Коринфиязухъе тӀоцебесеб кагъат 4 - Аллагьасул Калима

4 бетӀер МасихӀил чапарзаби

¹ МасихӀие хъулухъалъе чӀарал чагӀилъун рикӀкӀине ккола нужеца ниж. Нижее амру гьабун бугелъулха Аллагьасул балъголъи гӀадамазе загьирлъизабеян.

² Хъулухъалъе чӀарав чи цохӀо жиндирго бетӀергьанасе ритӀухъав вукӀине ккола.

³ Дирго хӀакъалъулъ абуни, дие махӀги ургъел гьечӀо нужеца яги гӀадамазул кинаб букӀаниги судалъ дие хӀукму къотӀиялъул. Дицагоги къотӀуларо диего хӀукму.

⁴ Дида гӀайиб гьечӀеблъи лъала дида. Амма гьелдалъун гуро дун ритӀухълъулев. ТӀадегӀанасин дие хӀукму къотӀизе бугеб.

⁵ ТӀадегӀанав вачӀинегӀан лъицаниги лъиениги хӀукму къотӀуге. Гьес канлъуде босила бецӀлъукь бугебщинаб, рекӀелъ ругел къасдалгицин тӀатинарила. Гьеле гьебмехалда Аллагьасдасан щивав чиясе щвела жиндирго кири.

⁶ Нужее лъикӀлъиялъе дица гьеб кинабго бихьизабуна, вацал, нужеда, Аполлосилги диргоги мисалги бачун, «хъвараб гурони лъугьунарилан» абурал рагӀабазул магӀна нужедаги бичӀчӀизе ва, лъикӀалги тӀокӀалги ругилан, цоцазда цере чӀухӀдарунгутӀизе.

⁷ ХӀакъикъаталдаги сундалъун нуж цогидаздаса тӀокӀал ругел? Аллагьасдасан щвараб гуреб жо щиб нужелъ бугеб? Нужее гьеб нигӀматлъун кьунги бугеб мехалъ, цебего нужехъ гьеб букӀараб гӀадин, гӀамал кӀодолъун щай нуж лъугьунел?

⁸ Гьайгьай, гьанже нуж гӀорцӀун руго! Гьанже нуж бечелъун руго! Ниж гьечӀониги, гьанже парччахӀзабилъун лъугьун руго нуж. Дие бокьилаан унго-унголъунги нуж парччахӀзабилъун лъугьунелани, нужеда цадахъ нижецаги парччахӀлъи гьабизе.

⁹ Амма дида ракӀалде ккола Аллагьас ниж – чапарзаби, халкъалда цере чӀвазе къотӀарал чагӀи гӀадин, бищун ахиралда чӀезарун ругилан. ТӀолабго махлукъаталъе – малаикзабазеги гӀадамазеги ниж лъугьана байрамалда халкъалъе кепалъе рагъулезда релълъарал чагӀилъун.

¹⁰ МасихӀие гӀоло ниж гӀабдалзабилъун рикӀкӀунел руго, МасихӀиде цолъарал нуж гӀакъилзаби руго. Ниж загӀипал руго, нуж къуватал руго. Нужер хӀурмат гьабула, ниж хӀакъир гьарула.

¹¹ Жакъа къоялде щвезегӀанги ракъунги къечонги руго ниж. Нижер ретӀелги хохораб буго, ниж рухулел-кьабулелги руго, мина-руссенги нижер гьечӀо.

¹² ЗахӀмат бихьун гурони хинкӀ-чедги щолеб гьечӀо нижее. Ниж хӀакъир гьарула – нижеца баркат лъегиян абула, нижее гӀазаб кьола – нижеца хӀехьола.

¹³ Нижедасан мацӀ гьабула – нижеца лъикӀаб бицуна. Ниж гьаб дуниялалъе хӀур-кӀучлъун хутӀун руго, гьаб гӀаламалъеги чӀахӀ-къуллъун хутӀун руго.

¹⁴ Нуж инжит гьаризе гуро, вацал, дица гьаб кинабго хъвалеб бугеб. Дирго хириял лъималазе гӀадин, гӀакълу кьолеб буго дица нужее.

¹⁵ МасихӀил дарсал малъулев азарго мугӀалим нужер вугониги, эмен нужер цо гурони гьечӀелъул. Дун нужее эменлъун лъугьана, Рохалил хабаралдалъун дица нуж МасихӀиде цолъизаруна.

¹⁶ Гьединлъидалин дида релълъун хьвадейилан гьарулеб бугеб дица нужеда.

¹⁷ МасихӀил нухдасан дун хьвадулев вугеб куц нужеда ракӀалде щвезабизе гьале нужехъе витӀулев вуго ТӀадегӀанасе ритӀухъав ва дие хирияв васлъун лъугьарав Тимофей. Гьеб нухдасан хьвадейилан дица малъула киса-кибго киналго иман лъуразул агьлуялда.

¹⁸ Нужеда гьоркьор руго нич гьечӀел гӀадамалги. Гьезда ракӀалде кколеб батила дун тӀокӀав гьениве вачӀинарилан.

¹⁹ Амма, ТӀадегӀанасе бокьани, кватӀичӀого нужехъе вачӀина дун. Гьел нич гьечӀезул хабар-гаргар букӀин гуреб, къуват-гучги бугищали лъала дида гьебмехалда.

²⁰ Аллагьасул ПарччахӀлъи хабар-гаргаралъулъ гуро бугеб, къуват-гучалъулъин.

²¹ Щиб нужее бокьилеб? Дун цӀалги босун вачӀинейищ, яги нужеде бугеб рокьиялъул цӀураб хӀеренаб рагӀигун вачӀинейищ?