Коринфиязухъе тӀоцебесеб кагъат 6 - Аллагьасул Калима

6 бетӀер Иман лъурал цоцаз судалде щай ахӀулел?

¹ Жиндирго диналъул вацасдехун нужеда гьоркьоса пуланав чиясул дагӀба-рагӀи бугони, Аллагьасул халкъги рехун тун, иман гьечӀезухъе суд гьабизе ине бегьилищ гьев?

² Нужеда лъаларебищ гьаб гӀаламалъе суд Аллагьасул халкъалъ къотӀизе букӀин? ГӀаламалъего суд гьабизе бугел нужеда кӀоларебищ гӀиси-бикъинаб дагӀба-рагӀи къинабизе?

³ Нужеда лъай: малаикзабазегицин суд гьабизейин нилъеца бугеб. Гьаб дуниялалъул ишал тӀуразе кигӀанха нужее бигьалъизе кколеб!

⁴ Гьединаб дагӀба-рагӀи нужеда гьоркьоб ккараб мехалъ, щай нужеца гьеб нужерго агьлуялда гьоркьоб къимат гьечӀел гӀадамазде гӀарз бахъулеб?

⁵ Нечоларищ нуж? Диналъул вацал рекъезаризе кӀолев цониги гӀакъилав чи нужеда гьоркьов ватичӀого вукӀине рес гьечӀо.

⁶ Бихьулищ – вацас вац судалде вачунев вуго, гьебги – иман лъечӀез хӀукму къотӀизе.

⁷ Нужеда гьоркьоса гӀадамал судалде ине ккеялъгицин нугӀлъи гьабула нуж къеялъе. Нужее гьабураб зарал-зиянги баччун рукӀинго лъикӀ гурищ? Нужехъа боцӀи-рикъзи бахъиги хӀехьон рукӀинго лъикӀ гурищ?

⁸ Нужецайин абуни цоцазе зарал-зиян гьабулеб буго, цоцахъа боцӀи-рикъзи бахъулеб буго. Лъие гьеб гьабулеб бугеб? Нужерго вацазе!

⁹ Нужеда лъаларебищ пасатал гӀадамазе Аллагьасул ПарччахӀлъи насиблъулареблъи? Нужго нужецаго гуккуге! Пасалъи гьабулезе, гьересиаллагьзабазе лагълъи гьабулезе, зина гьабулезе, бихьиназдасан лазат босулел бихьиназе,

¹⁰ хъантӀаразе, цӀогьабазе, гьекъолдухъабазе, мацӀихъабазе, хъамалчагӀазе – гьезул цонигиязе Аллагьасул ПарччахӀлъи насиблъуларо.

¹¹ Нужеда гьоркьорги рукӀана гьединал гӀадамал. Амма нуж гьанже чурун руго, рацӀцӀалъизарун руго, ТӀадегӀанав ГӀиса МасихӀил цӀаралдалъун ва нилъер Аллагьасул РухӀалдалъун ритӀухълъизарун руго!

Черх – Илагьияб РухӀ жаниб чӀолеб мукъадасаб рукъ

¹² «Бокьарабщинаб гьабизе бегьула!» – ян абула цо-цояз. Бокьарабщинаб гьабиялъул гуребха пайда букӀунеб. «Бокьарабщинаб гьабизе бегьула!» Амма дун сундулниги лагълъун лъугьине бегьуларо.

¹³ Цогидаз абула: «Квен – чохьое, чехь – квание!» – ян. Аллагьас гьеб кӀиябгоги пасалъизабула. Гьаваялда нахъбилълъине гуро черх бижун бугеб, ТӀадегӀанасе тӀагӀаталъейин. ТӀадегӀанас тӀалаб гьабила гьелъул.

¹⁴ ТӀадегӀанав ГӀиса хваралъуса вахъинавуна Аллагьас, жиндирго къудраталдалъун нужги хваралъуса рахъинарила гьес.

¹⁵ Нужеда лъаларебищ нужер чурхдулги МасихӀил черхалъул бутӀаби рукӀин? МасихӀил черхалъул бутӀа хъахӀбал черхлъун лъугьинабизе бегьилищ? Киданиги бегьуларо!

¹⁶ Нужеда лъаларебищ хъахӀбаялда аскӀов вегарасул черх гьелъул черхгун цолъулеблъи? ТӀухьдузда хъван бугелъул: «гьел кӀиялго цолъун, цого лъугьина».

¹⁷ ТӀадегӀанасде цолъарасул рухӀ гьесул РухӀгун цолъула.

¹⁸ ХъахӀбалъи рикӀкӀад гьабе! Цогидал мунагьал инсанасул черхалдаса къватӀирехун ккарал рукӀуна. ХъахӀбаяв чиясин абуни, мунагь гьабула жиндирго черхги хӀакъирлъизабун.

^19-20 Аллагьасдасан нужее щвараб Илагьияб РухӀ жаниб чӀолеб мукъадасаб рукълъун нужер черх букӀин лъаларебищ нужеда? ЦӀикӀкӀараб мухьги кьун росун ругелъул, нужго бетӀергьанал чагӀи гуро нуж. Аллагь кӀодо гьавизе пайда босе нужерго чурхдуздаса!