Ka ki ici wapatahakaniwitc Jean 2 - Kice Manito Ocki Omirwatcimowin

Ka ici witamawakaniwiritci Cecoc otirinima neta ka tacikeritci Éphèse otenak

¹ Ni ki itikowin: “Masinahamo anahwe aceriw ka mihatc iriniwa ka tapwerimiritci neta ka tacikeritci Éphèse otenak: Enko ohweriw ka itetc anahwe ka takonatc nicowaso atcikoca onihiwinik kaie ka pimotetc e ici nicowatcinik e osawapiskarik wactenamakaniw:

² Ni kiskeriten e aitotamekw. Ni kiskeriten ka ici arimihitisoekw e mantokasoekw kirika e sokikapowiekw e nakickamekw arimisiwin. Ni kiskeriten aka e pakitinekok ka matci totakik kitci witcewitakok. Ki ki nanto kiskerimawawok iriniwok ka kiraskitcik e itetcik e ki pe iciticohwakik, namaiew aniki tapwe nitarotakanak. Ki ki nisitowinowawawok e wecimiwetcik.

³ Ki sokikapowinawaw e nakickamekw arimisiwin. Ki ki nekatcitanawaw osam e nosanehwiekw, nama kaie ki ki otci atweritcikanawaw.

⁴ Aric peikocin ka ici patahamekw ka wi arimotamatakok: nama aci ki sakihinawaw ka asitci sakihiekopanen weckatc, nictam ka kitcipariekw e nosanehwiekw.

⁵ Mamitoneritamokw e asitci warawik pakiciniekw! Meckotatisikw, mia weckatc e itatisiekopanen! Kecpin aka meckotatisiekwe, ki ka natawapamitinawaw kaie ni ka pe nta maninen kiwactenamakaniwaw neta e ici actek.

⁶ Aric ohwe wewerita ki totenawaw: ki cikeritamwanawaw e totakik iriniwok ka nosanehwatcik Nicolas, mitowi nin ka cikeritaman.

⁷ Acteriw kaskina iriniwok ka kackitatcik kitci petawitcik wewerita kitci natotawatcik Miro Manitowa e itaritci nitirinima. Aniki ke cakotcitatcik ka maratanik ni ka mirawok kitci mowatcik wapimina neta wapiminatikok ka nitawikiritci Kice Manito okitikan askik. Enkweriw ka otci pimatisinaniwonik.”

Ka ici witamawakaniwiritci Cecoc otirinima neta ka tacikeritci Smyrne otenak

⁸ Kiapatc ni ki itikowin: “Masinahamo anahwe aceriw ka mihatc iriniwa ka tapwerimiritci neta ka tacikeritci Smyrne otenak: Enko ohweriw ka itetc anahwe wirctam ka ki tatc epwamoci kaskina kekociciriw ki takonik kaie ke ickwanak kaskina kekociciriw, anahwe ka ki nipotc kaie ka ki pe koski pimatisitc:

⁹ Ni kiskeriten e arimisiekw kaie e kitimakisiekw. Aric tapwe ki micikitanawaw kitcitcakociwak itekera! Ni kiskeritamwan e ici marerimitakok atita iriniwok ka icinikatisotcik ‘cota iriniwok,’ aric aka tapwe e iteritakositcik. Matci Manitowa nosanehwewok.

¹⁰ Akawir koctamokw anihe ke ici nekatcitaiekw. Natotamokw! Matci Manito ki ka kokwetcihikowaw. Kata totam mitcet neta e taciekw kitci iciticohokoiekw kipohotowikamikok. Ki ka nekatcihikowinawaw mitato kickwa irikik. Aka aric ponitakw e asperimototawekw Teperitciketc, misawatc wi nipahikoiekwe. Meckota ki ka miritinawaw ohwe caweritcikan: kakike pimatisiwin.

¹¹ Acteriw kaskina iriniwok ka kackitatcik kitci petawitcik wewerita kitci natotawatcik Miro Manitowa e itaritci nitirinima. Aniki ke cakotcitatcik ka maratanik nama nicwaw kata nipowok.”

Ka ici witamawakaniwiritci Cecoc otirinima neta ka tacikeritci Pergame otenak

¹² Kiapatc ni ki itikowin: “Masinahamo anahwe aceriw ka mihatc iriniwa ka tapwerimiritci neta ka tacikeritci Pergame otenak: Enko ohweriw ka itetc anahwe ka takonik aniheriw mokomaniw ka kinwapiskarik e aitowi kinarik, otonik e otci orowiparinik:

¹³ Ni kiskeriten ka ici tacikeiekw: neta Matci Manito ka ici apitc okimaw tetapiwakanik. Aric mocak ki pe nosanehwinawaw. Nama ki ki otci wepinenawaw e tapwerimiekw, misawatc Antipas e ki nipahakaniwitc neta kotenamiwak, mocak anahwe ka ki atoskectawitc. Ekota nta kotenamiwak, neta Matci Manito ka ici taciketc.

¹⁴ Aric ki ka kakeskimitinawaw ohwe otci ka totamekw: tawok iriniwok neta kotenamiwak e nosanetawatcik weckatc iriniwa ka ki pe ici kiskinohamakerispana, Balaam ka ki icinikatakaniwiritci. Anahwe Balaam ki kiskinohamawew peikw iriniwa, Balac ka icinikasoritci, kitci paskewiraritci Israël iriniwa kitci pakiciniritci pactatowinik. Anahwe tca Balac ki cakosimew kitci mitciritci wiasiriw e ki cawerimakaniwirispana manitokana kaie kitci pacikwatisiritci.

¹⁵ Peikon kaie tawok iriniwok neta e ici mawotcihitoekw ka nosanetawatcik Nicolas okiskinohamakewiniw.

¹⁶ Meckotatisikw tca! Kecpin aka meckotatisiekwe, ki ka natawapamitinawaw, kirika ni ka naskowatawok aniki iriniwok aka ka wi kweskatisitcik, kitci apatcitaian nimicta nimokoman nitonik ka otci orowiparik.

¹⁷ Acteriw kaskina iriniwok ka kackitatcik kitci petawitcik wewerita kitci natotawatcik Miro Manitowa e itaritci nitirinima. Aniki ke cakotcitatcik ka maratanik ni ka mirawok kitci mowatcik pakwecikana ka karakaniwiritci, ‘manne’ ka icinikatakaniwiritci. Kaie tato neta e tacitcik ni ka mirawok asiniwa e wapapiskisiritci, e masinaterik ocki icinikasowiniw. Tepirak aniki ke mirakaniwitcik ocki icinikasowiniw kata kiskeritamok, nama kotak awik.”

Ka ici witamawakaniwiritci Cecoc otirinima neta ka tacikeritci Thyatire otenak

¹⁸ Kiapatc ni ki itikowin: “Masinahamo anahwe aceriw ka mihatc iriniwa ka tapwerimiritci neta ka tacikeritci Thyatire otenak: Enko ohweriw ka itetc Kice Manito Okosa, anahwe ockicikw ka micta wasiterik mitowi ickote kaie ka micta wasiterik osit, mia piwapiskw e wasapiskitek e ki sosokatek ickotek.

¹⁹ Ni kiskeriten e aitotamekw, e apitc sakihitoekw, kaie mocak e tapwerimiekw. Ni kiskeriten kaie e witcihekok kiwitc iriniwawok kaie e sokikapowiekw. Ni kiskeriten kaie kirawe anotc e miro totamekw patok weckatc ka ki pe aitotamekw nictam ka kitcipariekw e nosanehwiekw.

²⁰ Aric enko ohwe aka ka sakitaian e totamekw: ki pakitinawaw anahwe iskwew, Jézabel ka icinikatakaniwitc, kitci wecimitakw, e itekasotc: ‘Kice Manito ni ki mirikw ke ici tipatcimowak.’ Mitcet onicimew iriniwa ka atoskectawiritci e kiskinohamawatc kitci pacikwatisiritci, kaie kitci mitciritci wiasiriw e ki cawerimakaniwirispana manitokana.

²¹ Kinowec ni ki pehaw kitci kweskatisitc. Nama aric wi ponitaw e pacikwatisitc.

²² Ekoni ke otci mirak kitci nekatcitatc neta onipakanatikok. Aniki ka ki wipematcik kaie wirawaw kata micta nekatcitawok, kecpin aka ponitatawe e matci totakik e nosanehwatcik anihi iskwewa.

²³ Kaie ni ka nipahimawok onitcanica. Ekoni tca ke otci kiskeritakik kaskina ka tapwerimitcik, nin kaskina e kiskerimakik e iteritakik iriniwok kaie e icinakonik otehiwaw. Tato neta e taciekw ni ka miraw ka ki ici kackitamatisotc.

²⁴ Kirawaw aric nete ka tacikeiekw Thyatire otenak, aka ka nosanetaiekw matci arotc kiskinohamakewin, aka kaie e ki otci otapinamekw anihe ka icinikatcikatek ‘Matci Manito okiskeritamowin ka katakaniwonik,’ ohwe ki witamatinawaw: nama takon kotak kekocic ke miritakok kitci totamekw.

²⁵ Wewerita aric kanaweritamokw e ici tapweritamekw, nac kitci pe takocinian.

^26-28 Aniki ke cakotcitatcik ka maratanik, kaie ke nosanetatcik e ici nataweritamawak nac kitci koski takociniwak, ni ka mirawok tiperitamowiniw, mia peikon aniheriw tiperitamowiniw Notawi ka ki miritc, kitci mihatcik kaskina iriniwa e aicinakosiritci ota askik, kotc e itemakanik Kice Manito Omasinahikan: ‘Kata micta mackawisiwok mihatawe, kaie kata pactohwewok anahweriw aka ka natotamiritci, mia awik e pactahak orakaniw ka askiwonik.’ Psaumes 2.8-9 Kaie ni ka mirawok wapan atcikoca.

²⁹ Acteriw kaskina iriniwok ka kackitatcik kitci petawitcik wewerita kitci natotawatcik Miro Manitowa e itaritci nitirinima.”