Тимофейихъе тӀоцебесеб кагъат 1 - Аллагьасул Калима

1 бетӀер Саламалъул рагӀаби

¹ Гьаб буго МасихӀ ГӀисал чапар Павелил кагъат. Нилъ хвасар гьарурав Аллагьасе ва нилъер хьул лъолев МасихӀ ГӀисае бокьана дун чапарлъун вукӀине. Кагъат хъвалеб буго

² божи-иманалдалъун унго-унголъунги дие васлъун лъугьарав Тимофейиде. Эмен – Аллагьасдасан ва нилъер ТӀадегӀанав МасихӀ ГӀисадасан рекъел, баркат ва гурхӀел насиблъаги дуе!

ГьересинасихӀатчагӀаздаса цӀунизе ккела

³ Дун Македониялде унаго дица дуда гьарана Эфесалда чӀайилан ва гӀадамал къосинарулел насихӀатал тӀокӀалъ гьаругейин абун цо-цо чагӀазда лъазабейилан,

⁴ рукӀунарел-лъугьунарел жал рицунгейилан, анкьумумузул цӀарал рехсон заман инабугейилан. Гьеб сабаблъун гӀемер дагӀбаги ккола. Аллагьас нилъее бихьизабураб ва иманги лъун нилъеца гьабулеб бугеб ишалъе щибго пайда гьечӀо гьелъул.

⁵ Нилъеца гьедин малъулеб буго, ракӀ-ракӀалъулаб рокьиги, бацӀцӀадаб намусги, унго-унгояб божи-иманги цӀикӀкӀине бокьун.

⁶ Цо-цо чагӀазулъ гьеб хутӀун гьечӀо. Гьел машгъуллъун руго гӀадада ва гӀемер гаргадиялде.

⁷ Гьезие бокьун буго Мусал Къануналъул мугӀалимзабилъун рукӀине, амма лъаларо жидеца бицунелъул хӀакъикъат ва жидедагоги бичӀчӀуларо гьедин ракӀчӀун гӀадамазда лъазабулеб бугеб жоялъул магӀна.

⁸ Нилъеда лъала Къанун лъикӀаб жо букӀин, битӀун пайда босулеб бугони.

⁹ Лъала къанунал ритӀухъго хьвадулезе гӀоло рахъулареблъиги. Гьел рахъун руго квешал ва мутӀигӀлъуларел, пасатал ва мунагьазукьа хӀинкъуларел, Аллагь какулел ва Аллагьасдаса ратӀалъарал, эбел-эмен чӀвалел гӀадамазе; чӀвадарухъабазе,

¹⁰ хъахӀбаял гӀадамазе цоцаздасан босадул лазат босулел бихьиназе, гӀадамал рикъулезе, жидерго гьаги хвезабун, гьересиго нугӀлъи гьабулезе ва битӀараб нухдаса гьетӀаралщиназе.

¹¹ БитӀараб нух ккола гьардарав Аллагьасул къудраталъул хӀакъалъулъ диде божилъи гьабураб Рохалил хабаралъул нух.

Аллагьас Павелида цӀоб лъуна

¹² Дие къуват кьурав нилъер ТӀадегӀанав МасихӀ ГӀисае рецц! Гьес дун божизе бегьулевлъун рикӀкӀана ва жиндие хъулухъ гьабизе тӀадкъана дида –

¹³ цебе кидаялиго жив какарасда, жив хӀакъир гьавун, хадув лъугьарасда ва жив къварид гьавурасда. Доб кинабго дица дирго лъавукълъиялдалъун ва божунгутӀиялдалъун гьабулеб букӀиндал, гурхӀана дида Аллагь.

¹⁴ Нилъер ТӀадегӀанасул баркат гьарзалъана дие. МасихӀ ГӀисаде цолъидал божи-иманги рокьиги цӀикӀкӀана дир рекӀелъ.

¹⁵ Гьале нилъеца тӀубанго къабул гьаризе кколел хӀакъал рагӀаби: МасихӀ ГӀиса дуниялалде вачӀана мунагь-хӀакъалъул агьлу хвасар гьабизе ва гьале дунги вуго гьезда гьоркьоса бищунго кӀудияв мунагьчи.

¹⁶ Аллагьасе бокьана дида – бищунго цӀикӀкӀун мунагьал гьарурав чиясда – МасихӀ ГӀисаца цӀоб лъезе. Бокьана гьесде иман лъун, цӀияб гӀумру насиблъаразе дун мисаллъун лъугьине. Гьединлъидалин Аллагь дида гурхӀарав.

¹⁷ Даимаб реццги цӀарги абадияв парччахӀасе – холарев-унарев, вихьуларев ва цохӀо вугев Аллагьасе! Амин.

¹⁸ Тимофей, дир вас, цо кидаялиго дур хӀакъалъулъ Аллагьасдасан рещтӀарал рагӀабиги ракӀалде щун, гьадинаб тӀадкъай кьолеб буго дица дуе! Гьел рагӀабиги гӀадахъ росун вагъе, мун гӀадинав чи вагъизе кколеб куцалъ,

¹⁹ божи-иманалъул ва намус бацӀцӀалъиялъул ярагъги борчун. Цо-цо гӀадамаз гӀодобе рехун буго гьеб ярагъ, ва гьезул божи-иманалъул гамаги ралъдалъ гъанкъана.

²⁰ Гьединазда гьоркьор руго Гьименейги Александрги, дица гьел рехана илбисалъул ханлъиялде, Аллагь какулеб гӀамал тезабизелъун.