтияралъул рахъалъ рецц-бакъ дагьаб цӀикӀкӀунеб бугеб батаниги, дун гьелдаса расги намуслъуларо.

⁹ Гьадинал кагътал хъван, дица нуж гӀицӀго хӀинкъизарулел ругилан ракӀалде ккоге.

¹⁰ Цо-цояз абулеб рагӀула: «Кагътида хъвалеб жо кутакаб ва кьварараб букӀуна, амма живго вачӀараб мехалъ кӀалъан бажаруларо, кӀалдиб мацӀги сах-саламат хӀалтӀуларо».

¹¹ Гьединав чиясда лъан букӀаян абе ниж гьенир гьечӀеб мехалъ нижеца кагътазда хъвалебщинаб гьенире рачӀиндалги гьабулеблъи.

¹² Жалго берцин рихьизе хьвадулел цо-цо чагӀазда нижго ращалъизаризе яги релълъинаризе гӀураб бахӀарчилъи гьечӀо нижелъ! Жалго гӀантал ругелъул, гьез жалго рорцунел руго жидерго роценаздалъун, цоял цоязда релълъинарулелги руго.

¹³ Нижеца нижго реццила, роцадаса араб хӀалалъ гуреб, нижерго роценги цӀунун. Гьеб роценги буго Аллагьас нижее бихьизабураб гӀорхъи. Нужги жанире рачуна гьеб гӀурхъиялъ.

¹⁴ МасихӀил хӀакъалъулъ Рохалил хабарги босун тӀоцере нужехъе щварал чагӀи нижлъидал, нужехъе рачӀунаго гӀорхъи бахине ккечӀо нижеца.

¹⁵ Нижер гӀорхъи бахун къватӀибехун чияца гьабуралдалъун реццаризеги лъугьунаро ниж. Нижер хьул буго нужер божи-иман цӀикӀкӀинилан ва нижер хьонги хьан нужеца бекьараб хурги цӀакъго гӀатӀилъилилан.

¹⁶ Цинги ниж ина нужедасаги дорегӀан ругел ракьазда Рохалил хабар тӀибитӀизабизе, гьезул хурзабахъ цогидаз гьабураб хӀалтӀиялдалъунги реццариларо.

¹⁷ ТӀухьдузда хъван буго: «Веццаризе бокьарас БетӀергьан вецце!»

¹⁸ Живго жинцаго тӀадегӀанлъизавурав чи муъминчилъун рикӀкӀунаро, БетӀергьанас тӀадегӀанлъизавурав рикӀкӀуна.