Коринфиязухъе тӀоцебесеб кагъат 11 - Аллагьасул Калима

11 бетӀер

¹ Дица МасихӀидасан мисал босулеб бугеб гӀадин, дидасан нужецаги мисал босе.

ДугӀа гьабизе данделъараб бакӀалда кин рукӀине кколел?

² Дица нуж реццула, дун нужеда киданиги кӀочон толев гьечӀелъул, дие щваралда рекъон нужеда дица малъарабги рехун толеб гьечӀелъул.

³ Амма дие бокьун буго нужеда бичӀчӀизе: щивав чиясул бетӀергьан МасихӀ вуго, лъадиялъул бетӀергьан рос вуго, МасихӀил бетӀергьан Аллагь вуго.

⁴ ДугӀа гьабулеб яги иман лъуразул агьлуялда Аллагьасул амру лъазабулеб мехалъ бихьинчияс тӀагъур бахъичӀони, жиндирго бетӀер инжит гьабула гьес.

⁵ ДугӀа гьабулеб яги иман лъуразул агьлуялда Аллагьасул амру лъазабулеб мехалъ чӀужугӀаданалъ кӀаз тӀаса бахъани, жиндирго бетӀер инжит гьабула гьелъ. БетӀер кӀкӀварай гӀадин йикӀунелъулха гьей.

⁶ КӀаз чӀвазе бокьуларей чӀужугӀаданалъ бетӀер къунцӀизе ккела. КъунцӀараб яги кӀкӀвараб бетӀергун хьвадизе гьей намуслъулей йигони, биччанте гьелъ кӀаз чӀвазе.

⁷ Бихьинчияс тӀагъур лъезе бегьуларо, Аллагьас кӀодо гьавизе вижун вугелъул гьев. ЧӀужугӀаданги йижун йиго бихьинчи кӀодо гьавизе.

⁸ ЧӀужугӀаданалдасан вижичӀелъулха бихьинчи, бихьинчиясдасан чӀужугӀадан йижидал.

⁹ ЧӀужугӀаданалъе гӀоло вижичӀелъулха бихьинчи, бихьинчиясе гӀоло чӀужугӀадан йижидал.

¹⁰ Гьединлъидалин чӀужугӀаданалъ бетӀералда кӀаз чӀвазе кколеб, гьей росасул ихтияралда йикӀин малаикзабазда лъазе.

¹¹ Амма ТӀадегӀанасде цолъараб мехалда лъадиги росасул ихтияралда йикӀуна, росги лъадиялъул ихтияралда вукӀуна.

¹² ЧӀужугӀадан бихьинчиясдасан йижун йикӀаниги, бихьинчи чӀужугӀаданалъ гьавуна. Кинабгоги Аллагьасдасан буго!

¹³ Нужецаго пикру гьабе, чӀужугӀаданалда рекъараб бугищ бетӀерги гӀицӀго тун дугӀа гьабизе?

¹⁴ Жибго тӀабигӀаталъги бихьизабулеб гьечӀищ нужеда халатаб расалъ бихьинчи суризавулев вукӀин?

¹⁵ Халатаб расалъ чӀужугӀадан берцинлъизаюлей гьечӀищ? БетӀералда чӀвалеб кӀаз гӀадин буго гьелъие рас.

¹⁶ Гьелда дагӀба базе бокьарав чиясда дица абила, нилъерги гьечӀин гьединаб гӀадат, иман лъуразул жамагӀатазулги гьечӀин.

ТӀадегӀанасул хӀурматалда гьабулеб квен

¹⁷ Гьанже гьабизехъин бугеб насихӀаталъулъни дица нуж рецциларо: нужер данделъиялъул зарал цӀикӀкӀараб буго гьелъул пайдаялдаса.

¹⁸ Цо бугони, дида рагӀана нужер агьлу данделъараб мехалда гьениб дагӀба-рагӀи кколилан. Гьеб тӀубанго гьереси гьабизеги кӀвеларо.

¹⁹ Жидедаса Аллагь разилъаралал ратӀа рахъизе лъазелъун нужеда гьоркьоб рикьи ккезе кколелъулха.

²⁰ Масала, гьенир данделъараб мехалда ТӀадегӀанасул хӀурматалда гуро нуж кваналел.

²¹ Цоясдаса цояв цеве ккезе тӀалаб гьабун кваналел-гьекъолел руго нуж – цояв вакъун хутӀулев вуго, цогидав мехтулев вуго.

²² Кваназеги гьекъезеги нужер рукъ гьечӀебищ? Аллагьасде иман лъуразул агьлу инжит гьабизеги мискин-пакъир къварид гьавизегийищ нуж данделъулел? Щибха дица абилеб? Нуж реццизейищ лъугьинев? Лъугьинаро!

²³ ТӀадегӀанасдасан лъана дида гьаб кинабго нужеда малъулеб бугебщинаб. Досие хиянат гьабураб сордоялъ ТӀадегӀанав ГӀисаца, цо чедги кодобе босун,

²⁴ тӀаде дугӀаги гьабун, гьебги бек-бекун абуна: «Гьаб буго нужее гӀоло къурбанлъулеб дир черх. Дунги ракӀалде щун, нужецаги гьабе гьадин».

²⁵ Кванан рахъараб мехалъ, додинго щурунги кодобе босун, гьес абуна: «Гьаб буго дир би – ЦӀияб КъотӀи щулалъиялъе тӀолеб би. Гьеб щурминисан чагъир гьекъолеб мехалъ, дун ракӀалде щва нужеда».

²⁶ Гьединлъидал гьеб чед кваналебщинахъе ва гьеб щурминисан чагъир гьекъолебщинахъе нужеца, Дов вачӀинегӀан, гӀадамазда лъазабулеб буго ТӀадегӀанасул хвалил хӀакъалъулъ.

²⁷ Гьедин, бегьулареб къагӀидаялъ ТӀадегӀанасул чед кваналев ва гьесул щурминисан чагъир гьекъолев чияс мунагь гьабулеб буго – ТӀадегӀанасул черхги биги инжит гьабулеб буго.

²⁸ Цин инсан жиндирго рекӀелъе ваккизе ккола, мустахӀикъав вугищали лъазе. Цинги кваназе бегьула гьеб чед ва гьеб щурминисан чагъир гьекъезеги бегьула.

²⁹ ТӀадегӀанасул черх бичӀчӀичӀого кваналев ва гьекъолев чияс жиндаго тӀаде тамихӀ цӀалеб буго.

³⁰ Гьединлъидалин нужеда гьоркьор загӀипалги унтаралги гӀемерлъун ругел, цо-цоял холелги ругел.

³¹ Цин нилъ нилъерго рекӀелъе раккани, Аллагьасул тамихӀ букӀинаро нилъее.

³² Аллагьас нилъее тамихӀги гӀадлуги гьабулеб буго, – цогидаб гӀаламалъе букӀине бугеб жазаялдаса нилъ хвасарлъизе.

^33-34 Гьединлъидал, вацал, нужер данделъи Аллагьасул тамихӀлъун лъугьинчӀого букӀине, кваназе киналго тӀаде щвезегӀан чӀа. Вакъарав чи рокъовго кванан вачӀа. Цогидал амруял дица нужее кьела дунго гьениве вачӀараб мехалъ.