Тимофейихъе тӀоцебесеб кагъат 5 - Аллагьасул Калима

5 бетӀер Къоролруччабазул хӀакъалъулъ насихӀатал

¹ ГӀумруялъ дудаса цӀикӀкӀарав чиясе хъачӀго бадибчӀвай гьабуге, инсудехун гӀадин кӀалъан малъе гьесда. Дудаса гӀолохъанал гӀадамаздаги вацазда гӀадин кӀалъай.

² ЦӀикӀкӀарал руччабаздехун кӀалъай эбелалдехун гӀадин, гӀолохъаназдехун кӀалъай яцазда гӀадин, намусги вацӀцӀалъиги цӀунун.

³ ХӀакъикъаталдаги кумекалде хӀажатал къоролруччабазул тӀалаб-агъаз гьабе.

⁴ Къоролалъул лъимал яги лъималазул лъимал ругони, риччанте гьел ругьунлъизе божи-иман лъидасаго цебе жидерго рукъалъул агьлуялда бихьизабизе, эбел-инсул ва кӀудабазул тӀалаб-агъаз гьабизе. Гьеб буго Аллагь разилъулеб гӀамал.

⁵ Кумекалде хӀажалъарай ва тӀалаб гьабизе чи гьечӀого хутӀарай къоролалъ, цохӀо Аллагьасде хьул лъун, къасиги къадги дугӀа гьабун, гьесдасан кумек гьарула.

⁶ Амма жиндиего лазаталъе гӀоло гӀумру гьабулей йигей къоролай ккола чӀаго йикӀаго хварай гӀадан.

⁷ Гьаб кинабго тӀубазабизе тӀаме дуца гьел, гьезул гӀумруялда гӀайиб чӀвангутӀизе.

⁸ ГӀагарлъиялъул, хасго рукъалъул агьлуялъул тӀалаб-агъаз гьабуларев чи божи-иманалдаса ватӀалъула ва иман лъечӀездасаги квешлъула.

⁹ СияхӀалде росе лъабкъого сонги барал, цо нухалъ гурони росасеги инчӀел, къоролзаби.

¹⁰ Гьел рукӀине ккола лъикӀал ишаздалъун машгьурлъарал, лъималазе тарбия кьурал, гьалбал рокьулел, диналъул вацазул хӀатӀал хӀурудаса чурулел, къварилъи ккарасе кумекалъе ратарал ва лъикӀалщинал ишал жидеца гьарулел рукӀарал руччаби.

¹¹ ГӀолохъанал къоролруччаби сияхӀалде росуге. Жидерго гьава бергьун МасихӀидаса рикӀкӀалъараб мехалъ, росабазе ине бокьула гьезие,

¹² ва гьезда тӀаде ккола росасе инарилан букӀараб къотӀи хвеялъул гӀайиб.

¹³ Гьединго гьел ругьунлъула хӀалтӀичӀого чӀезе ва цо авалалдаса цогидалде хьвадизе. КӀвахӀаллъарал гӀечӀого, гӀадамазда нахъасан гаргадизе ругьунлъула, чияр ишазде гьоркьоре лъугьуна, бицине рекъечӀебги бицуна.

¹⁴ Гьединлъидал дица гӀолохъанал къоролруччабазе гӀакълу кьолеб буго росабазе айилан, лъимал гьарейилан, рукъалъул магӀишаталде руссайилан ва тушманзабаз квешаб цӀар чӀвазе рукӀунгейилан.

¹⁵ Илбисалда нахърилълъун къосарал цо-цо къоролруччабиги ругелъулха.

¹⁶ Диналъул яцалъул ругони къороллъун хутӀарал гӀагарал руччаби, биччанте гьезул тӀалаб-агъаз гьелъ гьабизе. Иман лъуразул агьлуялъе бигьалъила жалго цохӀо хутӀарал къоролруччабазе кумек гьабизе.

Иман лъуразул агьлуялъул бутӀрузул хӀакъалъулъ насихӀатал

¹⁷ Иман лъуразул агьлуялъул ишал тӀуразарулезе, хасго вагӀза-насихӀаталъе хӀалтӀулезе, кӀиго бутӀаялъ цӀикӀкӀун кьезе ккела мухь.

¹⁸ ТӀухьдузда хъван бугелъулха: «Лал бокъунеб бугеб оцол кӀалалда таргьа баге» ва «ХӀалтӀухъан мухь кьезе мустахӀикъав вуго», – ян.

¹⁹ Иман лъуразул агьлуялъул бутӀрузда тӀасан бачӀараб гӀарза гӀадахъ босуге, гьеб битӀараб букӀин кӀиго яги лъабго нугӀас чӀезабичӀони.

²⁰ Мунагь гьабулел гӀадамалин абуни, тӀолабго агьлуялда цере къватӀир чӀвазаре, гьелъухъ балагьун цогидалги хӀинкъизе.

²¹ Аллагьасда, МасихӀ ГӀисада ва тӀаса рищарал малаикзабазда цебе дица дуда лъазабулеб буго гьал насихӀатазда рекъон хьвадейилан, щивниги ватӀа гьавугейилан, лъиениги тӀокӀлъи гьабугейилан.

²² Щивниги хъулухъалъе вачине тӀад квер лъезе гӀедегӀуге. Цогидал гӀадамаз мунагьалъукье кколеб иш гьабулеб бугони, мун гьелда гьоркьов гӀахьаллъуге. Мунго вацӀцӀадго цӀуне.

²³ Жибго лъим тӀокӀаб гьекъоге дуца, дагьа-дагьаб чагъир жубай, дур чехь унтараб бугелъул ва гӀемерисеб мехалъ мун лъикӀ гьечӀого вукӀунелъул.

²⁴ Цо-цо чиясул мунагьал гьанжего рихьулел руго ва Аллагьасул судалде гьесда цере-цере унел руго. Цогидаз жидерго мунагьал хадур рехъерхъулел руго.

²⁵ Гьединго лъикӀал ишалги: цоял гьанжего рихьулел руго, цогидал рихьулел гьечӀо, амма кингоги гьел лъачӀого хутӀуларо.