Коринфиязухъе тӀоцебесеб кагъат 15 - Аллагьасул Калима

15 бетӀер МасихӀ хваралъуса вахъинавичӀев ватани, нужер божи-иман гӀадада ккана

¹ Гьанже дица нужеда ракӀалде щвезабулеб буго, вацал, нужеда дица лъазабураб, нужецаги къабул гьабураб, нужер божи-иманалъул щулияб кьучӀлъунги бугеб Рохалил хабар.

² Гьеб дица бихьизабураб нухдаса кьуричӀого чӀани, нуж хвасарлъула. Гурони – нужер божи-иман гӀадада ккола.

³ Сундасаго цебе дица нужеда бицана дицаги къабул гьабураб хабар: Хириял ТӀухьдузда хъван букӀараб ритӀухълъизе, МасихӀ хвана нилъер мунагьазе гӀоло.

⁴ Гьев хабалъ лъуна. ТӀухьдузда хъван букӀараб ритӀухълъизе, лъабабилеб къоялъ хваралъуса вахъинавуна.

⁵ Пётрида вихьана гьев, цинги анцӀила кӀиявго чапарасдаги вихьана.

⁶ Цинги гьев цого заманалда вихьана щунусгоялдаса цӀикӀкӀарав вацасдаги, гьезул гӀемерисел гьабсагӀатги чӀаго руго, цо-цоял хвана.

⁷ Цинги Якъубида вихьана, цинги киналго чапарзабаздаги вихьана.

⁸ Гьел киназдасаго хадув гьев дидаги вихьана, мех щвечӀого гьабураб лъимада гӀадин.

⁹ Дун вуго бищунго гьитӀинав чапар. Чапарлъун рикӀкӀине мустахӀикъав гьечӀо дун, Аллагьасде иман лъуразул агьлуялъе дица гӀазаб кьолеб букӀиндалха.

¹⁰ Амма Аллагьасул баркаталдалъун гьанже дун вуго гьав нужеда вихьулев чи. ГӀадада гуро Аллагьас диде баркат рещтӀинабураб. Дол чапарзабаздасаги цӀикӀкӀун хӀалтӀана дун. Дун гуревха хӀалтӀарав, дилъ бугеб Аллагьасул баркат хӀалтӀана.

¹¹ Дол рукӀаниги, дун вукӀаниги батӀалъи щиб, нижеца гьедин бицуна Рохалил хабар, нужги гьелда божана.

¹² Гьедин, МасихӀ хваралъуса вахъин нижеца лъазабидалги, нужер цо-цоязда кин абизе кӀолеб хварал чӀаголъизаруларилан?

¹³ Хварал чӀаголъизаруларел ратани, МасихӀги хваралъуса вахъинавичӀо.

¹⁴ МасихӀ хваралъуса вахъинавичӀев ватани, нижеца бицараб Рохалил хабарги гӀадада ккана, нужер божи-иманги гӀадада ккана.

¹⁵ Гьелда тӀадеги, нижеца Аллагьасул хӀакъалъулъ гьересинугӀлъи гьабураблъунги кколеб буго, – Аллагьас МасихӀ хваралъуса вахъинавунилан абулеб мехалъ. Амма хварал чӀаголъизаруларел ратани, МасихӀги гьес хваралъуса вахъинавичӀо.

¹⁶ Хварал тӀаде рахъинаруларел ратани, МасихӀги хваралъуса вахъинавичӀо.

¹⁷ МасихӀ хваралъуса вахъинавичӀев ватани, нужер божи-иман гьодораб жо буго, нужги церего гӀадин нужерго мунагьазул кверщаликь руго.

¹⁸ Гьедин батани, дол МасихӀида божун хваралги тӀубанго хваралищ?

¹⁹ ГӀицӀго гьаб дуниялалъул чӀаголъиялъулъ МасихӀиде хьул лъун нилъ хьвадулел ругони, бищунго гурхӀизе ккарал чагӀи руго нилъ.

²⁰ ХӀакъикъаталдаги МасихӀ хваралъуса вахъинавуна, – хваралъуса рахъинаризе рукӀиналде киназулго хьул лъеялъе гӀоло.

²¹ Цо чи сабаблъун бачӀана хвел, цо чи сабаблъун бачӀана хваралъуса рахъинариги.

²² Адамил наслу бугелъул киналго хвезе руго, МасихӀил наслулъун лъугьиндал, киналго хваралъуса рахъинаризе руго.

²³ Киналго иргадал чӀаголъила: бищун цеве МасихӀ, цинги гьев вачӀараб мехалъ – гьесул агьлуги.

²⁴ Цинги дуниял ахирлъила. МасихӀица къезарила тахида ругелги, кверщел бугелги, хӀакимзабилъун ругелги – киналго рухӀал, цинги Эмен – Аллагьасухъе кьела жиндирго парччахӀлъи.

²⁵ МасихӀица парччахӀлъи гьабила Аллагьас гьесул киналго тушбаби гьесул малакь чӀезаризегӀан.

²⁶ Бищунго ахиралда къезабулеб тушман ккола хвел.

²⁷ ТӀухьдузда хъван буго: «Аллагьас кинабго гьесул малакь лъуна». «Киналъулго» бицунаго, гьайгьай, гьелда гьоркьове унаро гьеб кинабго МасихӀил малакь лъурав Аллагь.

²⁸ Кинабго жиндир кверщаликье ккараб мехалъ, живго Васги вукӀина гьеб кинабго жиндир малакь лъурасул кверщаликь. Гьебмехалда киналъулго кверщел Аллагьасухъ букӀин бихьила.

²⁹ Гьеб гьереси букӀарабани, хваразе гӀологи гӀадамал лъадалъ ччун щай рахъилел рукӀарал? Хварал чӀаголъуларел ратани, гьезие гӀологи гӀадамал лъадалъ ччун щай рахъулел?

³⁰ Щай нилъ кидаго хӀинкъиялда гъоркь рукӀине ккелел?

³¹ Щибаб къоялъ хвалил хӀинкъи буго, вацал, дие. Нилъер ТӀадегӀанав МасихӀ ГӀисада цебе нужедаса бугеб чӀухӀиялхӀагийилан гьедизе кӀвела гьедин бугилан.

³² Эфесалда ругел гьал жанаваралгун гӀадамазул къагӀидаялъ вагъиялдасан дие бугеб пайда щиб, дирго напсалъул пикруялда вугони? Хварал чӀаголъулел ратичӀони, «рачӀа кваназе-гьекъезе, метер нилъ хвезе ругин».

³³ Нужго гуккизе чӀоге. Квешазда аскӀоре къани, лъикӀаб гӀамалалдаса ратӀалъула.

³⁴ КантӀе, тӀокӀаб мунагьги гьабуге. Нужер цо-цоязда Аллагь лъаларо. Дица гьеб абулеб буго нуж намуслъизе.

Хварал кин чӀаголъулел

³⁵ Амма цо лъицаниги гьикъизе бегьила хварал кин чӀаголъулелилан. Кинаб черхгун гьел тӀаде рахъунелилан.

³⁶ ГӀабдал вуго гьев. Дуца ракьулъ мугь чӀола, амма цин жибго хвечӀони, гьеб тӀаде баккуларо.

³⁷ Дуца ракьулъ чӀолеб жо, ролъул букӀа яги цогидалъул букӀа, гӀицӀаб мугь буго, гьелдасан лъугьунеб «черх» гуро гьеб.

³⁸ Аллагьас кьола гьелъие жинцаго тӀаса бищараб черх – хьодул щибаб тайпаялъе батӀи-батӀияб.

³⁹ Киналго чурхдул релълъарал гьечӀо: гӀадамазул батӀиял руго, хӀайваназул батӀиял руго, хӀанчӀазул батӀиял руго, ччугӀбузул батӀиял руго.

⁴⁰ Руго зобалазулал чурхдул, руго ракьалъулалги. Зобалазулал чурхдузул жидерго берцинлъи буго, ракьалъулал чурхдузулги жидерго берцинлъи буго.

⁴¹ Бакъул батӀияб, моцӀрол батӀияб, цӀвабзазул батӀияб буго берцинлъи. Щибаб цӀваялъулгицин буго жиндирго берцинлъи.

⁴² Гьелдаго релълъун букӀина хварал чӀаголъизариги. Ракьулъе кколебщинаб хола, тӀаде баккулебщиналъе хвел гьечӀо.

⁴³ Ракьулъе сурукъго уна, тӀаде берцинго баккула. Ракьулъе загӀипго уна, тӀаде гучалда баккула.

⁴⁴ Ракьулъе тӀабигӀияб черх уна, тӀаде рухӀалъ цӀураб черх баккула. ТӀабигӀияб черхги букӀуна, рухӀалъ цӀураб черхги букӀуна.

⁴⁵ ТӀухьдузда хъван буго: «ТӀоцевесев инсанасда – Адамида рухӀ лъуна». Ахирисев Адам – чӀаголъи кьолеб РухӀлъун лъугьана.

⁴⁶ РухӀалъ цӀурабаб бачӀунаро тӀоцебе, тӀабигӀияб черх бугебаб бачӀуна. Цинги бачӀуна рухӀалъ цӀурабги.

⁴⁷ ТӀоцевесев Адам ракьул хӀуралдасан вижана, ракьалдаса вачӀана. КӀиабилев Адам зобалаздаса вачӀана.

⁴⁸ Ракьалдасан ругелал ракьалдаса вачӀарасда релълъуна. Зобалаздасан ругелал зобалаздаса вачӀарасда релълъуна.

⁴⁹ Ракьалдаса вачӀарасул сипат-сурат нилъелъ бугеб гӀадин, зобалаздаса вачӀарасул сипат-суратги букӀина нилъелъ.

⁵⁰ Дица нужеда абулеб буго, вацал, черхалъеги биялъеги Аллагьасул парччахӀлъи насиблъуларин, холебалъе холаребаб насиблъуларин.

^51-52 Цо балъголъи рагьила нужее: киналго гуро нилъ холел, амма ахирзаманалда ссур пураб мехалъ, бер къапизегӀан заман иналде, хиса-сверула нилъ. Ссур пула ва хварал тӀаде рахъинарула. Хвел гьечӀеллъун рахъина гьел тӀаде. Нилъги хиса-сверила.

⁵³ Турулебаб турулареблъун лъугьине ккола, холебабги холареблъун лъугьине ккола.

⁵⁴ Турулебаб турулареблъун лъугьараб мехалъ, холебабги холареблъун лъугьараб мехалъ ритӀухълъила ТӀухьдузда хъван бугеб гьадинаб калима: «Хвел къулчӀана, къезабуна».

⁵⁵ Хадубги: «Хвел, киб бугеб дур бергьенлъи! Хвел, киб бугеб дур хеч!»

⁵⁶ Хвалил хеч ккола мунагь. Мунагьалъе къуват Къануналдасан щола.

⁵⁷ Нилъер ТӀадегӀанав ГӀиса МасихӀидалъун нилъ бергьинарулев Аллагьасе рецц!

⁵⁸ Гьеле гьедин, дир хириял вацал, къвакӀун чӀа нуж, къуркьуге нуж. ТӀадегӀанасе гӀоло тӀадчӀун хӀалтӀе. Нужеда лъан букӀа: ТӀадегӀанасде цолъун гьабураб нужер хӀалтӀи гӀадада холаро.