Тимофейихъе тӀоцебесеб кагъат 4 - Аллагьасул Калима

4 бетӀер Тимофейие гьарурал насихӀатал

¹ Илагьияб РухӀалъ якъинго бицунеб буго ахираб заманаялда цо-цо гӀадамал божи-иманалдаса руссинилан. Гьел руссина гьерсал рицунел жундузде, гьел нахърилълъина шайтӀабаз малъаралда.

² Гьел къосинарила намусги яхӀги хӀатӀикь мерхьарал, ххвелал гьаризе гьунар бугел гьерсихъабаз.

³ Гьез лъудби рачине гьукъула, цо-цо нигӀматал кваназе изну кьоларо – хӀакъабщиналда божулел ва гьеб лъалел гӀадамаз баркала кьун кваназе Аллагьас гьел нигӀматал рижун ругониги.

⁴ Аллагьас бижанщинаб жо лъикӀаб буго, баркала кьун кваналеб щибго жо нахъчӀвазе бегьуларо.

⁵ Гьеб хӀалаллъизабула Аллагьасул каламалъги нилъер дугӀаялъги.

⁶ Диналъул вацазда гьедин малъани, мун вукӀина МасихӀ ГӀисае хъулухъ гьабулев лъикӀав чилъун. Божи-иманалъул рагӀабазулги мун нахъвилълъарал лъикӀал насихӀатазулги дуе пайда бахун букӀин бихьила.

⁷ Мун рикӀкӀад чӀа Аллагь рикӀкӀунарезул гьересиял ва херал руччабазул гӀадинал харбаздаса. Мунго ругьун гьаве хӀакъаб муъминлъиялъе.

⁸ Черх къвакӀизабиялъул пайда цо-цо мехалъ гурони букӀунаро, муъминлъиялъул пайдайин абуни кидаго букӀуна. Гьелъул пайда букӀина дуниялалдаги ахираталдаги.

⁹ Гьел руго нилъеца къабул гьаризе кколел хӀакъал рагӀаби.

¹⁰ Гьелъие гӀололъидал нилъ гъеж гурун хӀалтӀулел ругел, къеркьолел ругел, абадияв-даимав Аллагьасде хьулги лъун. Гьес хвасар гьаруна киналго гӀадамал, хасго иман лъуралал.

¹¹ Гьаб кинабго ракӀалда чӀезабун амру гьабе ва малъе гьезда.

¹² ГӀолохъанчи вугилан мунго гьез рикӀкӀинчӀого тезе чӀоге. Иман лъуразе мун мисаллъун вукӀа бицунеб рагӀулъги, гӀамал-хасияталъулъги, рокьиялъулъги, божи-иманалъулъги, вацӀцӀалъиялъул рахъалъги.

¹³ Дун гьениве вачӀинегӀан ТӀухьдул цӀалиялде, вагӀзабазде ва насихӀатазде машгъуллъе.

¹⁴ Аллагьасдасан рещтӀаралда рекъон, иман лъуразул агьлуялъул бутӀруз, дугӀаги гьабун, тӀад кверги лъун тӀамураб мехалъ, Аллагьасул амруялдалъун дуе насиблъараб гьунаралдаса пайда босичӀого чӀоге.

¹⁵ Гьеб кинабго тӀадчӀун ва ракӀ-ракӀалъго гьабе. Цинги киназдаго бихьила дур иш цебетӀолеб букӀин.

¹⁶ Дуца халккве дудаго хадубги дуца малъулелда хадубги. Гьеб ишалдаса кьурун гали тӀамуге, гьелдалъун дуца мунгоги духъ гӀенеккаралги хвасар гьарила.