Коринфиязухъе тӀоцебесеб кагъат 12 - Аллагьасул Калима

12 бетӀер Илагьияб РухӀалъ кьураб батӀи-батӀияб махщел-гьунар

¹ Илагьияб РухӀалъ кьураб махщел-гьунаралъул рахъалъ абуни, дие бокьун гьечӀо, вацал, нужеда гьеб мекъи бичӀчӀизе.

² Нужеда ракӀалда бугищ, мажусияллъун рукӀараб заманалда аллагьзабийилан тарал, кӀалъазе кӀал гьечӀел жалазе лагълъи гьабиялъ нуж батӀи-батӀияб къагӀидаялъ къосинарураб куц?

³ Гьединлъидал дие бокьун буго нужеда бичӀчӀизе: инсанасулъ Аллагьасул РухӀ бугони, гьес абиларо ГӀисае нагӀана батагийилан. Жиндилъ Илагьияб РухӀ гьечӀони, лъицаниги абиларо ГӀиса ТӀадегӀанав вугилан!

⁴ Махщел-гьунар батӀи-батӀияб букӀуна. Амма гьеб кинабго цохӀо Илагьияб РухӀалъ кьола.

⁵ Хъулухъ гьабиялъулги руго батӀи-батӀиял къагӀидаби. Амма гьел киналго цохӀо ТӀадегӀанасе руго.

⁶ ХӀалтӀи-ишги батӀи-батӀияб буго. Гьеб кинабго гьабизе киналго тӀамулев Аллагь цохӀо вуго.

⁷ Щивав инсанасулъе РухӀ хасаб къагӀидаялъ рещтӀуна киназего пайдаялъе.

⁸ Цоясе РухӀалъ кьола гӀакъилаб калам, цогидасе гьебго РухӀалъ кьола гӀелму-лъай малъизе махщел.

⁹ Гьебго РухӀалъ цогидасулъе иман тӀинкӀула, цогидасе гьебго РухӀалъ кьола унтарал сахлъизаризе гьунар;

¹⁰ цоясе кьола мугӀжизат бихьизабизе къудрат, цогидасе – иман лъуразул агьлуялда Аллагьасул амру лъазабизе махщел; цоясе – РухӀалдасан бугебги гьелдасан гьечӀебги батӀа гьабизе гьунар, цогидасе – батӀи-батӀиял мацӀазда кӀалъазе лъай, яги батӀи-батӀиял мацӀазда бицунеб жо цогидазда бичӀчӀизабе бажари.

¹¹ Гьеб кинабго гьабула цохӀо РухӀалъ, гьедин жиндиего бокьухъе щивав чиясе кьола гьелъ махщел-гьунар.

¹² Мисалалъе босилин инсанасул черх. Черх цо буго, лугби гӀемер руго. КигӀан гӀемер ругониги гьел лугбуздасан лъугьун буго цохӀо черх. Гьединав вуго МасихӀги.

¹³ ЦохӀо РухӀалдалъун киналго нилъ чурун рацӀцӀалъана, цого черхлъун лъугьана – жугьутӀалги, грекалги, лагъзалги, уздензабиги. Цого РухӀалдасан гьекъезаруна киналго.

¹⁴ Цо лагаялдасан гуро черх лъугьун бугеб, гӀемераздасанин.

¹⁵ Масала, бохалъ жиб квер гурин ва гьаб черхалъул лагаги гурилан абуниги, чорхол лагалъун хутӀулагури гьеб.

¹⁶ Яги гӀиналъ жиб бер гурин ва гьаб черхалъул лагаги гурилан абуни, чорхол лагалъун хутӀулагури гьеб.

¹⁷ ТӀолабго черх цохӀо бералдасан гӀуцӀараб букӀарабани, гьелда кин рагӀилеб букӀараб? ТӀолабго черх гӀиналдасан гӀуцӀараб букӀарабани, махӀ кин гьелда лъалеб букӀараб?

¹⁸ Амма Аллагьас киналго лугби ургъунго цо чорхолъ рекъезарун руго ва щибаб лагаялъе бакӀги бихьизабун буго.

¹⁹ Кинабго цо лага бугони, черх букӀинищха.

²⁰ Гьединлъидал лугби гӀемер руго, черх цо буго.

²¹ Бералъ квералда абизе рес гьечӀо дие мун къваригӀунарилан. Яги бетӀералъ бохдузда абизе рес гьечӀо дие нуж къваригӀунарилан.

²² Амма бищунго загӀипалилан кколел лугби чорхое лъугьун ратула бищунго къваригӀунеллъун.

^23-24 «ХӀурмат гьабизе» кколарелилан рикӀкӀунел лугбузул гурищ нилъеца цӀикӀкӀун тӀалаб гьабулеб? Берцинал лугбуздехун гьечӀеб тӀалаб-агъаз гьабулагури нилъеца сураралилан кколел лугбузул. Аллагьас черх гӀуцӀун буго къимат гьечӀел лугбузул тӀалаб-агъаз цӀикӀкӀунеб къагӀидаялъ,

²⁵ – чорхолъ дагӀба-рагӀи ккечӀого букӀине ва киналго лугбуз бащадго цоцазул тӀалаб-агъазги гьабизе.

²⁶ Цо лага унтани, киналгоги унтула. Цо лага беццани, киналгоги рохула.

²⁷ Нуж киналго МасихӀил черх ккола. Нужер щивав чи гьеб чорхол лагаги бутӀаги ккола.

²⁸ Иман лъуразул агьлуялъе Аллагьас тӀоцере чапарзаби тӀамуна, кӀиабизе – халкъалда Аллагьасул амру лъазабулел чагӀи, лъабабизе – мугӀалимзаби, цинги мугӀжизат бихьизабулел чагӀи, цинги гӀадамал сахлъизарулел чагӀи, кумекчагӀи, бетӀерлъи гьабулел чагӀи, батӀи-батӀиял мацӀазда кӀалъалел чагӀи ритӀана.

²⁹ Кинавго чи чапар вукӀуневищ? Кинавго чиясухъа бажарулебищ Аллагьасул амру халкъалда лъазабизе? Кинавго чи мугӀалим вукӀуневищ? Кинавго чиясда кӀолебищ мугӀжизат бихьизабизе?

³⁰ Кинавго чиясул букӀунебищ унтарал сахлъизаризе гьунар? Кинавго чиясухъа бажарулебищ батӀи-батӀиял мацӀазда кӀалъазе? Кинавго чиясухъа бажарулебищ батӀи-батӀиял мацӀазда цогидазда бичӀчӀизабизе?

³¹ Амма нужеца тӀалаб гьабе бищунго лъикӀаб махщел-гьунар щвезе. Гьанже дица нужеда бихьизабила гьелдасаги лъикӀалде нуж рачунеб нух.