Коринфиязухъе тӀоцебесеб кагъат 16 - Аллагьасул Калима

16 бетӀер Иерусалималда бугеб иман лъуразул агьлуялъе садакъа

¹ Гьанже бицинин Иерусалималда бугеб иман лъуразул агьлуялъе гӀарац бакӀариялъул хӀакъалъулъ. Галатиялда бугеб иман лъуразул агьлуялда дица малъухъе гьабе нужецаги.

² Нужер щивав чияс гьатӀан къоялъ батӀаго лъун те нужее щваралда рекъон лъикӀ бихьараб гӀарац. Цинги дун вачӀараб мехалъ гьеб бакӀаризе лъугьине ккеларо.

³ Дун гьениве щвейгун, гьеб нужер садакъа Иерусалималде щвезабизе ритӀила нужеца тӀаса рищарал гӀадамал ва гьезда цадахъ битӀила гьел нужер вакилзаби ругилан кагъатги.

⁴ Дунго гьениве ине ккани, дидаго цадахъ рачина гьелги.

Павелица гьабизе бугеб сапаралъул хӀакъалъулъ

⁵ Македониялдаса нужехъеги вачӀина дун – Македониялдасан ине ракӀалда буго дида.

⁶ Цодагьаб мехалъ нужеда аскӀов чӀезеги бегьула, щиб лъалеб, хаселалъго гьенив хутӀизеги бегьула. Гьенисаги дица сапар бухьунеб бугони, нужеца кумек гьабизе ккела дие.

⁷ Сапаралда вукӀаго нужехъе ваккизе вачӀине гурелъулха дие бокьун бугеб, ТӀадегӀанав разилъани, лъикӀаланго заманаялъ гьенив чӀезе хиял буго.

⁸ БачӀин бакӀариялъул байрам тӀаде щвезегӀан чӀела дун Эфесалда.

⁹ Пайдаяб хӀалтӀуе кӀудияб нуцӀа рагьун буго дие, дандечӀаралги гӀезегӀан руго.

¹⁰ Тимофей гьениве вачӀараб мехалъ, гьениб гьесие хӀинкъи букӀунареб хӀал гьабе. Гьевги, дунго гӀадин, ТӀадегӀанасе гӀололъидалха хӀалтӀулев вугев.

¹¹ ГӀамал кӀодого ралагьуге нуж гьесухъ. Аллагьас нух битӀизабегийилан гьарун тӀадвуссун витӀе. Дунги вацалги гьев вачӀиналъухъ ралагьун чӀун руго.

¹² Нилъер вац Аполлосил хӀакъалъулъ бицани, дица гьесда цӀакъ гьарана вацалгун цадахъ нужехъе щвайилан, амма гьабсагӀат гьениве ине къасд гьечӀо гьесул. Рес ккараб мехалъ вачӀина гьев.

Кагътил ахиралда саламалъул рагӀаби

¹³ РорчӀи ккве, иман щулалъизабе, бахӀарчияллъун ва къуваталлъун рукӀа.

¹⁴ Нужеца гьабулебщинаб рокьигун гьабе.

¹⁵ Цоги гьари буго, вацал, нужеде: Стефанасил рукъалъул агьлу Ахаялда тӀоцере МасихӀида божарал чагӀи рукӀин лъалаха нужеда. Аллагьасул халкъалъе тӀубанго хъулухъалъе чӀарал чагӀи руго гьел.

¹⁶ Дица нужеда гьарила гьединал чагӀазухъги, гьезда цадахъ хӀалтӀулезухъги, хъулухъ гьабулезухъги гӀенеккейилан.

¹⁷ Дун цӀакъ вохун вуго Стефанасги, Фортунатги, Ахаикги гьанире рачӀиналдаса. Нуж дие камун рукӀин лъазе биччаларо гьез дида.

¹⁸ Нужер ракӀазе къвакӀи кьураб гӀадин, дир рекӀееги къвакӀи кьола гьез. Гьединал чагӀазул къимат гьабе!

¹⁹ Асиялда ругел иман лъуразул агьлуялъул салам буго нужеде. Аквилалгун Прискиллал ва гьезул рокъор данделъулел иман лъуразул агьлуялъулги буго нужеде ТӀадегӀанасул цӀар рехсараб, урхъараб салам.

²⁰ Гьанир ругел киналгоги вацаз битӀулеб буго нужеде салам. Муъминал вацаз гӀадин, цоцазда баун, салам гьабе.

²¹ Гьаб дирго квералъ хъвалеб буго: Павелил салам буго нужеде.

²² ТӀадегӀанав вокьуларесе нагӀана батаги! «Марана-та!» – вачӀа, нижер ТӀадегӀанав!

²³ ТӀадегӀанав ГӀисал цӀоб лъеги нужеда!

²⁴ МасихӀ ГӀисаде цолъарал нуж киналго рокьула дие.