Ka ki ici wapatahakaniwitc Jean 12 - Kice Manito Ocki Omirwatcimowin

Iskwew kirika atikocimakan

¹ Minawatc peikw kekocic e matawinakok ki pe nokon icpimik. Ni ki wapamaw peikw iskwew e wikwekitc pisimwa, mia mitowi owikasim e ki piskak. Ki takoskew okitc tipiskaw pisimok. Apatcihepan mitato acitc nicw atcikoca octikwanik e otactotinitc.

² Mekwata taci wapamawasopan. Nanotakosipan e akositc.

³ Kiapatc peikw kekocic ki pe nokon icpimik e matawinakok. Ni ki wapamaw micta atikocimakan tekaci e mikositc. Nicowatcinipan octikwan kaie mitatciripan oteckana. Tato e tatinik octikwanik apatcitapan okimaw actotiniw.

⁴ Nipara ki nitciwepohwew atcikoca icpimik, kekatc apita e taciritci, oso e apatcitatc, askik e iciwepohwatc. Ekota neta nikanik iskwek e tacikespan e wapamawosoritci, kitci mowatc anihi onitcaniciriw kotc ickwa nitawikiritena.

⁵ Anahwe iskwew ki onitcaniciw. Ockinikicica ki wapamew. Aci anahwe awacic ki iciwirakaniwiw Kice Manitok, neta e apiritci Kice Manitowa okimaw otetapiwakanirik. Wir anahwe awacic kata tiperimew kaskina iriniwa kaskina e icinakosiritci, kata meka micariw omackawisiwin.

⁶ Iskwew ki ocimo neta askik ka ici cipewatawokarik, Kice Manitowa e ki nisawitakotc ke ici taciketc, kitci mihakaniwitc peikwaw kice mitato mitana acitc nicwaw mitato mitana acitc nikotwaso mitana tato kickwa irikik.

⁷ Aci ki micta natoparinaniwon wakwek. Ka tiperimatc aceriwa ka icinikatakaniwitc Micer kaie anahweriw otacerima ki icawok e nta natoparictowatcik anihi atikocimakana, kaie ki pe kiwe natoparictako anihi atikocimakana kaie anahweriw otacerimiriw.

⁸ Aric anahwe atikocimakan ki cakotcihakaniwiw. Nama ki otci pakitinakaniwiw awocamec kitci taciketc nete icpimik, kirika anahweriw ka atoskectakotc.

⁹ Ki orowepinakaniwiw anahwe micta atikocimakan. Enko na weckatc micta kinepikw ka icinikatakaniwitc Matci Manito, kekotc ma Satan, ka wecimatc kaskina iriniwa ota askik. Ki iciwepinakaniwiw neta askik, kirika otacerima kaie wirawaw e ki iti acotci wepinakaniwitcik.

¹⁰ Minawatc ni ki petawaw awik e arimwetc e micta sokitakositc, wakwek e otewetak, e itetc: “Aci otcitciparin kitci akwacimitokw Kikice Manitomino! Aci ickwa wapatahiwew e apitc mackawisitc, wir e okimamiikw! Aci anihi ka ki itespan kitci pe iciticohwatc kitci pe nta akwacimimitokw ki wapatahiweriw wir e tiperitcikeritci. Ki orowepinakaniwiw meka anahwe ka itactahoriwetc, kitci nitciwepinakaniwitc anahwe mocak ka wi itactahoratc kiwitcicaninowa, anahwe nikanik ka nanipowispan neta Kikice Manitomino e ici nanipowiritci, aspinikotc kitci ki itactahoratc iriniwa, e kicikarik kaie e tipiskarik.

¹¹ Kiwitcicaninowok ki cakotcihewok anihi ka itactahoriweritci, Maritcenic e ki pakitinak omikw kitci macikowinik ka nipotc wirawaw otci, kirika osam e tipatatakik Kice Manitowa otipatcimowiniw. Nama ki otci manatcitawok opimatisiwiniwaw, kaie kitci pakiterimitisotcik kitci nipotcik.

¹² Ekoni ke otci micta mireritamekw, wakwek! Kirawaw neta ka tacikeiekw icpimik, ekoci mireritamokw! Aric kirawaw neta askik kirika kitcikamik ka tacikeiekw, ki ka arimiparinawaw! Ki nitcickaw Matci Manito kitci natawapamitakw e micta kiciwasitc. Kiskeritam meka aka kinowec e acterik kitci totak wa totak.”

¹³ Anahwe atikocimakan ka kiskeritak e ki iciwepinakaniwitc askik, ki iti pimiticahwew anihi iskwewa ka ki okosiritci.

¹⁴ Ki mirakaniwiw anahwe iskwew micta mikisiwa otatakoniw, kitci ki miretc nac nete kitci ki ici takociretc ka ici cipewatawokarik. Kata mihakaniwiw neta nicto pipona acitc apita irikik, aka kitci nta makockatcihikotc anihi micta kinepikwa.

¹⁵ Minawatc anahwe kinepikw ki tawotiw. Ki otci orowipariniw nipiriw otonik e mitcakaminik, nac mia micta sipi e iti icinakonik, kitci matcewapikotc anahwe iskwew kitci matcewirikotc aniheriw nipiriw.

¹⁶ Aric askiriw ki witcihiko anahwe iskwew. Ki ceparin aski kitci ki isparik neta nipi, aniheriw nipiriw ka mitcakaminik nohwe atikocimakan ka ki pakitinak kitci macikowinik otonik.

¹⁷ Anahwe atikocimakan mictahi ki kiciwahiko anihi iskwewa. Ki nta natoparictawew kotakihi anahweriw otaniskotape osimiriw. Anahweriw onitcanica anahwe iskwew, enko aniki kaskina ka sapitakik Kice Manitowa otirakonikewiniw kaie mocak ka nosanetatcik tapwewiniw Cecoc ka ki ici pe wapatahiwetc.

¹⁸ Anahwe atikocimakan ki icikapowiw rarewak kitcikamik.