Коринфиязухъе тӀоцебесеб кагъат 5 - Аллагьасул Калима

5 бетӀер Иман лъуразул агьлуялда жаниб ккараб пасатаб иш

¹ Цинги, дида бицана нужер гьениб мажусиязулгицин гьечӀебгӀадаб инжитаб иш лъугьун бугилан – цо чи жиндирго бесдал эбелалда аскӀов вегулев вугилан.

² Гьелдаса пашманлъизе кколеб бакӀалда нужер чӀухӀиго щиб! Гьединаб инжитлъи жиндасан лъугьарав чи нужерго агьлуялда гьоркьоса вачахъизе кколаан нужеца.

^3-4 Дирго рахъалъ абуни, черх гьаниб бугониги, рухӀ гьениб нужеда аскӀоб бугелъул, гьенив вугев гӀадин вукӀуна дун. Нужер данделъиялда нилъер ТӀадегӀанав ГӀисал къудратгун цадахъ дирго рухӀги гӀахьаллъизабун, нилъер ТӀадегӀанав ГӀисал цӀаралдалъун дица хӀукму къотӀана

⁵ гьеб иш гьабурав чи илбисалъул кверщаликье кьезе – биччанте гьесул мунагьаб напс хвезе. ТӀадегӀанав вачӀараб къоялъ гьесул рухӀ хвасарлъизеги бегьула.

⁶ Нужер гьеб гӀамал кӀодолъи лъикӀаб хасият гуро. Нужеда рагӀанищ гьадинаб кици: «ГьитӀинаб реччеялъги гӀемераб ханжу беччизабула»?

⁷ Мунагьалъул басрияб речче тӀубанго нахъе рехе. Гьебмехалъ речче гъорлъ гьечӀого бежараб чедлъун лъугьина нуж. Гьединаб чедин нуж кколел! Нилъер пасхаялъул кьегӀер – МасихӀ – цевего къурбанлъун лъугьиндалха!

⁸ РачӀа гьанже нилъеца пасхаялъул байрамалде хӀадурлъи гьабилин басрияб речче (ай мунагьги квешлъиги) цадахъ гьечӀого. РеччичӀел чадал (ай бацӀцӀадабщинабги хӀакъабщинабги) цадахъ, росун хӀадурлъизин гьелде.

⁹ Дица нужехъе битӀараб кагътида хъван букӀана пасатал чагӀазулгун гьоркьоблъи гьабугейилан.

¹⁰ Пасатал, хъантӀарал, макруял гӀадамазул ва гьересиаллагьзабазе лагълъи гьабулел мажусиязул гуребха дица бицунеб букӀараб. Гьездаса ратӀалъизени, дуниял тун ине ккелаан ниж.

¹¹ Дица хъван букӀана, жидеца иман лъун бугиланги абун, пасалъиги гьабулел, хъантӀун магӀишатги гьабулел, гьересиаллагьзабазе лагълъиги гьабулел, мацӀги гьабулел, хӀилла-рекӀкӀги гьабулел, гьекъолдизеги гьекъолдулел гӀадамазулгун хурхен гьабугейилан, хӀатта гьезда цадахъ гӀодор чӀун кванагейилан.

^12-13 Нилъер гуреб агьлуялъе суд гьабунги щайха дие? Аллагьас гьабила гьезие суд. Нужерго агьлуялъул чиясе суд гьабизе кколаребищ нужеца? ТӀухьдузда хъван бугелъул: «Квешав чи нужер агьлуялда гьоркьоса нахъе вачахъе», – ян.