Ka ki ici wapatahakaniwitc Jean 11 - Kice Manito Ocki Omirwatcimowin

Nicw ka tipatatakik ka ici kiskeritakik

¹ Minawatc ni ki mirikowin pisekan, mitowi mictikw e icinakok, mitowi ka apatcitakaniwok e tipahikaniwok, e ki itikoian: “Nta tipaha e irikokwarik Kice Manito okitci aiamihe mikiwam kirika ka ici aiamihe pakitinikaniwonik, acitc ki ka akimawok e tacitcik ka aiamihatcik neta.

² Nama aric ki ka tipahen anihe aski orowitimik kitci aiamihe mikiwamik e ici takok. Neta orowitimik ki mirakaniwiwok iriniwok aka ka nosanehwatcik Kice Manitowa, ekota neta ke pa tatakoskatakik otenamiriw ka kitcitwaweritakonik, nemitana acitc nicw pisimwa irikik.

³ Ni ka iciticohwawok nicw iriniwok kitci arimwetcik nin otci, kitci tipatatakik ka ici kiskeritakik. Kata makateaspisowok kitci wapatahiwetcik e nekateritakik. Kata pa tipatatamok tipatcimowiniw ka ki mirikotcik Kice Manitowa, peikwaw kice mitato mitana acitc nicwaw mitato mitana acitc nikotwaso mitana tato kickwa irikik.”

⁴ Aniki e nicitcik iriniwok natcikapowictawewok Teperitcikeritci, anihi ka tiperitamiritci askiriw. Iteritakosiwok mia mitowi nicw mictikwa, “oliviers” ka icinikatakaniwiritci, kaie mitowi nicw wactenamakaniw, pimite ka apatanik.

⁵ Kecpin awiriw natowi totamiritena kitci akohikotcik, ickoteriw kata otci orowipariniw otoniwak kitci nipahatcik anahweriw ka wi cikerimikotcik. Ekote ni ke isparitcik iriniwok kitci nipahakaniwitcik wi natowi totakawe kitci akohatcik anahweriw e niciritci iriniwa.

⁶ Irikik e tacikikaterik e pa tipatatakik Kice Manito otipatcimowiniw, takoniw mackawisiwiniw kitci nakanakik kitci kimiwonik. Takoniw mackawisiwiniw kaie matci kitci meckotcitatcik nipiriw, miko kitci isparinik. Ki mirakaniwiwok kaie mackawisiwiniw kitci miratcik iriniwa e irikokoskamikarik nekatcitawiniw, irikik wirawaw e ici nataweritakik kitci isparinik.

⁷ Ickwa pa tipatcimotawe aniheriw otipatcimowiniw, matci awesis ka pe orowitc neta ka pokoneckarik ka micta wararik kata kwackotitotawew e wi macikowatc anihi iriniwa e niciritci. Kata cakotcihew kaie kata nipahew.

⁸ Ickwa nipahate, ekota neta ke pa miciniritci owiawiwariw meskanak micta otenak, neta ka Tiperimikotcik ka ki ici tcictaskowatakaniwiritci tcipaiatikok. Arica icinikatew anihe otenaw Sodome, matci kaie icinikatew anihe otenaw Égypte.

⁹ Iriniwok kaskina papitoc e aicinakositcik ota askik, kaskina e tato otenwesitcik, kaskina tatowek e ici arimwetcik, kaie kaskina wiec e wetcitcik kata kanawapatamwewok owiawiwariw anihi e niciritci iriniwa nicto kickwa acitc apita irikik. Nama kata pakitinamok tecikotc kitci rikwaskatakaniwiritci.

¹⁰ Iriniwok ota askik kata mireritamok, aci e ki nipahakaniwiritci anihi nikan tipatcimo iriniwa e niciritci ka ki micta nekatcihikotcik. Kata mirwatakotawok kaie kata mamiritowok caweritcikaniw.

¹¹ Aric, ka ickwa nicto kickokarik acitc apita, aniki iriniwok e nicitcik ki potatikowok Kice Manitowa kitci koski pimatisitcik. Ki pasikowok. Kaskina ka ki wapamatcik ki micta sekisiwok.

¹² Minawatc aniki e nicitcik ki petawewok awiriw e arimweritci e micta sokitakosiritci, wakwek e otci petakosiritci, e itikotcik: “Pe ocpickakw ote icpimik!” Ki tca ocpickawok, oskok e ki nanipowitcik, mekwata e kanawapamikotcik iriniwa ka cikerimikotcik.

¹³ Ani apitc mekwata ki micta kwekon. Mitatowaw e ici tipahikatek anihe micta otenaw, peikw ki korokoskomikiparin. Nicowasowaw kice mitato mitana iriniwok ki nipowok e ki kwekonik. Aniki kotakihik iriniwok ki micta sekisiwok, kaie ki micta mirwatcimewok Kice Manitowa icpimik ka tacikeritci.

¹⁴ Ekoni aci nicw ka ki pe ici arimiparik e ki pimotemakak. Aiekwamisikw! Kiapatc peikw kata pe takociparin.

Mamitcitc ka petakok e kweckoctatcikaniwok

¹⁵ Minawatc kotak aceriw ki kweckoctatam okweckoctatcikan. Ekoni aci nicowaso. Enko na mamitcitc ka ki kweckoctatciketc. Ki petakon icpimik e arimwaniwok e micta sokitakok, e itemakak: “Aci ickwa otcitciparin anahwe Ka Tiperimitokw tekaci kitci tiperitak ota askik, kirika anihi ka ki pe iciticohwatc kitci akwacimiweritci. Nespitc kata tiperitam!”

¹⁶ Aniki nicitana acitc new ka kiceatisitcik neta okimaw tetapiwakaniwak ka apitcik nikanik Kice Manitowa e ici apiritci ki nipiskoctawewok e kicterimatcik,

¹⁷ e itetcik: “Teperitciketc Kice Manito, ka mawotci mackawisiin, anotc ka tain, kaie mocak ka ki tain, mikwetc kit ititinan e ki apatcitain kimackawisiwin ka micta micak kitci tiperitcikein.

¹⁸ Iriniwok kaskina wiec e wetcitcik ota askik aka ka kiskerimiskik ki iti micta kiciwasiwok. Aci aric otcitciparin kir kitci wapatahatcik e apitc kiciwasiin. Ekoni apitc ke otcitciparik kitci tipaskonatcik kaskina ka nipotcik, kitci cawerimatcik ka ki atoskectaskik e ki nikan tipatcimotcik, kaie kaskina ka tiperimatcik acitc ka kicterimiskik, ka kicteritakositcik kaie peikon aka ka kicteritakositcik. Aci kaie otcitciparin kitci niciwonatcihakaniwitcik iriniwok ka akotatcik askiriw.”

¹⁹ Minawatc Kice Manito okitci aiamihe mikiwam, neta wakwek ka takonik, ki pe cepariniw. Kek ki pe nokon neta pwete ka kitcitwaweritakok, neta e masinaterik Kice Manito otacotamakewin. Ki pe wawaskoreparin, kirika e ki pe koctasitakok kaie e petakositc onimiskiw. Ki kwekon kaie e ki micta sesekak.