Коринфиязухъе тӀоцебесеб кагъат 2 - Аллагьасул Калима

2 бетӀер Аллагьасул балъгояб гӀакъиллъи

¹ Доб мехалда дун нужехъе вачӀиндал, Аллагьасул хӀакъалъулъ Хабар лъазабулаго, дилъ букӀинчӀо кӀалзул пасихӀлъиги кӀудияб гӀакъиллъиги.

² Нужеда гьоркьов вугеб заманалда дица хӀукму гьабун букӀиндалха, ГӀиса МасихӀ (хасго гьев хъанчида ван хвей) хутӀун, цогидабщинаб рехун телилан.

³ Дун нужеда аскӀов вукӀана загӀипгоги ва хӀинкъун сородулевги.

⁴ Дир гаргаралъги хабаралъги нужее гьабураб асар – гьеб букӀинчӀо гӀакъилал рагӀабазул хӀасиллъун. Илагьияб РухӀалъул хӀалкӀолъиялдалъунги мугӀжизатаздалъунги лъугьана гьеб гьедин, –

⁵ нужелъ гьеб божи-иман, инсанасул гӀакъиллъиялдалъун гуреб, Аллагьасул къудраталдалъун лъугьине.

⁶ Саламатал гӀадамазени гӀакъилаблъун букӀуна нижеца бицараб хабар. Амма гьеб хабар гьаб дуниялалъулаб гӀакъиллъи гуро, гьаб дуниялалъул кверщелчагӀазул (кверщел жидехъа унезул) гӀакъиллъиги гуро.

⁷ Нижеца бицунеб буго Аллагьасулаб балъгояб гӀакъиллъиялъул. Аллагьас бахчун тараб гьеб гӀакъиллъи нилъер цӀар-реццалъейин дуниял бижилелдего къачӀан букӀараб.

⁸ Гьаб дуниялалъул цониги кверщелчиясда бичӀчӀичӀо гьеб. БичӀчӀун букӀарабани, цӀар-реццалъул бетӀергьан хъанчида валароан гьез.

⁹ ТӀухьдуздаги хъван бугелъулха: «Лъилниги бералда бихьичӀебги, лъилниги гӀиналда рагӀичӀебги, лъилниги гӀакълу нахъгӀунтӀичӀебги къачӀан буго Аллагьас жив вокьулезе».

¹⁰ Нилъеени Аллагьас жиндирго РухӀалдалъун загьир гьабуна гьеб. РухӀ сундулъего лъугьуна – Аллагьас цӀакъго бахчун таралда гъорлъегицин лъугьуна.

¹¹ Гьесулъ жиндилъго бугеб рухӀалда гурони, цоги чиясда лъалебищ инсанасул рекӀелъ ругел пикраби? Гьедин Аллагьасул пикрабиги, гьесул РухӀалда гурони, лъалищха.

¹² Нилъее щвараб РухӀ дуниялалъулаб гуро, Аллагьас нилъее кьурал нигӀматал нилъеда ричӀчӀизе гьесдасан бачӀараб буго.

¹³ Нилъеца гьелъул хӀакъалъулъ инсанасулаб гӀакъиллъиялъ малъарал рагӀабаздалъун гуро бицунеб, РухӀалъ малъарал рагӀабаздалъун бицуна. Илагьияб РухӀалъ цӀуразда бичӀчӀизабула нилъеца РухӀалда хурхарабщинаб.

¹⁴ Жиндилъе РухӀ рещтӀинчӀев инсанас къабул гьабуларо Илагьияб РухӀалдасан бугебаб. Гьесие гьеб гӀантаб жолъун кколелъулха. Гьесда гьеб бичӀчӀизего бичӀчӀуларо, РухӀалдалъун гурони бичӀчӀизе рес гьечӀелъул.

¹⁵ Илагьияб РухӀалъ цӀурав чиясда кӀола бокьараб жоялъул хӀакъикъат лъазе, амма лъиданиги кӀоларо Илагьияб РухӀалъ цӀурав чиясул хӀакъикъат лъазе.

¹⁶ ТӀухьдузда хъван бугелъулха: «БетӀергьанасул пикрабазда нахъгӀунтӀулев чи вугищ? Гьесие гӀакълу кьезе лъида кӀолеб?» Нилъелъин абуни МасихӀил гӀакъиллъи буго.