Тимофейихъе тӀоцебесеб кагъат 6 - Аллагьасул Калима

6 бетӀер Лагъзадерил хӀакъалъулъ насихӀатал

¹ Лагълъиялъул кьили гьодида бугез кӀвараб хӀалалъ хӀурмат гьабизе ккола жидерго бетӀергьабазул, – Аллагьги нилъер божи-иманги гӀадамаз какунгутӀизе.

² Лагъзадерил бетӀергьабаз иман лъун бугониги, жал диналъул вацал ругилан лагъзадерица адаб рехизе бегьуларо. Дагьабги жигар бахъун хъулухъ гьабизе биччанте, гьез хъулухъ гьабулеб бугелъул иман лъурал ва Аллагьасе рокьулел гӀадамазе. Гьаб кинабго малъизе ва гьезул рекӀелъе лъугьинабизе ккола дуца!

ГӀарцуде рокьи

³ Цо лъицаниги гьересинасихӀат гьабулеб бугони, нилъер ТӀадегӀанав ГӀиса МасихӀил хӀакъал рагӀабаздаса, унго-унголъун Аллагьасе гӀибадат гьабиялдаса щивниги кьурулев вугони,

⁴ гьев ккола чӀухӀи-пахрулъиялъул цӀурав ва щибго бичӀчӀуларев чи. ЖахӀдаги, кьалги, хьандейги, квешал щакдарабиги рижулеб дагӀба-рагӀиялде ва рагӀабазул магӀна сабаблъун къацандиялде бугеб хӀасраталъ унти ккезабун букӀуна гьединав чиясда.

⁵ Гьелдалъун бижула гӀаданиб нах гьечӀел ва хӀакъабщинаб жидехъа биларал гӀадамазул нахъаса къотӀи гьечӀеб къец. Гьезда ккола божи-иман бугин жалго бечелъиялъе баккараб ицц.

⁶ ХӀакъикъаталда божи-иман кӀудияб бечелъи буго гӀицӀго жидер бугеб жоялда ракӀ разилъизе лъалел гӀадамазе.

⁷ Нилъеца дуниялалде щибго босун бачӀунарелъулха ва гьаниса щибго цадахъ босизеги нилъеда кӀоларелъул.

⁸ Квине квенги ретӀине ретӀелги бугони, гьелда разилъун рукӀина!

⁹ Бечелъизе бокьарал гӀадамал къосуна, гӀемерал гӀантал ва заралиял къасдазул къорикье ккола. Гьел къасдаз гӀадамал рехула гьел гъурулел ва хвезарулел карачалабалъе.

¹⁰ Киналго квешлъабазул аслу-кьучӀ ккола гӀарац бокьи. Руго гӀадамал гӀарцуда хадур лъугьунаго божи-иманалъул нухдаса тарарал ва гӀакъуба-къварилъабазул чӀораз рекӀеда ругъун лъезе биччарал.

¹¹ Амма мун, Аллагьасул лагъ, гьелдаса лъуте! Дуца тӀалаб гьабе ритӀухълъи, унго-унгояб муъминлъи, божи-иман, рокьи, къуркьунгутӀи, хӀеренлъи.

¹² Божи-иманалъе гӀоло къеркье! ГӀемерал нугӀзабазда цебе дуца лъикӀаб къагӀидаялъ дурго божи-иманалъул бициндал, Аллагьас дуе насиблъизабуна абадияб гӀумру. Гьеб шапакъаталдаса махӀрумлъизе чӀоге!

¹³ Щибаб жо бижарав Аллагьасе гӀоло ва Понтий Пилатида цебе лъикӀаб къагӀидаялъ божи-иманалъул бицарав МасихӀ ГӀисаеги гӀоло гьарулеб буго дуда,

¹⁴ нилъер ТӀадегӀанав ГӀиса МасихӀ вачӀинегӀан ритӀухъго ва гӀайиб чӀвазе бакӀ гьечӀеб хӀалалъ тӀуразарейин Аллагьасул амруял абун.

¹⁵ ЦӀараб болжалалда Аллагьас гьев загьир гьавила. ЦохӀо вугев ХӀакимас, парччахӀзабазулги ПарччахӀас, ханзабазулги Ханас – Гьардарав Аллагьас загьир гьавила.

¹⁶ ЦохӀо гьесие хвел гьечӀо, гьев вуго лъиданиги гӀагарлъизе кӀолареб Нуралъулъ. Гьев лъиданиги вихьичӀо ва вихьизе ресги гьечӀо. Абадияб реццги цӀарги гьесие. Амин.

Кагътил ахир

¹⁷ Гьаб дуниялалда бечедго ругезда лъазабе гӀамал кӀодолъугеян ва хехго тӀаса унеб бечелъиялде хьул лъогейилан. Нилъ разилъизелъун къваригӀанщинаб гьарзаго кьолев Аллагьасде хьул лъейилан абе.

¹⁸ ЛъикӀлъи гьабизе тӀаме гьел, риччанте лъикӀал ишаздалъун бечелъизе. Риччанте квер биччарал рукӀине, цогидазе кьезе кидаго хӀадурал рукӀине.

¹⁹ Гьедин бакӀарейин абе жиндалъун унго-унгояб гӀумру насиблъулеб ва букӀинеселъул щулияб кьучӀлъун кколеб хазина.

²⁰ Дуде божилъи гьабун бугебщинаб цӀуне, Тимофей, дуца. Аллагь рикӀкӀунарезул чӀандахабаралдаса ва гӀадамаз гьересиго «лъай» абун цӀар лъуралда тӀасан дагӀбадиялдаса рикӀкӀалъе.

²¹ Гьеб лъай жиделъ бугилан чӀун, цо-цо гӀадамал божи-иманалъул нухдаса тарана. Аллагьасул баркат лъеги нужеда!