Ka ki ici wapatahakaniwitc Jean 15 - Kice Manito Ocki Omirwatcimowin

Aceriwok acitc mamitcitc nekatcitawiniw

¹ Minawatc ni ki wapaten wakwek kotak kekocic e mamiskasinakok kaie e micta mirwinakok: nicowaso aceriwok e takonakik nicowaso nekatcitawiniw. Enko ni mamitcitc nekatcitawina. Ekoni meka mamitcitc ke ici wapatahiwetc Kice Manito e ki kiciwahakaniwitc.

² Minawatc ni ki wapaten kekocic, mia kitcikami e icinakok, e micta wasitek mitowi osapiwakanapiskw, ickote neta pitc e actek. Ni ki wapamawok kaskina ka ki cakotcihatcik anihi matci awesisa kaie anihi manitokana mia ka icinakosiritci, kaie aka ka ki otci naheritakik kitci masinasotcik e tatosinasoritci e icinikasoritci. Ekota nta e nanipowitcik kitcikamik ka osapiwakamiterik, e takonakik aceriw pwapwapikepitcikaniw, Kice Manitowa ka ki mirikotcik.

³ Ki nakamowok Moïse onakamowiniw, anahwe weckatc ka ki atoskectawatc Kice Manitowa, kaie Maritcenic onakamowin, e itahamasotcik e nakamotcik: “Teperitciketc Kice Manito, ka mawotci mackawisiin, kaskina e totaman micta kicteritakon kaie micta mirwacin. Kir ka okimawiin kaskina iriniwok e aicinakositcik ota askik, kaskina ka aitotaman mocak icikowisk icinakon, kaie mocak ki tapwan.

⁴ Awin ia aka ke kicterimisk, Teperitcikein? Awin ia aka ke icperimisk? Kir tepirak ka kitcitwawisiin. Kaskina iriniwok, kaskina wiec e wetcitcik ota askik, kata pe icawok kitci pe nta kicterimiskik. Wewerita meka ki pe nokotakaniwon e apitc icikowisk kaskina ka totaman.”

⁵ Minawatc wakwek ni ki wapaten kitci aiamihe mikiwam e cetik. Ekota neta e ici takok anihe aiamihe rakasimonikiwam ka ki ocitakaniwok, kitci ki otci mikawasimakaniwitcik iriniwok e ki mirikotcik Kice Manitowa otacotamakewiniw.

⁶ Aniki e nicowatcitcik aceriwok ka takonakik nicowaso nekatcitawiniw ki orowiwok kitci aiamihe mikiwamik. Wapaspisopanak, e micta wasiterik aniheriw wikasiriw, kaie e apatcihatcik osawapiskesiritci opokotehonew.

⁷ Peikw ani e tacitcik new ka pimatisitcik ki mirew papeikw e nicowatciritci aceriwa e osawapiskarik orakaniw. Tato orakan mockineriw Kice Manito okiciwasiwin, anahwe nespitc ka pimatisitc.

⁸ Kitci aiamihe mikiwam tekaci ki mockinapitew, nte ka otci kiskeritakonik Kice Manito oticperitakosiwin kaie omackawisiwin. Nama awik ki pitakepan neta kitci aiamihe mikiwamik, aka moci e ki cakonikatek anihi nicowaso nekatcitawina ka takonakik aceriwok.