Фессалоникиязухъе тӀоцебесеб кагъат 4 - Аллагьасул Калима

4 бетӀер Павелил насихӀатал

¹ Ахиралдаги, вацал, нижедасан ругьунлъараб къагӀидаялъ, гьанжелъизегӀан хьвадаралго гӀадин, гьанжеялдаса хадурги нуж Аллагь разилъиледухъ дагьалги лъикӀ хьвадейилан ТӀадегӀанав ГӀисал цӀаралдалъун гьарулеб буго нижеца нужеда.

² Нужеда лъала ТӀадегӀанав ГӀисал амруялдалъун нижеца нужеда малъарабщинаб:

³ Аллагьасе бокьун буго нуж рацӀцӀадго хьвадизе,

⁴ нужер щивав чияс чӀужуялдехун ракӀбацӀцӀалъиги намусги цӀунизе,

⁵ Аллагь лъалареб халкъалъ гӀадин, гьаваялда нахърилълъун, хъахӀбалъи гьабунгутӀизе.

⁶ Гьеб ишалъулъ диналъул вац гуккизе ва гьесие квешлъи гьабизе бегьуларо. Гьеб киналъухъго Аллагьас тамихӀ-жаза гьабула. Гьелъул хӀакъалъулъ нижеца нужеда гьенибги бицун букӀана ва гьеб тӀубачӀого бегьуларилан лъазабунги букӀана.

⁷ Аллагьас нилъ тӀаса рищана, хъублъиги рехун тун, рацӀцӀадго хьвадизе.

⁸ Гьедин хьвадиларилан чӀарав чияс инсанасдасан бачӀаралде гуро мугъ рехулеб бугеб, нужеде Илагьияб рухӀ рещтӀинабурав Аллагьасдасан бачӀаралдейин.

⁹ Нужерго диналъул вацал рокьейилан дица нужехъе хъвазе ккеларо, Аллагьас малъун нужеда лъалеб бугелъул нужго цоцазе рокьизе.

¹⁰ ТӀолабго Македониялда ругел вацал рокьулелъулха нужее. Дица нужеда гьарулеб буго, вацал, дагьалги цӀикӀкӀун цоцазе рокьейилан.

¹¹ Цебеги нижеца нужеда лъазабун букӀараб къагӀидаялъ, нужерго ишги гьабун, гӀодоре риччан ва нужерго квералъ бетӀербахъиги гьабун рукӀине хӀаракат бахъе.

¹² Гьебмехалъ цогидал гӀадамазда гьоркьобги къадру-къимат борхила нужер ва лъидениги кколареб магӀишатги букӀина.

ГӀиса МасихӀ кӀиабизе вачӀараб мехалъ хваразе щиб лъугьине бугеб?

¹³ Хваразул хӀакъалъулъги нужеда бичӀчӀизабичӀого гӀеларо, хваралъуса рахъиналде хьулго гьечӀел цогидал гӀадамалго гӀадин, нужги пашманлъунгутӀизе.

¹⁴ ГӀиса хвеялда ва хваралъуса вахъиналда нилъ божулел гӀадин, нилъ божула иманалда хварал гӀадамал Аллагьас гьесда цадахъ жиндихъего рачине рукӀиналдаги.

¹⁵ Гьаб нижеца нужеда малъулеб буго ТӀадегӀанасул рагӀуда рекъон: ТӀадегӀанав вачӀинегӀан чӀаго хутӀаниги, хвараздаса цере ккеларо нилъ.

¹⁶ Аллагьасул буюрухъги рагӀараб, кӀудияв малаикас гьаракьги гьабураб ва Илагьияб ссурги пураб мехалъ живго ТӀадегӀанав рещтӀина. Ва МасихӀиде иман лъун хварал гӀадамал тӀоцере рахъина тӀаде.

¹⁷ Цинги нилъ – чӀаго хутӀаралги гьезда цадахъ Аллагьас накӀкӀазда аскӀоре зобалазде ракӀарила ТӀадегӀанасда дандчӀвазе. Гьедин абадиялъго нилъ ТӀадегӀанасда цадахъ рукӀина.

¹⁸ Гьеле гьел рагӀабаздалъун цоцазул ракӀбатизабе нужеца.