Коринфиязухъе тӀоцебесеб кагъат 3 - Аллагьасул Калима

3 бетӀер Аллагьасе хъулухъ гьабулел чагӀи

¹ Амма нужедехунни, вацал, дун Илагьияб РухӀалъ цӀурал гӀадамаздехун гӀадин кӀалъачӀо, кӀалъана напсалъ малъараб гьабулездехун гӀадин ва МасихӀиде цолъараб гӀумру лъималазда кинигин гурони бичӀчӀуларездехун гӀадин.

² Кваназе квен гуро дица нужее кьураб, гьекъезе рахь кьуна. Кваназе гӀун рукӀинчӀо нуж добмехалъ, – гьанжегицин гӀун гьечӀо нуж!

³ ГьанжелъагӀанги напсалъ малъараб гьабулеб бугелъулха нужеца. Нужеда гьоркьоб жахӀда-хӀусудги дагӀба-рагӀиги бугеб мехалъ, напсалъе мутӀигӀлъи гурищ гьеб кколеб, гьаб дуниялалъул гӀадамал гӀадин хьвадулел рукӀинги гурищ кколеб?

⁴ Цояс «дун Павелил рахъ ккурав вугилан», цогидасги «дун Аполлосил рахъ ккурав вугилан» абулеб бугони, гьаб дуниялалъул гӀадамаллъун ккеларищ нуж?

⁵ Гьаха, щив кколев Аполлос? Павелги щив кколев? Гьел руго нуж иманалде рачарал ва хъулухъалъе тӀамурал гӀадатиял чагӀи. БетӀергьанас тӀадкъараб хӀалтӀи гьабулеб буго гьезул щивас.

⁶ Дица мугь чӀана, Аполлосица лъалъана, амма бижизе Аллагьас гьабуна.

⁷ Мугь чӀолевги – рикӀкӀунаро, лъалъалевги – рикӀкӀунаро. Бижизабулев – Аллагь вуго!

⁸ Мугь чӀолесдаги лъалъалесдаги гьоркьоб батӀалъи гьечӀо. Жидеца гьабуралда рекъараб мухь щвела гьезул щивасе.

⁹ Ниж кӀиялго руго Аллагьасул хӀалтӀухъаби, нуж руго Аллагьасул хур, Аллагьасул мина.

¹⁰ Аллагьас дие кьураб баркатаб гьунаралда рекъон, махщел бугев устарас гӀадин, дица кьучӀ лъуна. Цогидаз гьелда тӀад мина балеб буго. Щивас хал гьабизе биччанте кин жинца балеб бугебали.

¹¹ Цебего лъун бугелдаса батӀияб кьучӀ лъезе лъиданиги кӀоларо. ЦохӀо бугеб гьеб кьучӀги ГӀиса МасихӀ ккола.

¹² Амма гьеб кьучӀалда тӀад мина меседил, гӀарцул, жавгьар-якъуталъул, яги цӀулал, бакъвараб харил, муцӀидул баниги,

¹³ щивас гьабураб хӀалтӀи къиямасеб къоялъ бихьила. Гьеб къоялъ цӀаялъ хӀалбихьулелъулха щивас кинаб хӀалтӀи гьабун бугебали.

¹⁴ Гьеб кьучӀалда тӀад бараб минаялда доб цӀа хӀехьезе кӀвани, устарасе кири щвела.

¹⁵ ЦӀаялъ гьеб бухӀани, зарал ккела. Хвасарлъизени гьев хвасарлъила, амма цӀадулъа вахъарав чи гӀадин вукӀина.

¹⁶ Нужеда лъаларебищ нуж Аллагьасул мукъадасаб рукъ ругеблъиги нужелъ Аллагьасул РухӀ бугеблъиги?

¹⁷ Аллагьасул мукъадасаб рукъ щущазабурав чи Аллагьасги тӀагӀинавила. Нуж ккола Аллагьасул гьеб мукъадасаб рукълъун.

¹⁸ Лъицаниги живго гуккуге абе! Нужеда гьоркьоса лъиданиги ракӀалде кколеб батани гьаб дуниялалда жив гӀакъилав вугилан, хӀакълъунго гӀакъилав вукӀине бокьани, гьев гӀантлъеян абе.

¹⁹ Гьаб дуниялалъул гӀакъиллъи Аллагьасда цебе гӀантлъилъун кколелъулха. ТӀухьдузда хъван буго: «Аллагьас гӀакъилзаби жидерго сихӀирлъиялъул гьиналъ ккола».

²⁰ Цоги бакӀалда хъван буго: «БетӀергьанасда лъала гӀакъилазул пикрабаз пайда гьабулареблъи».

²¹ Гьединлъидал, гӀадамазул рахъги ккун, живго веццизе лъугьунге щивниги. Кинабго нужерлъидалха:

²² Павелги, Аполлосги, Кефаги, дуниялги, гӀумруги, хвелги, гьанжесебги, букӀинесебги – кинабго нужер буго.

²³ Нуж МасихӀил руго, МасихӀги Аллагьасул вуго!