Ka ki ici wapatahakaniwitc Jean 9 - Kice Manito Ocki Omirwatcimowin

¹ Minawatc kotak aceriw ki kweckoctatcikew, ekoni aci niaran. Ni ki wapamaw atcikoc e ki pe pakicik askik, wakwek e ki otciparitc. Ki mirakaniwiw anahwe atcikoc cehikaniw kitci cenak e pokoneckarik e micta wararik.

² Ki cenam. Ki pe nokon e sakapitek, mia e ickotewok micta kicapiskisikanik ka icinakok. Anahwe akwapite tekaci ki kirikwapiswew pisimwa, nac tekaci nama ki otci nokosiw pisimw.

³ Kwackwackotcihimanakecicak ki pe otci orowiwok neta akwapitek, tekaci kaskina askik e ki pa icatcik. Ki mirakaniwiwok mackawisiwiniw mitowi ka asitcisitcik mantcocak ka koctatikositcik.

⁴ Ki itakaniwiwok aka kitci matci totakik mackociriw kaie peikon aka kitci otci matci totawatcik mictikwa acitc kaskina e ici nitawikinik askik. Aric ki mirakaniwiwok tepirak kitci akohatcik anahweriw iriniwa aka ka ki otci kicawatcihakaniwiritci oskitikowarik Kice Manitowa otci.

⁵ Aniki kwackwackotcimanakecicak nama ki otci pakitinakaniwiwok kitci nipahatcik iriniwa, tepirak kitci nekatcihatcik niarano pisimwa irikik. Aniheriw ka ici akohiwetcik, micta nekatcitakaniwoniw mitowi iriniw e asitci akositc e pataskahwikotc mantcoca e koctatikosiritci.

⁶ Anihe irikik ke miparik, niarano pisimwa irikik, iriniwok ke apitc akositcik, kata natowi totamok kitci nipotcik, nama aric kata miskamok ke otci nipotcik. Kata nataweritamok kitci poni pimatisitcik, kata aric ocomoctakokw nipowiniw.

⁷ Aniki kwackwackotcihimanakecicak mia peikon atikok icinakosipanak, ka ki nisawihakaniwitcik kitci icatcik e natoparinaniwonik. Octikwaniwak apatcitapanak kekociciriw mia peikon actotiniw e osawo coriawapiskowonik e icinakonik, kaie otactamikowaw mia peikon iriniw otactamikw e icinakosiwaspan.

⁸ Owirisisiwaw mia peikon iskwew owirisis icinakonipan. Owipitiwaw, mia micapiciw owipit icinakonipan.

⁹ Otasinakewak apatcitawok kekociciriw ka piwapiskowonik, mia peikon piwapisko papakiwaniw ka piskak cimakanic, e icinakonik. Kaie e ititakonik e atciparitatcik otatakoniwaw, mia peikon e micta mitceki otapana, atikok e otcipitakik, e ispatatcik ke ici natoparinaniwonik. Ekoni e ititakonik.

¹⁰ Takonipan osowaw, mitowi mantcoca ka koctatikosiritci e icinakonik osoriw. Ekota neta osowak e otci otciparinikipan omackawisiwiniwaw kitci ki akohatcik iriniwa niarano pisimwa irikik.

¹¹ Okimamiwawa, enko anihi peikw matci aceriwa ka mitaritci e pokoneckarik e micta wararik. Anahwe matci aceriw icinikaso “Abaddon,” hébreu e ici arimwaniwonik. Minawatc grec e ici arimwaniwonik icinikatakaniwiw “Apollyon.” Wi itemakaniw aniheriw oticinikasowin “Anahwe mocak ka pikotasotc.”

¹² Aci ickwa iciwepan anihe nictam ka ki pe ici micta arimiparik. Minawatc kiapatc nicw kata pe takociparino.

¹³ Minawatc kotak aceriw kweckoctatam okweckoctatcikan. Ekoni aci nikotwaso aceriwok e kweckoctatciketcik. Ni ki petawaw awik e arimwetc, e otewetak neta ka new kikeapiskowok ka ici aiamihe pakitinikaniwonik ka osawo coriawonik, nikanik e ici tatc Kice Manito.

¹⁴ Anahwe ka arimwespan ki itew anihi aceriwa ka takonamiritci kweckoctatcikaniw: “Pakitinik kitci matcatcik aniki new aceriwok ka takopisotcik piwapiskwapiriw, neta rarewak micta sipik ka icinikatek Euphrate.”

¹⁵ Ki pakitinakaniwiwok aniki e newotcik aceriwok. Ki meka arakaniwiwok kitci totakik e acterik otamirowiniwaw, ani e tato tipahikanearik kaie ani e ici kicikarik, ani e tato pisimokarik, kaie e tato piponikarik, kitci nta nipahatcik iriniwa ota askik, kekatc apita nta e taciritci.

¹⁶ Tapanak neta mitcet cimakanicak e okitetapitcik otatikomiwak. Ni ki itikowin nicwaw mitato mitanowaw kitci kice mitato mitana ki taciwok.

¹⁷ Enko ohwe ka icinowakik aniki atikok kirika anahweriw ka okitapiritci ospiskoniwak e ki ici wapamakik: apatcitapanak wikasiriw ka apatanik e nta natoparinaniwonik. Aniheriw ka apatcitawaspan otasinakewak, piwapisko papakiwaniw e micta mikowarik mia ickote, e wasiskonarik mia mitowi asini ka micta mirositc ka icinikatakaniwitc “saphir,” acitc e osawarik mitowi akwapite e osawapitek. Octikwaniwaw aniki atikok, mia mitowi micapiciw octikwan e icinakonikipan. Ickoteriw kirika akwapiteriw kaie aniheriw kotakeriw ka osawapiterik ka micta witcekimakonik otci orowiparinipan otoniwak.

¹⁸ Kekatc apita iriniwok ota askik ki nipahikowok aniheriw nekatcitawiniw e nictiwonik: ickoteriw kaie akwapiteriw acitc aniheriw ka osawapiterik e ki otci orowiparinikopanen otoniwak aniki atikok.

¹⁹ Ekota neta wetciparinik aniki atikok omackawisiwiniwaw otoniwak kaie osowak, kitci ki akohatcik iriniwa. Osowaw, mia kinepikw icinakonipan; onoskotc tca osowaw, mia peikon kinepikw octikwan e icinakonik. Enkweriw ka ki apatcitatcik kitci akohiwetcik.

²⁰ Kaskina kotakihik iriniwok ota askik aka ka ki otci nipahikotcik aniheriw nekatcitawiniw nama ki otci kweskatisiwok ka ici patahakik. Nama ki otci ponitawok e kicterimatcik matci manitowa kaie manitokana wirawaw tipirawe e ki ocihawaspan, aniheriw e ki apatcitatcik osawo coriariw kaie coriariw acitc kotakeriw piwapiskoriw, “bronze” ka icinikaterik, e wasapiskiterik e ki sosokaterik ickotek, kaie asiniwa e ki apatcihatcik kirika mictikwa. Aniki manitokanak nama ki wapatamok, nama kaie ki petamok acitc nama ki pimotewok.

²¹ Aniki iriniwok nama ki otci ponitawok e manohotcik, kaie e matawositcik e matci totakik, kaie matci pimatisiwiniw e sakitatcik acitc e kimotitcik. Nama ki otci wi kweskatisiwok.